2013/02/12

新年就是要有周星星~《西遊.降魔篇》

我想話我好鐘意空虛公子﹗佢一講「我空虛我寂寞我凍」我就笑到收唔到聲﹗呢句歌詞係繼「時日如飛今天在我心裡」後我最愛用的嘛﹗

很玄的是,我看這部是因為新年總要見吓周星星,但呢套戲周星星係導演、監製和編劇,就係無演到囉…

空虛公子隔離個大嬸都好正,空虛公子叫佢唔好咁高調唔好撒花瓣,又話趕時間係搵到呢幾件咁既質素…笑死我﹗而呢個大嬸明顯係有戲的,佢好似羅家英的唐三藏上身咁,係咁話你出聲先得架(空虛公子叫佢拎走隻天殘腳),我諗起羅家英的「你愛」論和「只要有仁慈之心就唔係妖,係仁妖」…激到隻妖嘔血呀﹗…哈哈哈…空虛公子一出場我以為係徐天佑…原來係羅小豬喎﹗


貼番張有周星星的相先(相片刧自豆瓣)。雖然笑點是有的,但劇情嚟講係十級翻兜《功夫》和兩部《西遊記》先講《功夫》啦,,那本兒歌三百首跟《功》的如來神掌,一開始個水城跟《功》的豬籠城寨根本是一樣,陳玄奘(文章)的渣仔設定和《功》的阿星一樣都係最後俾人打到就死咁濟突然變身高手…空虛公子、天殘腳同那個甚麼講國語的茂利,同打斧頭幫的十二路譚腿高手、五郎八卦棍高手勁似(《功夫》呢一段係連隻貓都有戲的嘛﹗),不過啲武打,講堅,無《功夫》拍得咁靚。似到呢真係…無周星星都索得出周星星陣除呀﹗

如果係好INTO兩部《西遊記》的人或許會失望了,段小姐(舒淇)對玄奘條感情線相當DUP紫霞條LINE,連那段經典的「如果要為呢段感情線加上一個限期,我希望係一萬年」都翻玩埋,雖然段小姐要死了…但感人度比紫霞死時猶有不及…呃,當然玄奘唱兒歌係唔夠羅家英的「only you~~~~can take me取西經」咁好笑了…

我在踩呀呵?其實兩部《西遊記》我係入U後先睇,相比之前的《國產零零漆》和之後的《喜劇之王》,我係明顯無特別中《西遊記》的招,仲成日攪亂至尊寶跟白貞貞和紫霞的感情線邊個打邊個添…咁唔夾硬同前作比,呢套《降魔篇》故仔就係玄奘收伏三個徒弟,過程中跟段小姐有一段似有還無的感情,THEN佢頓悟了,就跟弟子一齊上西天取經。完。有武打有感情線又有笑位,係將視點由孫悟空變咗唐三藏啫,都OK既。

唔知係咪古裝呢,陣合拍片(定係已經係國產片?)除無咁勁,加埋啲好港式的對白(都是笑位的來源…),雖然9成9的演員都唔識,但又睇得好投入,笑得出架﹗
我睇了一輪先發現呢個係娜姐﹗佢教段小姐玩性感誘惑玄奘呢段頗有《少林足球》阿梅化行妝見星星(我唔記得佢角色名了…)…又說,舒淇呢套戲雖然要扮老粗,但個造型係極之正常兼係令的,就算俾人打都係得兩行血咁咋喎﹗講番呢段,好老土地個聽話符(誠實豆沙包啲FRIEND?)掉咗喺玄奘度,跟住娜姐做誘人POSE由段小姐變咗玄奘做…笑爆咀…我諗起《上海灘賭聖》大軍扮鞏俐唱《焚身廁所》呀﹗(就是說翻兜味真係好重,但我笑得出嘛﹗個重點)

五指山收伏美猴王…個跌膊郁同條蕉仲有個榴槤笑死我…阿文章哥哥好些角度都幾似巴士高…同埋我想問同佢配音的是林一峰嗎?講野時無咁覺,一唱兒歌就勁似…巴士高加林一峰…個COMBINATION好詭異…(呢篇話廣東配音係林一峰喎﹗)

而美猴王…唔美囉﹗我掛住至尊寶呀﹗

原來一開始收的那條魚妖係沙僧,跟住孫悟空又會變KING KONG咁…做乜CROSSOVER了荷里活啲妖怪片?﹗相比之下,八戒那個燒豬客棧就有啲失色了…那位貌若潘安的哥哥仔同上圖的孫悟空做乜都變咗大戲郁?

由頭到尾我係咁講好笑好笑好笑呀呵?係,睇完就係覺得幾好笑,但啲笑點都好熟口熟面,不能話套戲唔好睇,咁當年《月光寶盒》同《仙履奇緣》都唔係第一吓就被引為經典,係要浸吓先浸得出看點和喜愛出嚟既…或者若干年後這部《降魔篇》都會成為開有線電影台見到佢播又會坐低睇的戲了?﹗我真係好熱愛空虛公子呀﹗

(3/4/13後按:想加番影片的分類…這部…算是國產片了?)

10 則留言:

  1. 金田一12/2/13 20:34

    咁空虚公子一出場你有冇尖叫?!
    話說我睇嗰場,佢一出場,左邊成班妹妹仔尖叫呀!佢出咗兩次場,所以尖叫咗兩次!
    有說一個導演一生人只係拍一部戲,其他嘅都係呢部戲嘅註解罷了。套在周星星呢部戲都好啱。

    回覆刪除
    回覆
    1. RE:金田一

      咁我唔係小豬粉,之前又無聽佢歌又無睇佢劇,又唔使叫既…不過空虛公子呢個角色真係好正﹗
      又說因為我係睇歡樂早場,太眼瞓關係我睇了一輪先發現佢係小豬…
      註解…這個講法很不錯…呢部戲新得嚟有啲舊舊得嚟有啲新,真係好高境界…XD

      刪除
  2. 我睇左成篇文.到睇留言先知原來空虛公子係小豬做...
    失格的飯我冇留意佢呢套電影係咩角色,只知佢有份做.
    不過就算佢做.我都冇咩興趣睇....
    可能近年周導演的電影我都冇咩興趣...

    回覆刪除
    回覆
    1. re:星晴

      哈,我完全唔知小豬有份做添喎…淨係知娜姐有客串…
      周導這套是大炒冷飯,其實都幾挑戰大家底線的…我對佢上一套《長江七號》都無乜興趣,呢套係純粹新年無乜戲想睇,又唔想睇賀歲片…就搵套野求其睇吓咁囉,好在都幾好笑…睇得幾開心…

      刪除
    2. 我同你相反呀.
      我唔知有娜姐份..哈哈~
      《長江七號》真係唔多掂.就算依家TBB有時做.我都冇咩興趣睇呀~
      如果呢套都有D笑料..我等遲下有SOURCE去睇下先....
      畢竟我GE童年真係充滿著《月光寶盒》同《仙履奇緣》!

      刪除
    3. RE:星晴

      哈哈﹗其實事前我無特別留意《降魔篇》的事情,只係新年想搵戲睇又唔想睇賀歲片咪求其囉,反正有周星星個名對我嚟講都有一定吸引力既…
      《長江七號》唔知呢…可能太合怕片feel(定已經係全國片?)…個setting對我嚟講唔吸引…始終佢啲地道對白係笑位來源嘛,變咗古裝就好啲,就算啲人唔識,起碼故仔會令我投入啲…
      《月光寶盒》和《仙履奇緣》我過咗n年之後先睇,睇的時候係慕名而看的,睇吓點解啲人咁熱讚,咁好睇是好睇的,不過就無由細睇到大的《賭x》、《逃學》、《整蠱專家》、《凌凌漆》咁入腦囉…

      刪除
  3. 我覺得超好睇喎。有繼承到當年《月光寶盒》同《仙履奇緣》的情懷。感動

    回覆刪除
    回覆
    1. re:WEnDy

      我的感覺是有點複雜,好笑(睇)是好笑(睇),但覺得啲笑位有點太repeat,好似無乜新意…不過睇完我是滿足的,畢竟冷飯都是一兜炒得好吃的冷飯…反正佢啲舊戲我都翻睇又翻睇,我唔介意佢整多兜好吃的冷飯出嚟既…

      刪除
  4. 其實以前兩套西遊唔明佢表達咩,係責任?定係講咁耐就係為左講愛你一萬年?
    by有敵

    回覆刪除
    回覆
    1. re:有敵

      http://vestigesoul725.mysinablog.com/index.php?op=ViewArticle&articleId=2626642

      呢篇文我覺得講得幾好…

      我諗…係悟掛?﹗其實愛你一萬年有兩次係昆人的,最後一次先係真心…可能拎王家衛呢句對白嚟玩的時候都未必估到會咁大反應…

      刪除

要講幾句嗎?﹗XD