卡拉永遠ok之我的唱k之道…

有時覺得唱K有少少無聊：幾個人逼在又黑又小的房裡，不停按搖控選曲，幾對眼望住電視引吭高歌，忍受k場難頂的煙味(奇在明明禁了煙仲一陣煙味囉間房…)，吃難食的食物，逼逼夾夾的「玩樂」幾個鐘…

然而，卡拉又真係好ok，試問還有那兒可以一次過塞一大班人兼有得飲有得食，又可以我們釋放潛在表演慾…需知，有咪喺手既滿足感係比在廁所手握花灑高歌高很多的說。

我的家族是廁所歌王，行入廁所就好像入紅館咁，不其然放聲高歌，無論當時正進行甚麼工程。

步出廁所就變另一個人了。基於本人怕瘀皮，從小都不敢參興甚麼合唱團，更不會屈服於長輩魔掌之下高歌娛賓(本人從小就很有性格的說…)。我諗小時候的我是萬萬想不到，只會在廁所(及無人時)高歌數曲的本人會在K房唱到唔捨得走…

經多年訓練，曲目大致上有個固定模式：

一坐低~新歌試唱

這是試聽環節，update時下最新曲目。實在這是暖身而已--因為點的食品通常很快送來，大家都忙著食食食，邊個得閒唱？這時候當然是點些可唱可不唱的囉。

以人為本~個人演唱會時間

經過一輪新曲試唱開聲，又飲飽食醉，當然是上正場的時候。呢個時候，大家輪流點飛佛歌手的曲目，不自覺跳出新曲試唱版。通常喺呢個時候，人家點了歌曲甲會引發另一個人點歌曲乙，呢啲時候會聽到好多滄海遺珠，亦是大家交流飛佛新曲情報的時間，是很富教育意義的說。

看 這些不太熟悉的ktv時，會驚奇的發現很多熟悉的面孔…本人就係咁亂點點到王馨平的《寒冰》…古天樂先生當男主腳的ktv啊﹗爆笑得本人每次都要點來笑笑…琴晚去唱發現蒙嘉慧兩支舊ktv(唔計上次發現和古天樂合演的草蜢歌)，佢當年很sharp，好似仲sharp過而家…

瘋狂時間~懷舊金曲夜

每個人心中都有飛佛song list，唱到咁上下，大家聲唱到有點拆，又飯氣攻心開始想瞓，就不再介懷音準不準，會狂點舊歌狂笑一番--目標包括騎歌、大合唱、合唱歌、經典金曲，這時候，有些人會癲咗咁放縱狂歌，有些人會面色慘白，望住狂歌的人小聲說：「呢班人係咪癲架…」…

寶物尋歸底，好歌永遠都係最後先諗番起，到點咗等唱時，往往已版cut掉要執野走人，人生就係咁，誰會珍惜當你還擁有…將會逝去總想挽留…
***
卡拉ok的偉大，就在於滿足了我等一班怕瘀皮但又有少少表演慾但又不會發明星夢的平凡人滿足唱歌表演的癮。手執咪高峰和花灑感覺真係兩碼子的事，是會上癮的說。

自小本人就覺自己聽自己把聲很怪，做oral練習要錄低自己把聲，聽番會打冷震。唱K拎住支咪將自己把聲放大，更覺得有十萬個怪，告訴你，起初我是不大敢拎咪唱的說，而且不敢點女仔歌專點男人歌(但唔啱聲…)，或者要求伴唱…

話說呢，中學時幾位K腳都是choir出身音樂人，同佢地唱係幾有壓力的說，本人怕瘀皮嘛，當年出發前係有喺屋企認真的練一練的說…

自唔知幾時開始衝破呢個瘀皮枷鎖，就理得佢死起音樂跟住唱；唔走音，讚自己(暗地裡)一野，走音，噢一個咀，就係咁，其實也不會太認真。也許有人會視k房為show off唱功之場地，專點以難唱聞名的非k歌來顯身手，高音低音又越過高山又越過谷，身處房中仲以為自己睇緊《張偉文唱好女人演唱會》…orz…亦無不可丫；見到這些認真的k精，大家自不然唔敢拎咪合唱…好似阻住人家表演似的…唯有，吹水點歌去廁所囉…

本人多數點飛佛的曲目…多數是side cut囉，自娛嘛﹗我唔理人感受的說，哈哈。於是，本人的曲目通常無人同本人搶咪，亦成為大眾廁所位，尤其是唱日文歌時(這個真係要睇k腳，免得悶親朋友…)。一個人對住個芒唱確係幾無聊，不過，我會好似啲歌手話齋得番最後一個觀眾都會繼續唱﹗(瘋了…)

k精最高興就是點了心中飛佛遇上知音，原來呢首野除了自己還有其他人欣賞﹗特別是怪歌，遇上會點騎呢歌瘋狂合唱的就high翻天﹗都唔知好彩定唔好彩，無論 去到邊總會有幾個騎呢歌精，奇怪(in terms of ktv拍攝手法、人腳或歌詞…)歌總是長講長有，大家一齊睇一齊笑到肚痛，實為k房最大享受~

其他文：
日K．唱得起
唱K納雜言
我的熱唱金曲
我們的九十年代~1