云云古裝片中，第一時間諗起的竟然不是金庸的，反而是《蜀山奇俠》…
看，我是多支持無記，有買正版vcd珍藏的說﹗
每次看完武俠片本人都有舖睇番原著的癮，無論是四本厚甸甸的金庸，還是玄如「青青的彎刀是青青的」既古龍(quote自本人偶像古先生主演的《圓月彎刀》， 真係有呢句的說﹗)都照煲可也，誰叫本人鐘意比，改編vs原著比較一餐已成本人看劇後的必然行為，但《蜀山》呢，一直無看…
我諗，可能係我已接受了金庸筆下的峨嵋派：由郭襄創派，弟子清一色女人…睇《蜀山》有男弟子硬係覺得怪雞…
well，睇番日子，第一部《蜀山奇俠》(有啲網頁加埋《紫青雙劍》的說)於90年5月播的，第二部《蜀山奇俠之仙侶奇緣》於91年播，嘩，原來咁耐的了﹗
兩部《蜀山》其實大致差唔多，不外乎是魔教日盛，正派弟子(唔知點解成個武林除了荒外高手就只得峨眉…)奮力對抗，呢個時候不外乎正派人士入魔，又有啲魔人入正道，得閒又有啲悲壯既正邪道戀，再喺危急關頭正派德高望重的人死掉，激起後輩決心，再失驚無神遇到高手，唔覺意學到驚世武功，魔人就咁燒焦，穿插師兄弟姐妹戀，嘩，劇情幾豐富﹗
話實劇情很公式(即係上面所講的)，除了警我師兄，最令本人難忘就係那些輕紗戲服。古裝片戲服通常都係厚到暈的，就算如80年代的拉鍊魔術貼閃閃design(我唔信古代有呢啲設計囉，睇《射鵰》時望住呢啲戲服真係…滴汗)般破格，但都要包晒手手腳腳。《蜀山》的女角一反傳統，輕紗過膝裙、披肩唔似披肩的披肩、芭蕾舞鞋、中袖衫，配上無乜長髮披肩的珊瑚頭(一枝二枝篤出來的)，我信佢地跳緊ballet多過拍古裝劇囉﹗同埋劇中武打唔係硬橋硬馬，反而係「蕉」一聲將背後的劍飛出天，由得啲激光fing來fing去，個人有時飛飛下，有時又喺地下郁來郁去，這種武打相比下好像無咁精彩了…但此破格風維持了不久(應該係80年代尾到90年代頭)，《仙侶奇緣》的造型和武打又回歸舊風格了。
不得不提貫穿兩劇的反派「血魔」，最先由Danny Summer飾演，當年睇唔覺，而家睇番就覺…好鬼似street fighter的說﹗「納」晒啲頭髮向上，很潮的說﹗
基本上「血魔」呢個角色好似音樂椅咁，關禮傑一開始客串了頭一兩集，初段鄭伊麵做了一陣(佢最終做番正派架嘛，話晒主角)，到後來去了鍾淑慧，嘩，佢個造型夠晒艷，不其然和本人驚嚇之最《鬼新娘》linkup了…
羅樂林個軒轅法王造型(上圖警我師兄下面那個…)，似唔似後來《西遊記》啲海龍王？
不得不提，《蜀山奇俠》首主題曲《年少無情》(張學友和關淑怡)和《仙侶奇緣》首《正義柔情永在》(溫兆倫和松松姐姐)都很不錯的說…
再續…(會有人估吓本人下一懷邊部劇的舊嗎？)
另一篇：
我平時都有睇返武俠小說的習慣
回覆刪除第一套係射鵰...培養埋睇書習慣
漸漸變左佢話要改篇我就睇左果套先
好似黃易果d...
不過蜀山呢，我挑唔到了....
5th Oct 2007 09:34 AM
我係中學先開始睇金庸，之前一路都無睇的說…
刪除我第一套係神鵰，阿爸介紹(種下本人狂迷古先生的禍根啊﹗)，之後多數係電視出了邊套我就睇邊本，90年代無記好落力翻拍金庸架嘛，偶然有古龍我又睇吓，梁羽生較少，其他的沒看…
黃易呢，家弟在播尋秦記時有睇，但我就無煲囉…
5th Oct 2007 10:27 AM
「蜀山奇俠紫青雙劍」我個陣好鍾意睇架喎. 個陣覺得兩女爭一男, 然後三個一切犧牲好轟烈的說.
回覆刪除「仙侶奇緣」就真係冇咩點睇.....
5th Oct 2007 11:59 AM
紫青雙劍夠奇幻，頗有徐克啲蜀山feel，勁耳目一新，睇時印象很深的說~
刪除個結局呢，我以為佢會有續集架，點知個續集完全唔關紫青雙劍事囉…
當年我鐘意李婉華多啲，唔知點解硬覺得楊寶玲做古裝好怪…
5th Oct 2007 12:46 PM
小弟第一套係睇倚天...之後就係古生既絕代雙驕...因為係以前老爸剩下來的...之後以不足一年時間怒煲所有金庸長篇...現在古生十居其九也ko了...只餘下小部份羽生兄的還未看...蜀生這套超長篇...小弟將會在看完大唐後看...
回覆刪除5th Oct 2007 13:10 PM
我見到古生以為係古天樂…古龍﹗﹗﹗
刪除實在古龍的我只睇過「圓月彎刀」(就是為了古天樂的劇集…哈哈)，絕代雙驕有睇劇無睇書，你知啦，公共圖書館的小說好鬼殘，又成日得一本無一本，當年我多數借學校的，但學校又無乜古龍喎(梁羽生就好多)，所以我無乜睇古龍…
9th Oct 2007 09:50 AM
去圖書館要一借借成套...古龍叫做好啲...沒有一套是超過五本之數...羽生兄左一套狂俠天驕魔女...右一套(不記得是風雷震九州還是風雲雷電)也有六卷之數...最多的一套還有八卷...但也沒有蜀山厲害...少說也有四五十卷之多...
回覆刪除小弟以前是雙管齊下(既去學校...又去公共圖書館)...
9th Oct 2007 12:51 PM
小小聲：本人以前係長袋住媽媽張圖書證的說…哈哈哈…
刪除有一水我好鐘意去借cd，佢好多奇異發現，我借過步姐的a song for xx(時為2000年)，奇情到暈﹗
武俠小說就少借，實在太殘和太核突，好多一揭開仲有陣味…嘩…
9th Oct 2007 13:53 PM
「蜀山奇俠」歐瑞偉(即陶總管)演的是歐陽平,比較奇裝異服，而「仙侶奇緣」他演申屠宏，不是穿短褲。
回覆刪除我一直覺得他沒有關禮傑和鄭伊健的耀眼，但卻平實。兩套劇他的戲份很多,但別人注意力在另一位的男角身上，或許這正是他的不能成為第一線的男藝人的原因。
25th Oct 2007 23:32 PM
係呀，我睇番「仙侶奇緣」，申屠宏係著長褲的~哈，記錯了…
刪除相比「蜀山奇俠」，歐瑞偉在「仙侶奇緣」既角色算係吃重好多啦，佢後段和崔盈一齊入魔，戲份多，當年睇完好難忘呢兩個角色，除了這兩套古裝片，我唔太記得歐瑞偉拍過乜野劇了，一跳就跳到近年的「尋秦記」了。
我覺得佢和郭政鴻都係同一款綠葉，見到佢會覺面善，會記得佢做過乜野角色，但未必講得出個名…
26th Oct 2007 13:41 PM
其實歐瑞偉演過很多的劇集，第一部擔當男主角的是「神劍魔刀」，而最出名的時候是拍「大運河」演李靖，後期還有「太平天國」演李秀成、「飲馬江湖」演張廷謙、「天變」演冷晨風、「精武五虎」演宋志豪,「獨臂刀王」演鳳天南及鳳三，「玉面飛狐」演洛孤峰、「人鬼狐」就分飾凌天宇及石三郎。全部都佔戲頗重的電視劇,九五年他移民到新加坡，二千年才回來，但回來之後所演的電視劇大多都成為一棵大綠葉，佔戲比較重的有「陀槍師姐」3及4輯，演大兵，還有的是「佛山贊師父」演奸角厲天雄。
回覆刪除29th Oct 2007 13:12 PM
你的資料很詳盡，謝啊…
刪除上面提過的劇集我沒印象看過，都是8字尾9字頭出品吧？那時期的劇集印象很依稀了，可能睇過唔記得了…近年的「陀槍」和「佛山」我都沒看啊…呃…
原來他90年代中移過民，難怪，90年代中正是我煲劇高峰期，就撞正他淡出港劇界，唔怪得對他印象不太深了…
29th Oct 2007 23:22 PM
對呀，domotoiceko，我說的電視劇大都是八六年至九四年間的。
回覆刪除其實現今很多人都不認識歐瑞偉，或許認識，但叫不出他的名字，真的不出奇，因為有五年的斷層期，他年紀開始大，戲路已不同，加上他本身的樣貌很奇怪，有很多人會認錯他，有人說他像陳國邦，亦有人將他與曾偉權劃上等號，所以就更難記起這個人原來叫歐瑞偉。
我都是最近才翻看大部份的劇集，很多人都喜歡看他的「大運河」，夠靚仔，最喜歡以白衣飄飄來形容他。
31st Oct 2007 14:28 PM
對不起，漏了你這個留言呢…哈哈…
刪除最近都好似有套戲見過歐瑞偉…兩套時代？
曾偉權和歐瑞偉類型相近啲，陳國邦我對佢印象深啲，中學時睇今生無悔睇到入晒神，陳係做黎明個fr的說…
綠葉就係咁，永遠覺得佢好面善，但又永遠up唔出個名，通常係講得出啲角色名…
4th Dec 2007 00:07 AM
呢兩套野都有睇,最有印象係有陳松伶同伊健做果套,不過我諗再睇返就唔好睇,其實無咩劇情,而且D正派成日都捱打,睇到煩。
回覆刪除建議蜀山千萬不要看原著,因為原著勁長,我諗無記都唔會跟原著,反之金庸看原著有價值,古龍看原著會覺得無人拍得好。
請問可不可以介紹套劇裡頭的神兵利刃?如松松姐姐用的劍,伊健用咩劍等。
26th May 2008 20:11 PM
兩套野劇情都好公式，若然喜歡劇中演員會看得很暢快，要不…其實可以FAST FORWARD的…哈哈…
刪除蜀山我無看原著呀，我見圖書館有好多蜀山小說，都唔知邊本打邊本，索性無睇。我主打睇金庸。
金庸小說人物、場景、招式等等都有詳細描述，和古龍的簡而清文筆好唔同，古龍既書有好大想像空間，和金庸係掉番轉，改編古龍既電視劇好有趣，一係就古古怪怪，一係就好普通，好難改得好睇的說…
其實…松松和伊麵那套好似無講佢地用乜兵器架喎？無乜名堂的說…係關禮傑那套就有講紫青雙劍…
UMUM…最特別可能係軒轅法王架指南車…
27th May 2008 09:54 AM
回想,無記亞記都無咩武俠代表,
回覆刪除無記最好果部可能係「天龍八部」,不過係黃日華做喬峰果個版本,無他,故事好,反觀之後什麼「大唐雙龍傳」及「覆雨翻雲」,簡直垃圾,「強劍」唔好提。
亞記有印象係「劍嘯江湖」,「雪花神劍」唔係睇好多集,唔敢評論,不過「劍嘯」跟本就係老抄「流星蝴蝶劍」,搵笨。
而家大陸都拍武俠,講真,唔想讚大陸,不過人地資源夠,一定拍得衰極有譜,「天龍八部」「神鵰俠侶」無法子唔讚,因為呢兩套戲,好鐘意劉亦菲,亦都鐘意明白,香港d死麻甩佬點解上去大陸包二奶同叫雞……(哈哈哈)不過而家諗返,胡軍既蕭峰好似聶風。
好多人都拍過蜀山,而家回想,最重要既一個人,應該係丁引(or丁忍?忘了)無記就係夏邵聲做既,而電電係秋官,丁引係忠,不過入了魔變奸,好鐘意入魔的穚段,其實睇上黎呢d入魔好假,不過現實生活中又有誰不入魔?
我都好想有個俠女做老婆……
27th May 2008 22:25 PM
亞記的武俠劇我看得不多，最代表的徐少強我都沒看過，反而是某年偶然看到夜晚重播《沅花洗劍錄》…哥哥呀…不禁追咗一輪…
刪除無記我最喜歡的就是90年代的重拍金庸劇，《天龍八部》、《笑傲江湖》和《神鵰俠侶》(這個好像不太多人認同，不過我個人覺得好好睇…哈)都好喜歡，好些是先看90年版再看80年代版，倒轉頭先入為主…。
港劇一向最蝕底都係景，多廠影少外景，吓吓都係郊野公園和沙灘，唔係人物唔同，真係唔知邊部打邊部…。我想港劇強在改編節奏明快，大陸/台劇吓吓都四十幾五十集，港劇多數廿幾三十集，緊張刺激好多(不過就cut走好多精彩橋段…)
近兩年大陸的金劇我都沒看，反倒喜歡台灣既《倚天屠龍記》，馬景濤個版本，吳啟華個港版…真係得啖笑…
丁隱？danny summer真係幾型的說﹗佢個樣又鬼鬼地呢
28th May 2008 14:54 PM
我都買左套「天龍八部」,不過都無點睇,可見我幾天真同儍……唔係好睇既原因可能電視劇都睇左,睇返小說都幾沉重,其實主要睇喬峰,好鐘意呢個人物。
回覆刪除古龍既小說我都有幾部,陸小鳯有幾集,楚留香又有幾集,絶代雙驕有一套……真係覺得自己天真同儍。古龍既小說都睇左好多,覺得佢都好突破,如果以武俠人物比喻,金庸係武林正宗,古龍應該係東邪西毒,好破格,不過就係咁既原因,跟本無人可以拍古龍既小說拍得好,最諷刺既係,當年王家衛既「東邪西毒」,帶著金庸改編之名,不過風格卻極像古龍。
睇左咁多武俠小說,最後鐘意左溫瑞安既小說,「刀蕞裡的詩」「說英雄誰是英雄」「四大名捕」等都是佳作,不過老溫太懶,好多作品都未完,而且都好似唔洗止意完……而家無記拍「少年四大名捕」,都無期望,睇死佢都唔會跟原著,之前有套「神相李布衣」都係老溫作,不過都知唔好睇,如果唔係點會唔播?不過溫瑞安既小說一樣拍電影電視一定不好看,同古龍一樣,因為寫意境太強,不過印象中,徐克既武俠及張藝謀的武俠,都有跟老溫「致敬」(老抄)既地方。
我以前都有寫過武俠,而家都無寫成年,而家武俠算唔算唔掂?好難講,有人睇,不過又唔係多,來來去去都係金庸古龍,新一代都只有老溫黃易係代表,不過再新一代呢?可以說沒有,第二時,可能都無武俠片,因為都無人作,都無人翻拍。
呀!記得以前無記有套「十三密殺令」都好正,而亞記都有蕭苼既翻拍武俠劇(忘了名字,其實是一個系列來的)如白骨陰陽劍 小白龍 無字天書都不錯。對新的武俠片真係無期望,尤其是看了「強劍」「大唐雙龍傳」等,「風雲」拍第二集,而鄭問漫畫「阿鼻劍」都拍電影,都有期望,好過睇無記。
28th May 2008 21:26 PM
曾經有人話過《射》、《神》和《倚》三部是俾年青人睇的，熱血嘛，自然希望好似郭靖楊過咁闖一番事業又有場驚天動地的愛情，反之，《天》和《鹿》係個人有番咁上下人生閱歷時睇先有味道~
刪除古龍我只睇過《圓月彎刀》…因為當年重拍版係古天樂做的說…哈哈，另外我幾鐘意林志穎和蘇有朋的《絕代雙驕》，其餘的我就覺書比小說好睇…
《東邪西毒》，你講起我又覺喎，啲對白玄之又玄，講咗好似無講咁…古龍都好多「青青的彎刀是青青的」既句子，真係想像空間無限大啊…
無記近年的《英雄少年刀》、《大唐雙龍傳》、《強劍》我都沒看…對上一次睇既應該係《血戰軒轅》，但劇情完全唔記得，只記得阿姐那首極難頂的片尾曲…2000年後看得最入迷的古裝片，應該是古天樂的《尋秦記》…
黃易、溫瑞安的小說我都沒看，其實我看得很窄的，金老作品全部看過，古龍少少，其餘的都沒看…但有劇集我會睇，只是近年返工時間少，已經好少追電視了。
29th May 2008 17:55 PM
尋秦記都好難定位係武俠,又無咩門派,又無行俠仗義,有既係一大埋老作性格既歷史人物,回到過去既科幻穚段,以及不跟原著的劇情,就連有一集,古天樂要跟江華比劍,比劍前去練劍,俾人睇到,佢就擺住架勢話:「係咪好誇張?好似拍武俠片一樣呢?」都幾諷刺!
回覆刪除血戰軒轅應該本來幾好睇,可能係思琪姐要減戲先影響,雖然我睇唔係好多集,不過都感應到。
不過最估唔到而家我最有印象既竟然係「十三密殺令」,十三死肖、劍魔刀神……實在係無線好唔錯既自創武俠。
不如我地比ｄ意見無記，整套兩大高手決戰，由秋官、徐少強、或劉松仁等做呢兩大高手，而引出ｄ少年大俠去追求無敵，ｄ少年高手當然找無記ｄ小生做。
30th May 2008 01:18 AM
尋秦記我覺得係套著古裝既笑片，演古裝人既講比較白話既對白，古天樂就係做時裝劇，其實係笑片來的…元華個墨家劍法其實都無乜篇幅，講完兩咀學完兩野就無咗件事啦，也許都稱不上是武俠片，叫歷史片又唔係…都係叫笑片算啦…
刪除血戰軒轅在節目巡禮是古天樂做架﹗﹗阿姐和秋官合作都吸引，不過我返工最後無乜追到…
《尋》和《血》我都無睇原著，不過唔睇都知，無記一定改到七彩的說…
自創武俠我係記得《蓋世豪俠》咋，哈哈，近年我真係好笑睇電視啦，你說的這套《十三》做了沒？等我留意吓
30th May 2008 09:39 AM
其實古天樂同初出道既林峰幾似，而佘詩曼同詩琪姐初時都好似，如果血戰係而男既一幫係師徒，女既又係師徒，或父子母女咁都幾得意，不過都拍左，而且照而家佢地既戲路，都好難有咁既拍法。
回覆刪除血戰係無記自己作，不是改篇，製作人仲講，軒猿既意思就係炎黄子孫，即中國咁解，而家又諗返，最記得既係果個奸角司馬？把劍好大把，好有霸氣。
十三密殺令完左好耐，有蔡少芬 楊玲 錢小豪 張兆輝等做 故事係講海瑞鬥嚴嵩，而十三死肖就係以十二生肖為藍本既十三個殺手，最勁既，就係「人」，即係錢小豪，不過中間有d無睇，錢少豪又無啦啦變左好人，又引來「手中無劍心有劍 手中無刀掌亦刀」既劍神 刀魔……真係好正
亞記突然間又記得一套勁舊既「血債血償」，有潘志文 伍衛國做 仲有陳惠敏客串做老翻獨孤求敗……不知你有無睇過，都勁舊喇……最衰係結局睇不到，我都係睇重播。
30th May 2008 13:48 PM
血戰在節目巡禮時係古天樂做架，所以我先會留意，不過後來轉咗林峰，外型好難比較，不過林小生演技比古小生紮實就真既，血戰我睇咗少少，無記錯的話阿姐好似係楊思琪既阿媽，秋官和林峰個角色就好似係無關係的…
刪除尋秦記一出我都覺無記想捧林峰接古天樂，兩個一鬼樣黑麻麻的…不過出來大家戲路唔同各有各做。到頭來反而係吳卓a先係古生搵呢接自己棒…哈哈…
十三密殺無留意啊…近呢幾年我真係好少坐定定追無記劇，印象中係有《金枝》、《鐵血保鏢》、《女人唔易做》咁大把，《強劍」無聊聊睇咗少少，勁抄《蓋世豪俠》和《絕代雙驕》，無聊聊都有少少好笑既…
據說無記收費電視那邊會播佳視版《神鵰》，好想睇啊﹗其實我無乜睇過七十年代版的金劇…最舊都係八十年代的一堆了…
唯一一套，應該係亞記的《沅花洗劍錄》…
2nd Jun 2008 09:36 AM
亞記「浣花」都唔好提,唔係哥哥死,出返d片段,都唔知哥哥係亞記做過,亦都唔知有呢套戲。總括黎講,近來的武俠片跟本唔見得人,強劍……真係想殺左d製作人。過年果時睇返d古龍「陸小鳯幽靈山莊」,可能真係睇得老溫的武俠小說多.覺得古龍都不及,太賣弄自己風格,講女人又多,好煩,當然,老溫都係賣弄,不過好明顯青出于藍。希望多d人寫武俠,唔想武俠就咁就死。
回覆刪除3rd Jun 2008 21:35 PM
《浣花》我係幾年前睇架啦，應該01,2年倒，哥哥未過身的當年。好耐之前睇過《浮生六刧》所以知哥哥拍過佳視的劇集囉…亞記成日有勁野重播的，反倒是無記重播的劇集唔太合我口味就真…
刪除《強劍》勁/超級/狂抄《蓋世豪俠》又有啲似《絕代雙驕》…不過這不是第一次，96,7年上下有套《英雄貴姓》，古巨基和樊少皇做的，更抄《蓋》和《絕》…
話時話近年又真係無乜武俠小說出喎，其實小說我睇來睇去都係金庸古龍，溫瑞安, 黃易我都無乜睇…
劇集就更加，無乜邊套全套追…唔通搵景難成本貴？除了台灣，大陸的出品越來越精彩，以前我淨係睇古裝歷史劇，近幾年的金庸劇如黃曉明套《神鵰》,周迅套《射鵰》都不錯…唯獨是覺得集數太長…少少拖的感覺…
4th Jun 2008 12:34 PM
如果無人寫武俠,武俠片都笈笈可危,就算係武俠漫畫,其實都不及小說,希望有人會寫多點武俠小說
回覆刪除4th Jun 2008 20:36 PM
唔講唔覺，一講就覺，書店的新書十居其九都係愛情小說，真係好少武俠小說…
刪除或許寫愛情小說材料手到拿來，身邊已有成千上萬個故事，所以人們也費事去想像一些新故事出來呢？﹗
5th Jun 2008 13:19 PM
無得食果陣睇下佢仲用唔用呢d題材,劇集如是,小說如是,歌曲如是,真是可悲,國家不幸詩人幸,可能真係要我們好慘果時先有多d題材
刪除5th Jun 2008 21:43 PM
據說金庸寫《鹿》和《笑》兩部某些角色和情節是受祖國國情啟發的…
刪除天下太平時可能無野激發大家思緒呢我諗
6th Jun 2008 00:00 AM
如果説溫瑞安寫得比古龍好，這是我不同意，溫瑞安的四大名捕頭幾個故事我有看過，但真的引不起我有追的興趣，後期的更沒有看。可能正所謂的各花入各眼。
回覆刪除黃易也看過一些！
古天樂和林峰比演技？我感覺林峰的演技還未完全成熟，好像看「家好月圓」，陳豪雖然誇張，但就比他出色，林峰的演出真的是一般。
11th Aug 2008 13:27 PM
溫瑞安的原著小說我沒看過，古龍我只看了《圓月彎刀》，這本係意境多於描述，要好大想像力吓，和金庸細緻是兩種不同風格，幾有趣的…
刪除除了金庸小說，很多武俠劇我都是看完電視劇才轉頭睇原著，所以這方面的小說我看得不多…哈哈…
用《尋秦記》來比較古、林演技係唔公平既，呢套劇係為古生度身改編，我覺得係楊過再造版，又加咗好多古生既自度爆肚位，可說是古生TBB劇集演得最好既一部。咁林生當年係新人，算係咁架啦…
反倒是近年林生啲角色好似有少少千篇一律，吓吓都好仔…UMUM…同期的我覺得馬國明和王宗澤角色好似多啲發揮…
13th Aug 2008 09:35 AM
睇你同珍珍、無敵的對話，就知你地真係電視精
回覆刪除所以當你地講起歐瑞偉，我就好有共鳴，我都覺得佢幾型，尤其古裝，不過衰在唔夠高，所以都係難上第一線
另外，我都覺得關禮傑好型的，是邪邪地咁，但唔知點解返黎無線後，做埋ｄ好無聊０既角色，仲要造型核突又老套，破壞哂
至於伊健同松松姐姐合作的八套戲，我都數唔到咁多，只係記得仲有九二鍾無艷(即頭係月兒彎彎照九州的時裝版)
28th Nov 2008 15:40 PM
哈，我小時係落力追劇集多過追卡通的…講卡通我反而無乜野講…
刪除歐瑞偉身高真係好蝕底，我覺得佢同曾偉權個style好似，係上佳綠葉人選，但主角你又唔會覺得佢地係小生人選喎…
關禮傑返無記後我只看過佢同王喜講網上犯罪那套(有胡杏兒和胡諾言的)，佢做火爆差人都幾型吓的說。近期的《珠光寶氣》我沒看，看劇情介紹好像是負心漢的說…
我還是最愛佢做既警我師兄~~~~
《月兒》我嫌佢太似《天涯歌女》…原來有個時裝版…(沒印象看過…)…其實我都數唔出係邊8套，那時睇報導松松和伊麵係話合作咗8次囉…
29th Nov 2008 19:46 PM
無意中看到這篇blog. 很開心有人講. 我讀書時晚晚追的! 第一集拍得比第二集好, 但第二集有我喜歡的伊健, 所以加分! 而且主題曲十分好聽(尤其是中間的一段中樂, 很有feel, 到現在我仍覺得好好聽.)
回覆刪除4th Dec 2008 21:09 PM
第一套我最記得係關禮傑的警我師兄，個故仔我就唔太記得啦，後來翻煲時先記得…
刪除我對第二套印象深啲，一來男女主角我都很喜歡，二來那時父母無管電視管得咁嚴，我可以集集煲晒，所以記得清楚啲~
其實兩套的主題曲都好好聽，第一套那首係張學加關淑怡，很型的感覺，第二套松松加溫兆倫就情歌類的，兩首我都喜歡的說…
5th Dec 2008 19:17 PM
大家小時候都是無線劇集的朋友（握手），那時候看電視劇幾乎是生活的全部，我對警我師兄的印象也很深刻，「上官警我」這個名字實在太驚世駭俗，哈哈哈。
回覆刪除我還記得那時候我在上小學，有同學自稱是青雲和紫霞，拿著蜻蜓版綠色和紫色螢光筆篤來篤去，然後安排某高大男同學當警我師兄，本來我還被安排當餘下的其中一女角—師母（李麗麗飾），但我說我寧願反串當金蟬子，相當慶幸自己當年沒有自以為是青雲和紫霞，呵~
19th Mar 2009 12:24 PM
唔知點解平時啲劇我都唔多留意關禮傑，係呢套特別留意佢…佢警我師兄兩條公仔麵的水成功幫個造型畫龍點睛…哈哈…
刪除扮武俠劇相信係好多人小時候都做過﹗我當年係扮《倚天屠龍記》個武林大會(即係阿芷若一劍刺埋去無忌那個)…
雖然警我師兄係好靚仔，但以劇論劇我較喜歡鄭伊麵做石生那套的說…個故仔既悲劇結局令本人印象難忘的說…
19th Mar 2009 13:51 PM