尊尼's Entertainment(14/3/14 Update版)

話說呢，我一向對這間事務所很好奇，明明叫「事務所」，但其晉升制度、演藝訓練明明就是所藝人訓練學校，廿幾三十年來點石成金，真係「偶像工廠」了﹗屹立競爭劇烈的日本藝能界多年，各方傳媒都要敬它三分…嘩…

好奇心一起，且看多年來尊尼捧過啲乜偶像：

2014新加續篇：讀書報告＃27～尊尼's Entertainment Vol.2~上
 
 近藤真彦

80年出道，人稱"matchy"，睇番舊片，那年代的佢穿著緊身褲，將西裝外套捲成七分袖…好係而家啲男歌手既打歌服啊﹗真係走得很前呢﹗歌，都係後來睇《FNS歌謠祭》回顧/《Johnny's Countdown Live》後輩翻唱的。最識的一首是《ギンギラギンにさりげなく》(1981年9月30日)，舊片段中纖瘦的他搖住有線咪fing來fing去的勁歌熱舞，真係有別於當年個個一碌木咁企係度既男歌手架﹗唔怪得瘋魔咁多少女…

小時候我常將他和田園俊彥撈亂，攪不清誰是拍《前程錦繡》那個…umum…(其實係中村雅俊， 這套我沒從電視看過…攪不清…)。後來看雜誌知他和中森明菜/松田聖子的一段情，睇睇吓，原來他和梅姐都交往過的說…不知是不是因為梅姐改編過他的歌成 《夢伴》和《夕陽之歌》呢…話說佢近年將事業重心轉至賽車，於是每到F1比賽時候，有人訪問堂本光一總不其然會見到Matchy哥…

睇資料，說96年他因為演唱堂本光一主演之日劇《銀狼怪奇檔案》主題曲《午夜推移》，大賣百萬張，是為演藝事業第二春…諗諗吓先記得…係喎…那首主題曲係佢唱的…

J-STARS(個人藝人)

• 内海光司
• 岡本健一
• 赤坂晃 <--這個曾是光Genji成員…
• 佐藤アツヒロ

 這幾個不太認識…

少年隊 錦織一清　植草克秀　東山紀之

1981 年出道，這隊算不算得上是第一隊group？(我諗之前有既，係我未搵到出呢﹗)呢隊野到我聽日文歌時已淡出咗，只係睇《The Chef》識東山紀之，另外兩位真係講唔出個名…阿，東山大哥現在仲有拍劇唱歌(右邊的是他們的新單曲﹗)，之前的《美食偵探二》仲同同劇森田剛一齊出了隻碟，都幾活躍；講開又講，據說東山大哥係社長指定繼任人…又據說…他快和女友內山理名結婚(08年按：散咗了…)…又據說…東山大哥也指定了堂本光一為佢下一任…又據說…

「少年隊」和Matchy一樣從《FNS歌謠祭》回顧/《Johnny's Countdown Live》度識的(我未有咁神BB仔就識聽日文歌掛？)，所以只係識最hit的《仮面舞踏会》(1985年12月12日)和《君だけに》(1987年6月 24日)…不再少年的「少年隊」三人每年都會在Countdown Live以一身白衣，跳著當年一樣的舞情深地表演《君》一曲，身後的大芒又總會播著少年年代他們的片段，呀，不禁令人感概時光飛逝呀﹗

シブがき隊(苦柿隊) 薬丸裕英　布川敏和　本木雅弘(已解散…)

1981年結成，1987年解散，唔好問我邊個打邊個，我連識的本木雅弘都認唔出來…

本木個名係咪好熟呢？咪係「由頭發放至yeah色彩」(Gatsby)那個囉﹗原來佢曾經係過Johnny仔…

呢一隊有過咩金曲？唔知喎…不如唱番「由頭發放至yeah色彩」先啦…

16/3/16後按：我終於睇本木哥的《命運之人》到第4集啦﹗最印象深都係《禮儀師》…

光GENJI 大沢樹生　諸星和己　佐藤寛之　山本淳一　田代秀高 (已解散…)

同樣不要問我邊個打邊個，認唔出﹗

1987年6月25日(我生日啊﹗)結成，1995年解散，和上面的組合一樣都係睇回顧和Countdown Live識的，Johnny仔至愛唱佢地既《パラダイス銀河》，少男味滿載。最勁既係佢地全部都係roller少年，全部踩住roller又唱又跳，好神﹗

話說，初入社的Kinki就係為光Genji伴舞的了﹗而光Genji每年Countdown Live都會出現，不過唔會踩晒roller啦，多數係medley時和師弟一齊唱吓歌咁囉﹗

SMAP 中居正広　木村拓哉　稲垣吾郎　草彅剛　香取慎吾

1988 年4月結成，1991年出道。可能係90年代香港哈日風潮既先鋒。然而我係到《夜空ノムコウ》（1998年1月14日)才開始認真聽佢地啲歌(癲到買了演唱會碟和handband紀念品，真的很精美啊﹗)，順帶欣賞埋《Fly》(1999年6月23日)，到現在為止，最欣賞的都係呢兩隻歌﹗(我係會被廣大SMAP粉打？﹗哈哈)

實在很難形容SMAP係一隊乜風格，初出道佢地好似光Genji上身咁踩晒roller，排骨六人組(初代仲有位成員，後來去咗賽車…)又唱又跳的；隨著成員年紀漸長當然不再作此等驚嚇紮紮跳行為，遇著中慢版就來個結他和唱，快歌就一貫的勁歌熱舞(好像全Johnny's都係這個風格？)。據說，中居和木村一直爭做隊中Leader，是真是假就不得而知，但我可以肯定，唱得較唔掂(這個講法極厚道…)的中居確是下過一番苦功，五人同台跳舞，中居先生「特別」投入，肢體動作比同伴誇張一萬倍，拍埋一齊睇幾好笑架﹗(發現了我對萬人迷全不過電無？唔好打我呀…)

TOKIO 城島茂　山口達也　国分太一　松岡昌宏　長瀬智也

話說，這隊野最初叫「城島茂バンド」(城島茂&山口達也，1989年)，後來改組「TOKIO BAND」(1989年～1990年)，再後來加入国分太一、松岡昌宏和已退出的小島啓變成「TOKIO」(1990年～)，1991年長瀨智也以Junior身份加入作「support」(？﹗)，1994年正式出道時小島啟突然退出，長瀨被納入正式成員。

嘩，一匹布咁長﹗係咪因為呢隊野以band型式，以搵齊玩掂咁多款樂器的人難啲呢？﹗

對此隊的印象就係一隊火雞--話說02年勁歌總選請來TOKIO五人做頒獎嘉賓，當年佢地身穿「華麗」的鮮紅歌衫，一條二條黑色羽毛做裝飾，這個「華麗」風夾在一眾港星中令本人極有印象﹗之後看《紅白》/《FNS歌謠祭》(買旺角老翻碟，時間上這兩個節目應先於勁歌總選播的)時，發現他們又穿上這套「火雞裝」﹗﹗﹗ 看過《巨星夫婿》(譯名不一好像是本博特色？﹗)和一水無記有過的《Johnny's Hour》中的《メントレG》後…呀，著便服個樣係正常好多…

歌呢，我係上年的《Harvest》大碟才認真聽，係長霸ipod replay榜其中一張，唔錯架喎﹗真係火雞不露相，露相非火雞。(其實本人到而家都係唔太受得住呢個華麗風…)


V6
* 20th Century 坂本昌行　長野博　井ノ原快彦
* Coming Century 森田剛　三宅健　岡田准一

1995年出道。睇資料先知…V6的"V"是指Victory、Veuns、Varitey、Volleyball(？)等的意思，同時也代表Vicycle及Veteran。吓？

話說，當年《Johnny's Hour》除了膽既《堂本兄弟》(曾經仲有《Love Love我愛你》﹗)外，還會有TOKIO的《メントレG》或V6的《VivaVivaV6》(讀親呢個名都有人以為我癡脷根…)，個人對V6的期待度較高(雖然當年我只識森田剛和三宅健)…光是長野博那個「長野之奧運」…以能人所不能的方法去打破各項運動的世界紀錄…夜媽媽笑到我收唔到聲的說﹗就係睇呢個節目，片尾係咁播《Feel Your Breeze》(初初聽我聽咗grease的說…好驚…)，又唔錯喎，就係咁買咗佢地隻碟啦…後來才知原來係《我Miss係大佬》主題曲…

三宅健…究竟係咪同安室一齊呢？人家井之原都同瀨戶朝香結婚了…係咪呢係咪呢？﹗(八掛…)((22/2/12後按：無下文了…據說…))

KinKi Kids   堂本光一　堂本剛

1992 年結成，1997年出道。初時曾以「ジャニーズ関西組」、「堂本ブラザーズ」、「W堂本」為名，玩Twins概念比Twins更徹底，同樣來自關西，同姓堂本，同年出生…勁﹗不過，二人係無親戚開係的說。雖然真係有好多人分唔到佢地邊個打邊個…繼續問我邊個係「堂本剛一」…都唔知點答…

此隊又係「華麗火雞」組組員，開concert時一開始的衫總係大大件，方便佢地極速轉裝，究竟有無人可以話我知那件野共藏了幾多條褲和幾多件衫呢？近年好像少了，連早年的「fe」衫露胸都少了，concert啲衫真係靚咗好多…

話實，兩位老哥近年好像有點貌合神離，唱歌你有你唱我有我唱，傳媒多次吹風話會拆夥；不過我又覺未必，一來二人係出道以來oricon每張single首周冠軍健力士紀錄保持者(但據說B'z有更多，只係佢地無報健力士而已)；二來一隊如日中天的組合拆夥，會否引發其他組合大地震呢？不如研究吓Twins應拆還是合吧…

本來不止single，大碟都係出道以來張張冠軍的說，但02年被步姐的《rainbow》打斷了…最慚愧…那張《rainbow》我有買啊…

嵐 大野智　櫻井翔　相葉雅紀　二宮和也　松本潤

1999年出道。當年我以為出道的係瀧澤秀明的說，因為本人無追開Junior之故，呢五位哥哥仔，只係睇《我們的勇氣未滿都市》而識松本潤，其他的？唔識(實在人家都係Jr入面人氣絕頂既…維基說)…

我懷疑，佢地每次打歌都只穿打歌服，唔係花花西裝就係大縷長boot的，唔只Countdown Live喎，每周音樂節目都見佢地著到行一行的上去，勁﹗

大野智(左上，搭住二宮和也膊頭那個)，我曾經覺得佢好似一個已退出的樂壇女新人…但而家睇番又唔係好似…umum…


タッキー&翼(瀧與翼) 滝沢秀明　今井翼

2002年出道。我諗唔只粉絲，瀧仔本人等出道都等到頸長，不過時機既野一去無回頭，妹妹仔會唔會等三年呢？呀…當然，二人出道時反應係好熱烈既，硬係覺得攤凍咗。

實在90年末出道尊尼仔都幾慘，動不動就被冠上「木村」接班人名字，當事人心理素質無論幾好點都有啲壓力吧？最慘既係，藝能界既野不見舊人哭，只見新人笑；今日被冠上這稱號，明天傳媒又冠到別人頭上去…呀…人情冷暖呀…

每年看Countdown Live時聽著タッキー&翼表演時不免感概…聲勢真係不復當年啊…(2/3/12後按：講咗咁多年，今年終於正式睇咗套明仔演的劇了：[日劇]很《魔王》的…《オルトロスの犬》(雙頭犬))

NEWS 山下智久　小山慶一郎　錦戸亮　増田貴久　加藤成亮　手越祐也　

2003年出道。我有懷疑過是前一隊人少關係，所以組新組合時就玩人多勢眾，強烈覺得係要群星拱照山下智久，一於有殺錯無放過。一開始組合是九個人，後來一個退出，二個各因犯事(好像是未成年飲酒)而被雪藏，現下是六個人，不過我都仲係未認得出咁多個…呀…其實，本來本人無乜留意佢地，係接二連三犯事新聞才留意 吓，喂，佢地喺countdown tour度都好華麗風架喎﹗(望一望Johnny事務所背景，原來喜多川最初係諗住整歌舞團，後來先演變成藝能事務所，唔怪得啲歌衫咁華麗火雞啦﹗)

扯遠了，都因為我沒太留意這隊的歌，雖然我幾鐘意睇山p啲劇…哈…(22/2/12後按：出師不利連走兩人之後，上年再有山p和錦戶亮離隊，呢隊野都好邪釘吓…)

関ジャニ∞ 横山裕　錦戸亮　渋谷すばる　村上信五　丸山隆平　安田章大　大倉忠義

2002年結成，2004年出道。只在Countdown Live度睇過佢地演出，據說係走逗人笑路線，但個封面好正經喎？

識的有兩個，演《拜啟》二宮和也小師弟的橫山裕(實際上佢大過二宮的說)，和麻生同學錦戶亮(佢竟然同時身兼兩組…勁…)

KAT-TUN 亀梨和也　赤西仁　田口淳之介　田中聖　上田竜也　中丸雄一

2001年結成，2006年出道。又係一隊等到粉絲頸長先等到佢地出道，結局和前輩完全相反，隊員越多花邊新聞，碟反而賣得越好。友人說他們外型mk，但這就是他們最大本錢(這和好少年路線的News相反…)，開宗明義壞的說。反正男人不壞，女人不愛呀，雜誌調查，這隊除了殺少女，還殺埋OL和家庭煮婦，夠神吧﹗

讓我扮熟一下，其實我好早前就留意佢地架啦(這是扮的)。話說2001年時堂本光一先生主持音樂節目《Pop Jam》時有個solo環節，最初是一堆Jr又跳又唱的，後來就出現一隊專屬舞伴，就係這隊啦。同年光一先生主演的《沒有天使的街角》有田中聖喎，不過當年佢個頭盔頭好唔得，有點趕客。幾年後見呢班didi正式出道，士別三日確係刮目相看(感覺到我很buy他們嗎？)

((22/2/12後按：本來小的頗喜歡赤西仁哥哥的，不過佢無啦啦走去學英文唔見人半年，跟住返嚟又話進軍美國，之後又話獨立又乜又盛…而家又話同黑木美莎結婚，鑊鑊新鮮鑊鑊金，唔知佢想點…呃))

(((4/7/14後按：田中聖也沒有了…噢…)))

((((16/3/16後後按：又走一個了…我很傷心…))))

Hey! Say! JUMP

* Hey! Say! BEST 薮宏太　高木雄也　有岡大貴　伊野尾慧　八乙女光　
* Hey! Say! 7 岡本圭人　山田涼介　中島裕翔　知念侑李　森本龍太郎
這個我不認識啊，九字頭出世的小朋友…嗚嘩…(22/2/12後按：因為韓風而癲咗咁睇埋10年日劇《原來是美男》就知道八乙女光小弟是誰了，同時再睇《雙頭犬》…佢由可愛((疑似))的勇氣君變成印水紙紋身壞小孩真係好O咀﹗怎麼啦﹗忍唔住想笑…)

NYC   中山優馬 山田涼介 知念侑李

不知道是甚麼…

Kis-My-Ft2    北山宏光 藤ヶ谷太輔 玉森裕太 横尾渉 千賀健永 二階堂高嗣 宮田俊哉

本來都唔知係乜，但又因為睇咗《原來是美男》，深深地被日版泰京的美貌雷倒了…囧﹗

Sexy Zone   中島健人  菊池風磨  佐藤勝利  松島聡  マリウス葉

其實都唔知係乜嚟的，但一班小朋友叫呢個名本身已經爆，跟住再睇埋個mv…嘩﹗哈哈哈哈﹗實在是太爆了﹗

A.B.C.-Z  五関晃一 戸塚祥太 塚田僚一  河合郁人 橋本良亮

完全唔能夠知道係乜野…

ジャニーズWEST   中間淳太   濱田崇裕   桐山照史   重岡大毅   神山智洋   藤井流星   小瀧望

14/3/14後按：一click吓就有新group了﹗14年4月出道預定喎﹗
16/3/16後按：不要問我其他新group了…唔識…
**************************************************
延伸閱讀：

J家簡史 (日文)
J家簡史 (中文)
已退出J家的藝人 (有鄉裕美UNCLE和反町隆史的說…)
日藝話當年2~陳年舊歌…
************************************************** 

22/2/12又後按：睇番jr那段：

主としてジャニーズ事務所に所属する他のグループのバックダンサーを務める。また一部の年長者については事務所とタレント契約を結び、ジュニアに在籍しつつ個人で俳優等の活動を行う者もおり（佐野瑞樹・風間俊介など）、CDデビューしていないものの俳優として実績を積んだ結果ジュニアからの卒業が認められた生田斗真のような例も現れている。

原來斗真同學算係畢咗業架啦喎﹗