2010/08/17

水能載舟亦能…之信用卡

其實不獨是信用卡,想說的是信用卡引伸出來的財務問題…一諗到…就係呢個核突又難頂的show you the money...

(那位大叔…真係touchwood要借錢都唔選呢間囉…扮晒hip hop guy)...

事情是這樣的,這幾天看到這樣一篇報導然後昨晚再聽到一位聽眾在某電台節目中說她朋友左卡"come"右卡的時候,徐徐嘆了一口氣…怎麼現在借錢fing錢好像不是甚麼一回事?﹗

尤記得預科畢業最後一堂中化時,老師語重心長的說了很多,當中不外乎做人處事的道理,講了大半個鐘社會和學校有啥不同後,另外的大半個鐘就係說不要欠卡數。 係,係叫我們不要欠卡數,不要滾雪球,不要卡"come"卡…。還穿著校服望住黑板的本人想著「關我鬼事咩…」…不到三個月,在吾大學的迎新camp briefing,小的就填了人生第一張信用卡申請表了…

還未畢業,小的銀包已經袋住3張卡了…

現在回想老師當年一番話確係感觸良多。信用卡好處多(得不用我數吧﹗淨交水電煤夠準時已夠功德無量﹗我是常忘記交費的失暈魚…篤),但一念天堂一念地獄,一 卡在手貨可以先掃錢後交,這concept真係魔鬼到爆,對錢銀觀念不強而又把持力低的濕平魔(aka=我…)來說,每日就好像帶住個計時炸彈喺身,買的 一刻可能好高興,但回家收到月結單就…

發卡銀行為做生意為搵錢,在商言商多啲人出卡,多啲人碌,甚至好話唔好聽多啲人拖卡 數,收利息都收到笑,仲可以順手sell埋貸款…。想一想真係好恐怖,銀行撈生意做到無孔不入,有事無事寄張申請表給你開新卡,又不時打來sell你,然 後得閒無事又upgrade信用額,又送埋啲九唔搭八的優惠(身邊很多友人為禮品而出卡的…);…我在想其實佢地有無review過人家的還款能力呢…然 後…大學生又來一大餐joint venture,迎新營開始就先送一張給新鮮人們,入息戶口都不用check,真係諗住有grant loan或父母同佢地包底吧?﹗

危險不止是卡本身,現下興買野分期供,幾千蚊一件潮流玩意分期後只要幾百蚊個月,唔覺唔覺就每月座底要交一千幾百卡數,現後用埋自動增值發達通就更衰…0都一0都就250,條數都好襟計吓的…

好了,我自問是自制力不高的人,試過一輪全部卡都cut晒真覺無限輕鬆,買野次次都係現兜兜就就只能作有限度濕平,買野都會諗過度過,多好。所以呢,有人說出卡前應該為申請人作個心理評估…這個我絕對讚同,不過…應該沒商家同意吧?﹗

社會不知從何時開始變咗消費世界,好像無呢樣無那樣就唔得掂啦咁,一味買買買(但吾等就係靠鼓吹人家消費才得以糊口喎…篤),買唔起咩?簽卡囉,簽完還唔到卡數咩?﹗借錢囉,借完唔掂咩?按樓囉…。由信用卡到財務公司廣告,其手法將還錢淡化成極輕鬆的事,借咗錢之後再買過再洗過啦﹗然後廣告入面的借款人都笑 意盈盈的繼續身光頸靚,完全skip咗節衣縮食還錢的一part。每看一次都覺很恐怖,借錢不是應該睇自己還款力咩?洗錢都應該先睇銀包有幾多蚊先洗 架?﹗點解而家會變到今朝有酒今朝醉先?之後還錢的事好像完全不重要…而且廣告target越來越年輕…洗腦之下的年輕人該當如何呀?﹗﹗﹗﹗﹗

尤記得有次和友人傾計時,說起小的grant-loan就嚟還完,佢竟然問「你真係還架?﹗」…吓?﹗乜唔使還架咩?﹗囧﹗只能說…呢個世界係癲架﹗係癲架﹗

我在想,當年中化老師應該不止搖頭嘆息,係fing頭嘆息…

另外的:
(年代久遠到唔記得寫過…完全是duplicate的entry:)信用卡
 【小熊人擂台賽】13:信用咭

16 則留言:

  1. 你朋友好強,我以為欠錢未還的人多少有點心理壓力…

    17th Aug 2010 14:53 PM

    回覆刪除
    回覆
    1. 心理壓力這個是真的,硬覺得唔還晒個心會唔安樂…
      (我朋友講吓啫…)

      24th Sep 2010 16:25 PM

      刪除
  2. 仲有個廣告係有個女仔, 身邊有個"息魔"不斷禁止佢消費, 同佢講"唔準去玩, 唔準靚", 然後個女仔扁哂嘴, 就有人幫佢消滅左隻"息魔"...我覺得呢個廣告都好邪惡, 要洗錢就當然要慳錢ga la, 個廣告觀念好似要話畀人聽就算你狂消費都唔使驚ga, 搵人幫你重整卡數就ok, 可以繼續努力洗錢...錯晒lor

    17th Aug 2010 14:58 PM

    回覆刪除
    回覆
    1. 最近阿show u the money最新一輯廣告仲乞人憎,講到行街食飯買衫睇戲係天經地義,所以借錢去做呢啲事係好正常好應該,定力少啲真係好易信咗佢一套,再加埋有父母照住既話真係會肆無忌憚咁使…好恐怖﹗我越睇越覺得驚…

      24th Sep 2010 16:26 PM

      刪除
  3. 到最後比收數公司上門追數激到有心臟病既老豆爆血管死, 到時就知錯架喇.

    17th Aug 2010 16:02 PM

    回覆刪除
    回覆
    1. 我覺得同吸毒一樣,試少少無事既…跟住真係試少少…少吓少吓就成癮,救唔到了…

      24th Sep 2010 16:29 PM

      刪除
  4. 依家d財務公司廣告真係好邪惡,已經將人洗腦到好似借左錢唔使還嘅款.真係貪心/自制能力低d嘅人好容易中招.

    其實我好憎分期付款(就算係免息的都係咁話),因為成日都會諗住仲有幾多期?其實自己仲爭幾多錢? 囧

    17th Aug 2010 17:41 PM

    回覆刪除
    回覆
    1. 你睇吓show u the money最新一輯廣告…真係嬲到想打爆個芒…完全係justify緊先洗未來錢,行街食飯睇戲買衫係天經地義咁,唔夠使就借錢攪掂佢,好恐怖﹗
      分期都係好邪惡的,少少一二百咁一個月就可以搬咗舊野返屋企,分吓一樣又分吓一樣,張月結單就好襟計…

      24th Sep 2010 16:32 PM

      刪除
  5. 以前的信用卡, 挺難申請的, 所以, 自年輕就沒有先使未來錢的習慣. 嗯... 現在, 有挺多卡的, 但大部份都是雪藏卡, 甚至沒有簽名:P 我很少買東西的, 所以不會欠卡數, 而用了幾十年信用卡, 也從沒欠過. 銀行一定不喜歡我, 因爲賺不到我的利息:P

    17th Aug 2010 19:40 PM

    回覆刪除
    回覆
    1. 是嘛?咪就係囉,以前覺得白金卡係真係要好高年薪先會申請到,而家就係阿茂阿壽都拎得…
      我習慣係預留一筆錢for簽卡,其實即時pay都得…不過硬覺得啲錢擺喺自己戶口度開心啲咁解囉…

      5th Oct 2010 17:54 PM

      刪除
  6. 小熊人擂台賽10月31日先到期喎,你咁快寫定,睇嚟你勁到先入錢落張咭然後先去碌咭!!

    17th Aug 2010 23:08 PM

    回覆刪除
    回覆
    1. 你咪踢爆我啦﹗
      我係寫一篇先入去睇一次題目架﹗

      5th Oct 2010 17:55 PM

      刪除
  7. 我很討厭那個show me the money的廣告!!

    從前我爸爸也很反對我使用信用咭,不過現在信用咭愈出愈方便,也不能反對什麼了。

    18th Aug 2010 00:04 AM

    回覆刪除
    回覆
    1. 喺我出文後又有新版本了,仲要justify啲年青人飲飲食食花費係應該既,無錢就去借…睇完真係超反感…好有問題囉成個logic…

      4th Oct 2010 13:26 PM

      刪除
  8. 大學個陣有咭, 但冇簽架. 到岩岩出黎做野, 就會有兩個戶口, 一個戶口淨係用黎今個月洗用, 咁簽0左咭都會好認真咁係個個戶口度扣起, 轉帳到另一個儲錢都找咭數的戶口.

    咁而家冇啦. 因為應該唔會唔夠錢找咭數. 就算我不時失守, 都其實講緊幾百一千啫.

    18th Aug 2010 09:22 AM

    回覆刪除
    回覆
    1. 我而家個做法都係差唔多,活期同支票戶口,一出糧就找晒所有手電上網費和卡數,將其他預計既洗費轉晒去支票戶口,atm gum錢就只gum支票戶口的,活期啲錢就唔郁…
      我而家都限住一個月最多簽千五蚊卡,同埋我整咗個app嚟記低簽咗既卡數…以前我係從來唔會做呢啲野囉~

      14th Oct 2010 13:29 PM

      刪除

要講幾句嗎?﹗XD