[韓劇]第一次煲韓劇~《狗與狼的時間》

朋友知道本人在煲這套都不期然問：「乜你睇韓劇架咩？」

唔睇架，只係某次在有記轉台時唔覺意睇到少少，竟然覺得幾好睇，就追下去囉。呢啲動作+黑幫+情仇劇很得本人心的說，難得無韓劇幾大悶人絕招如：絕症、情人是兄妹…等，感覺良好。

故事大綱可看這裡。簡單呢講就係一個好仔如何混入黑幫執行任務，過程中和兄弟、家人、情人反目，內心交戰，又與敵人惺惺相惜，不禁疑惑自己所信的是對是錯…

劇名《狗與狼的時間》原是來自法文，意指當太陽西沉，天空紅色一片，沉沉的看不清真相，有如人亦分不清善與惡。此劇主角如此，徘徊忠與奸之間，一時純如狗， 一時惡如狼，沒有絕對的黑和白。黑幫奸佬、國情院部長、餐廳老闆個個忠奸身份亦轉來轉去，總知不能下定論對方是狼是狗。

這個就更令人看得著迷囉。本人可最怕劃公仔劃出腸的戲。呵…

上網睇資料，說原來製作單位特意拋開韓劇最動人的情愛元素，反而玩硬橋硬馬--極多動作和危險場面，而且由主角們親身上陣，出來效果確是緊張刺激﹗話實，本人很久沒試過睇戲睇到「登」主角肉緊…有人說這套野抄美國《24》、《CSI》，我沒看過不知是真是假，不過這劇頗有90年代無記紀律部隊風格，那些打鬥 場面和開極都仲有子彈的槍，最似。

實在有啲位熟口熟面的：

• 《緝私群英》(我最愛的臥底片~雖然王喜做臥底只佔幾集戲…)~好仔變臥底/被同事和女友發現繼而有誤會/女友發現男主角臥底身份/臥底懷疑自己價值觀/臥底親手殺大奸鬼
• 《雷霆第一關》(王喜劇中做臥底方程式和《緝》是一樣的…)~臥底做臥底時女友被兄弟追了/任務期間爸爸死喺自己眼前
• 《射鵰英雄傳》(我知這個有點無聊…哈)~認賊作父﹗﹗﹗/報殺父之仇
• 《無間道》(少不了這一套囉…)~兵和賊各在對方安排了臥底
• 《豪情蓋天》(除了我堅信無理由可以從祖國北方單靠貨車運軍火返香港，這套是不賴的電影…)~臥底發現奸鬼的優點/兵一方不信任臥底
• 《門徒》~臥底完成任務後唔恢復身份，繼續做臥底…

實在這是部節奏明快，好些父母之仇、三角戀有婆媽潛在危險的劇情都沒花掉太多篇幅，明快得仲快過無記劇，緊湊劇情令人欲罷不能要煲晒為止。直令本人對韓劇改觀﹗

第一集是倒述主角童年劇情，我是看了一會才知主角是李準基，十分之偶然。之前(也是一個偶然…做乜呢水咁多基哥既演出上檔？)看了電影《初雪之戀》， 他的超齡高中生有點勉強…個人覺得。這回他的角色切合他真實年齡，順眼多。而角色內心變化複雜，難度高很多：先是寄居母親朋友門下的好仔&國情院新人，之後是背負血海深仇的臥底，然後是失憶(都係要娘一娘﹗)奸人助手，最後是半黑不白臥底；據報導說基哥是想憑這個變化萬千的角色一洗之前《王的男人》陰柔形象…那套我沒看過，只是常從報紙看到劇照…都夠先入為主了。看罷《狗》劇覺得確係一個大逆轉，我諗清爽短髮和筆挺西裝幫咗佢唔少。可能係角色設定，前段正派戲份無甚特別，可能基哥既單眼皮鳳眼邪氣滿滿的(個人觀感)，中後期角色因失憶而性情大變，做出很多本來唔會做的瘋狂行徑，那個邪氣眼神實在是十萬個配合，那段本人看得印象最深囉﹗

睇了啲《王》片的劇照…實在…umum…靚唔靚真係見人見智…《狗》劇呢，越睇越有馬浚偉+吳尊的感覺…奇…為了驗證，我決定以身犯險睇《王的男人》﹗哈哈…

另外兩位主角鄭東浩和南相美都唔識…倒是劇中的鄭部長，個樣有點似《蛛蛛俠》的綠魔…一行出呢估佢唔係奸的都肯定有做衰野。

無聊題外話…紋咗身仲可唔可以返國情院做情報員呢？劇中個紋身應該係永久那種喎？(我又在留意無聊野了﹗哈哈)同埋這個不是《惡男宅急電》的智能紋身，有時基哥著短袖tee時都見袖口位有少少紋身尾突出呢，認真咪就係呢啲位囉…《惡》那個係成背脊…唔知劇組係想慳錢定慳時間所以智能地令個紋身消失咗呢？
*********************************************************
2007年本人口味可真夠亞洲化，除了一貫追開的日劇和偶然睇一睇的港劇，仲煲埋台劇(只限某藝人的作品…)和韓劇(暫時只睇了《狗》一套…)…

睇完套韓劇…發現…原來韓文好些詞語發音幾似日文的說…