周星星飛佛五大

之前寫過篇關於《家有囍事》，意猶未盡，再講﹗

國產零零漆

金曲：惱春風我心因何惱春風，說不出，借酒相送，夜雨凍，雨點透射到照片中…

曾幾何時，我以為《大內密探零零發》係《國產零零漆》既古裝版續集…但其實係無關係的…呢套野，打從一開始個扮鬼佬007片頭就笑到尾，睇親就自動波不停背對白：

• 你憂鬱嘅眼神，唏噓嘅鬚根，神乎奇技嘅刀法，同埋嗰杯Dry Martini，都深深咁將你"chut"賣咗… 
• 我都係鐘意你叫番我全名達聞西…好呀聞西…無問題呀聞西(小時唔知兩位主角個名都係粗話…扮時成日俾大人鬧的說﹗﹗﹗) 
• 最近係精神病院做緊研究工作。研究啲咩？俾人研究(呢個都係成日扮的…哈哈…) 
• 先生你住既係麗晶大賓館，唔係麗晶大酒店 
• 一條底褲一張廁紙都有佢嘅作用
• 太陽能電筒
• 古惑的槍(這是惡攪《逃學威龍》善良的槍嗎？)
• 佢表面上個風筒，但實際上都係一個風筒
• 攞你命三千(諗起《食神》入面七種武器之首：摺櫈﹗)
• 司令：嘩…你做乜成身血…阿琴：無…我刷牙流牙血…
• 鐵奶罩女殺手(陳寶蓮)高溫火焰(謝小球提供)無gas…因為之前有人煮公仔麵無refill番…

不用講太多，淨係打番啲爆笑對白出呢都令我陰陰咀笑…但見《國》係周星星個人表演，不如《家有喜事》得三份一表演時間，嬴個馬鼻，穩守番睇龍虎榜首位﹗

家有囍事

金曲：相逢何必曾相識，在這一息間相遇有情人，也許不必知道我是誰，無謂令你令你令你令你…留給你…請珍惜這段愛情…也許一天可以既話…

這套戲的精妙之前已讚美過，此處不贅。

百看不厭的電影…

整蠱專家

金曲：我要努力向上，不枉諸君寄望，我要努力向上，定令全人類也滿心歡暢…

周星星大戰劉華，《賭俠》劇情離不開賭片formula，個人熱愛另一套《整蠱專家》多啲，貪佢啲整蠱技倆新奇刺激，一開始整蠱成奎安已笑到我不行…救命。不知何解我極記得邱淑貞角色叫"Banana"，仲有佢句「鍊到你條頸筷子咁幼」，係我小時口頭禪…(我小時已咁吸收周星星對白…唔怪得讀書唔成囉…)

發現那水啲戲套套都咁上下人腳，又成日一橋多用，周星星和劉華，就差唔多時間拍了《整》(91)和《賭俠》(90)…crossover的仲有… 

我嘅真正身份係，改進社會風氣，風靡萬千少女，提高年青人嘅內涵﹐刺激電影市道，玉樹臨風嘅整蠱專家古晶，英文名叫Jing Koo。 

《賭俠》陳法蓉的角色，中文名叫「龍九」，英文名叫"Kowloon"
整蠱之霸(程東)於賭聖/俠系列度係有特異功能的中南海高手… 

《整》中吳猛達聽到爸爸會失控，《賭》series度吳猛達都有呢個病…但唔記得係乜…(要返去check番先…)((18/2/12後按：應該係被叫三叔…))

而那些整蠱道具：「誠實豆沙包」、「謊言豆沙包」、「慚愧波板糖」和「淫賤不能移」(呢個好似又係幾套戲都有用的說﹗)更係精髓所在，當年本人又係背誦如流，後來《唐伯虎》中的「一日hum苞散」和「含笑半步釘」頗有以上整蠱道具的古裝版風采。不過最一流的整蠱技藝，莫過於古晶趁整蠱之霸洗頭時將洗頭水轉做超能膠…攪到佢對手癡實個頭…

我小時係有諗過實行呢個整蠱大法的說…

唐伯虎點秋香

金曲：燒雞翼，我鐘意食…但係你老母講你就快釘…越係快釘之所以越要整多隻…如果而家唔食以後無機會再食﹗你真係就快釘？我真係就快釘~~！如果而家唔食以後無機會再食。

上面呢首歌曾幾何時係本人電話鈴聲…(小弟曾經用過《賭俠》中周星星一曲「逝去感情如何留得住，半點痴情遺忘殊不易，更多悽悽慘慘的遭遇，我不知道…」做鈴聲…但要趕緊在最後一句唱出呢之前聽電話…因為…那是句粗口﹗哈哈哈)

金曲又點只一隻，華安同夫人互相介紹毒藥「一日hum苞散」和「含笑半步釘」，配上耳熟能詳「京x念x奄」廣告歌，十個好笑的。雖然，論好笑度當然係華安和對穿腸對對，同埋太師發爛渣高啲。

一開始既江南四大才子…陳百祥、吳鎮宇、陳輝虹只係出一出(除了叻哥的角色在求唐伯虎出手整幅畫俾佢時出身又出力…)，仲等我對佢地鬼咁有期待…。同埋呢套野好多無記人，有梁榮忠(佢喺另一套…《白面包青天》定《九品芝麻官》？)((18/2/12後按：《九品芝麻官》咪《白面包青天》囉…點呀…))、宣萱、黃一山、李家聲和當年應該仲未入tbb的金輪法王劉家輝﹗好無記的陣容啊﹗

到而家我仍然覺得鞏俐和周星星的風格十個格格不入，那一水除了《唐伯虎》仲拍咗套《上海灘賭聖》…或者就係鞏俐一副正經樣出現喺唔正經既劇情度…效果先夠爆笑…尤其是秋香去搵華安確認佢就係唐伯虎之後，好似粉絲咁不停問佢鐘意食乜/顏色…

實在呢，呢套野因為太多粗口，初初媽媽唔俾睇的。後來先買vcd睇番，那時都講緊高中lor，所以排行較低。

西遊記第一百零一回之月光寶盒、西遊記大結局之仙履奇緣

金曲：Only you, can take me取西經,ohhhh only you, 能殺妖精鬼怪,碰到釘咪驚,我under史釘,要全力地去do...要驚就兩份驚...喃嘸呵彌陀佛...

呢套野上映時坊間劣評如潮，有人話睇唔明，有人話唔知佢做乜，有人話唔好笑。上正場時我無睇，我係x年後買番vcd來看，我覺得好睇喎。係咪因為至尊寶一段唔關《西遊記》事？定係一時五百年前，一時五百年後時空交錯太複雜？定係要睇上下兩集太辛苦呢？

睇《無間道》最後一集都有人話唔知佢做乜，真的嗎？

《月光寶盒》基本上都唔覺自己睇緊《西遊記仙履奇緣》就明晒，oh，原來係咁。成套野，最欣賞唔係惡攪《重慶森林》反成經典對白既「如果係都要喺呢份愛加上一個期限，我希望係，一萬年。」…反而係羅家英既唐三藏，佢真係好煩，但又好好笑…(後知後覺的我，後來才知原來《零零漆》一開始阿漆在閣樓梳頭是惡攪《阿飛正傳》梁朝偉…)

首先當然係樓上首《Only You》，爆笑度高過《少林足球》入面既《California Dreaming》好多…

做咩呀﹖你愛呀﹖你愛要出聲先得架，你愛我比你，你唔愛我當然唔會比你啦！無理由你話愛我唔比你，你唔愛我比你架嘛！大家講道理丫嘛！拿，我數三聲，你話愛唔愛喇喎。(呢個鈴聲我有啊﹗)

就算係妖，只要有咗仁慈既心，就唔止係妖，係「人妖」…

笑到斷氣…(14/02/13後按：新的《西遊．降魔篇》)
*******************************************************************

我愛周星馳

熱愛周星星的朋友真係要煲一煲呢本書，好多戲入面好細微的gag位都有提到，不得不佩服呢班台灣星迷﹗只係可惜啲對白台灣化了，如果係原裝廣東話版本就更精妙傳神﹗

唔知幾時會有本香港粉絲版本呢？﹗

另一篇：[港劇]軟硬天師《黑白彊屍》