再問典解：假豪宅

昨天看到馬沙一篇《論假豪宅》，嘩，這個也是諗極唔明想問典解很久的啊﹗﹗﹗

我一直傳統地覺得「豪宅」之豪在於身處優越地區，如半山、 南區像薄扶林(大口環道那堆呢…)、何文田呀等等…，低密度，視野廣闊(起碼不會望到隔離屋睇緊乜電視節目先吧？)間隔超寬敞舒適的，地點隔涉也不打緊，反而人少少更見寧靜啊﹗

不知從何時開始，屋村隔離係豪宅，港鐵站上面係豪宅，喺工廠隔離係豪宅，舊區重建又係豪宅，望到海望唔到海都係豪宅，求其有個會所就係豪宅，一堆屏風咁遮住隔離樓宇視野的又係豪宅…奇又奇在次次沽清，發展商也好像只會起這一款…

即係我好想知，炒家以外，以住為本的會考慮這種偽豪宅嗎？

行示範單位，見到屋入面鬼火咁靚的裝修真係睇到開心(梗係啦，我．無．錢﹗學乜人買樓﹗)，加埋成個promotion packaging，有一刻真係覺得自己置身個盤標榜的世界~曼克頓啊﹗六本木啊﹗歐洲宮廷奢華生活啊﹗我有一刻懷疑，話俾人知自己知喺呢啲地方會係個身份象徵。之但係伸個頭出窗，歐洲宮廷不再，滿街工廠都夠煞風景…

講開又講，以前啲屋苑名，不外乎「閣」、「苑」、「樓」、「村」、「花園」，勁啲野就「山」、「園」、「灣」、「臺 」、「城」；家陣越改越勁越改越令人一頭霧水， 「城中駅」係車站定屋蹳架？「一號銀海」…海…定樓嚟架？而之後又勁多「乜乜一號」…原來，華星當年的「禮頓道一號」走得好前，應該改裝做豪宅嘛﹗還有就是世界名地通通加進豪宅的名字中，仲一霸就霸了個「半島」，香港果然是"Asia's world city"啊﹗

「假豪宅」外的環境真的很煞風景，我常覺得駛唔駛起到咁高密度呀(咁一次過有多啲單可以賣嘛…)。裡面呢，我又真的很懷疑會所重要的咁緊要嘛？個個假豪宅都話自己有個點勁點勁的會所，實在羊毛出在羊身上，管理費不就是相應增加了嘛…另一個唔明，就係俾咁貴呎價，間隔又唔見得特別見使，周圍都係窗台陽台，orz…要遷就這些奇怪的間隔，不就是要在裝修上下番苦工，嘩…又駛多筆喎﹗

睇嚟啲盤既宣傳又好得意。首先我唔明點解吓吓都要搵環球小姐，實在有多人知應屆環姐係邊個(港姐都未必知啦…)？我又懷疑佢既宣傳效用…可能同普通model不相上下…。其次，就係點解啲promote都係用洋模呢？﹗難道外國人才更曉「拉夫史大奧」的真締嗎？但我又覺得，真係住慣外國既人，要適應香港逼逼貢的生活環境都幾係野的…(對我而言)其實都好唔appealing吓的。同時，我又計數了，那些舖天蓋地的宣傳筆直咪又係羊毛出在羊身上…但…個宣傳唔會令我間屋靚啲架喎…

唔通「假豪宅」起出嚟係滿足未有錢去住傳統豪宅區而又想試吓住豪宅做有錢人感覺既人呢？

其實小市民如我還不是想有個瓦遮頭安居樂業吓，十幾廿年前起落的居屋就啱我心水啦…