2011/01/24

告人惡挪之下:《惡人》、《挪威的森林》

嘩﹗我完成了這個創舉了﹗
惡人》(推銀度:3…卻因為有人坐在我隔離而不方便推銀…)

之前已經有部《復仇者之死》喺廣告度linkup埋《告白》嚟講,跟住呢套又linkup喎,做乜而家逢戲都要拉埋《告白》…係咪對片子質素唔夠信心呢?﹗即係呢,因為poster上提過吓《告白》係令我有少少反感而對部戲不感興趣的。

不過世事係好奇怪的,看點總是無啦啦而來…。某日行過書店見到台灣版小說…咦﹗個金毛仔咁熟口面?﹗望吓…吓?妻夫木聰喎﹗好似從來無見過佢金毛的說(訪台時佢都話這是佢人生第一次染金頭髮的說),同埋阿聰哥仔印象中都係做好少年的嘛,要做惡人又幾突破吓喎,好,我挑﹗

看戲前還未看小說,只簡單的看過吓劇情介紹咁。就係男主角不擅交際但又想搵個伴,就喺交友網度識了咗個女仔,而那個女仔本來係想釣金龜,金龜釣不成 仲要被男主角見到自己被飛的醜態,一怒之下惡言相向,男主角不擅交際嘛,唔知佢邊句真邊句假之下嚇到傻咗,就殺咗呢個女仔。同一晚男主角收到女主角的郵件,二人相見之下先激情後談情,真係遲來的春天啊﹗但男主角恨錯難返,本來想自首卻為女主角所阻,二人就無啦啦大逃亡,希望可以過多一日得一日…

故仔就係咁,ok老掉牙的…故事的presentation不如《告白》咁多揭露社會黑暗面(都有既,從被殺少女佳乃阿爸和男主角祐一祖母那邊出發),反而側重祐一和光代的偉大愛情﹗啊﹗真係驚天動地愛戀過了﹗也許寂寞得太耐的人難得遇到target戀火就不能控制(甚至飯都唔食一嚟就去open room…),就算對方係殺人犯都置之不理…愛情係盲目的嘛,總可以成立既…只係小的不能太理解,也看得不投入…可唔可以skip阿光代啲苦情戲呀?﹗

至於阿祐一,我想問係咪被媽媽細個拋棄的都會有成為殺人犯的危機?《告白》犯人A如是,祐一如是…噢…。雖說深津憑此片不停掃影后,但我對聰哥演出更impress,祐一很抑壓(我諗飛車係佢發洩的方法吧?),(我估)佢最初對佳乃並不是一味迷糊情慾對像,只是被她耍完一輪仲攪到犯上殺人罪先做咗惡人,偏偏個天咁玩佢要殺了人先遇到相知既光代…見佢返轉頭去光代屋企樓下攬住佢喊晒口咁話如果早啲遇到你就好…oh…很抽心的。但,我重覆,佢地段驚天動地的戀情很悶人,也不感人…我只想快快fw佢…

惡人明顯係殺了人的祐一,但其實佢又惡唔晒,佳乃係惡人,大學生係惡人(睇了一輪先肯定佢就係《告白》的熱血阿sir…),祐一媽係惡人,逼祐一祖母買中藥那群大叔係惡人(最後祐一送給她的絲巾掛了在佳乃遇害地點…呃?第一吓我以為係祖母跳落去死咗佢…),光代妹係惡人(佢同家姐的電話對話本來關懷 後尾就鬧佢俾麻煩…真係想打佢一鑊…難怪光代同個妹同住但都係咁寂寞…),光代都係惡人(我估,也是我估,祐一係想光代對佢死心所以要整死佢…)…

(看網上人家的心得,片子應該cut掉很多事前事後的情節,且看睇完本書我會唔會改觀啦…)

阿聰哥真係演得幾好呀﹗怎麼佢無乜credit的?個個都講深津繪理?﹗全套戲淨係得燈塔佢場有笑咋佢…(花痴ing…)((如果不是花痴mode開啟,應該會瞓著的吧…囧))

挪威的森林》(推銀度:5﹗但因為坐喺院的中間,打機不能…囧)
四部片我覺得至難頂就係呢部…(文章題目是顯示了對四部片的評分呢~)

首先我是沒看過原著的,雖然x年前中學時見同學在枱底睇時頗好奇…但一路攤到而家因為電影上映在的起心肝去看。

去看電影之前也是只看了劇情簡介,小說只看了幾十頁,只知渡邊和直子講起井的事情。

作為一個未看原著的人…即係呢…很多情節都不明所以…做乜渡邊同直子好地地…直子又無啦啦走咗去…跟住又殺了個眼神勁奸邪的阿綠出嚟…眼後渡邊又無啦啦上山搵直子…之後直子又無啦啦自殺…玲子又無啦啦搵渡邊…一夜溫馨後佢滿有自信的走人…啊…做乜呀?﹗

也許我真係感受唔到原著中「寂寞的哀愁」…我只感到「我極度想走」,所以小說是繼續睇緊,補元一下劇情不明所以的地方之餘,也當作是探討點解此書會是經典。

松山研一和玉山鐵二跟我對書中(104頁的進度)很吻合;演直子的菊池也許是我直覺上覺得她年紀比直子大了點點,不過她演出事前內向話不多的直子, 到出事後的歇斯底里都是很到位;反倒是演阿綠那位水原希子小姐…呃…乜阿綠唔係開朗少女咩?佢演到好似情婦想勾引男人咁喎﹗囧﹗玲子印象不深…反而是初美在吃飯那場令小的留有印象了…

我明白電影兩個多三小時真不能將所有劇情都present出來,而各支節誰重要誰不重要大家觀點與角度都不一樣…但…作為一個沒看過原著的人來說… 真係好肢離破碎(碎得仲勁過《人間失格》)…完全唔明啲前文後理(難道導演expect所有去看影片的人都有看過原著?名著都總有未睇過的人架嘛﹗)… 呃…可取的…應該是…啲道具做得很細緻,直子和玲子療養院的病房有個69年月曆…上面有隻雞﹗69年真係雞年喎﹗囧﹗當係睇番60年代末風情畫都幾好既…

卒之,片子做完時小的真係想拍手鼓掌﹗做完啦﹗可以去食飯了﹗

(另,很喜歡上圖雪中二人面貼面的相片…但呢一段我係頂唔順去了洗手間而skip了…囧)
***************************************************
又是鄰居的博文:《挪威的森林》與《惡人》

上篇:告人惡挪之上:《告白》、《人間失格》

4 則留言:

  1. 我真係覺得講呀光代見到家姐同男友鬼混, 黎表達佢心及身靈空虛, 所以同祐一見野就即去爆房個下, 雖然冇睇過好cheap 的三級片, 但覺得呢d 係個d 戲出現的橋段0羅. 好似有講下光代因為覺得自己返學又係個度, 返工又係個度, 年復年日復日, 所以識到祐一大家咁岩key 感動到爆. sorry 我真係唔buy. 我地個個都係咁過呢d 咁平凡的生活, 但不見得我地會見0左人一次面, 爆0左一次房, 就會爆出驚天地泣鬼神的愛情故事. 仲明知佢殺0左人, 仲同佢(通緝犯喎!)浪跡天涯喎! 其實成套戲諗番, 我覺得係一套笑片黎. 最搞笑d 人成日將呢套link up 告白.

    深津繪理, 除0左佢貴為演技大明星都肯放下身段拍呢 d cheap cheap 三級片之外, 我get 到有咩值得讚.

    挪威的森林, 入場前我己有心理準備係一套爛片. 當睇景睇松田研一, 都okay.

    25th Jan 2011 09:42 AM

    回覆刪除
    回覆
    1. 光代那個係阿妹?﹗
      書我未睇,唔知書入面有無交代光代係咪真係空虛得咁緊要,個反彈會咁大,一遇到個啱傾的人就唔理佢犯了罪,仲要同佢浪跡天涯難浪漫咁,呢一段我真係投入唔到,同埋都唔合理,佢唔係想搵個人長期發展嘛?﹗(雖然阿祐一夠誠實,都係優點嚟既…)…唔知呢,或者平凡開既人會突然想試吓刺激野,會有個反差喺度掛…不過我唔係太接受到…
      linkup告白或者都係話題性同埋女主角勁拎影后獎掛,兩本原著應該都係有啲社會議題喺度,但電影版《惡人》就減咗好多,得番段好似好偉大既愛情,er…我真係頂唔順…
      前日睇了少少《change》,深津做秘書可愛好多喎…或者光代佢都有演技既顯露既…但我覺得個故仔有啲不明所以,影后嚟演都減少唔到個雷味…
      《森林》我真係唔多受得住套戲,本小說睇睇吓都放低咗了…

      8th Feb 2011 12:05 PM

      刪除
  2. 挪威的森林我好鍾意本小說架!我睇完套戲之後我都要用返書裡面既內容補完,所以我好肯定未睇過書就睇套戲既人係唔會明個故仔up乜!

    小林綠係小說入面我最鍾意既角色,但係套戲拍唔出佢個深度,淨係拍到佢好淫咁……

    反而初美姊又真係拍得佢幾出幾靚,睇書果時唔為意佢,但係套戲又拍得佢幾有氣質 :-)

    29th Jan 2011 13:21 PM

    回覆刪除
    回覆
    1. 我覺得有啲前文後理位真係唔cut得,就算本原著係經典,預咗好多人睇過,但作為一部電影,無理由咁多暗場位攪到個故仔肢離破碎,都唔係暗示,係完全無提過,要靠睇過小說嚟補足我覺得係唔掂喎﹗
      小林綠睇書我覺得佢可愛好多,電影入面位姐姐仔做到好奸邪,唔知佢想點…
      直子睇得出菊池好努力演…或者我先入為主,硬覺得佢外型好難信服佢係20歲…
      所以眾多女角最好都係初美學姐囉…

      8th Feb 2011 12:08 PM

      刪除

要講幾句嗎?﹗XD