走在最前之無記劇集

都說我是喝這個台奶水大，明明手上有爆笑得呢又發人深省的《My Boss My Hero》，還是忍不住看了看台慶…唉…都係將時間用來煲真喜男來得實際…

等到11點看節目巡禮，我知道比台慶好睇好多。

又來重演熱門節目？唔好玩扮到珠光寶氣的阿姐們啦，煮得呢又顧唔到身上名貴晚裝，手上珠寶除又唔係戴住又唔係，事業型的阿姐們更見雞手鴨腳，叫那四位「猛男」幫不如直頭搵個師傳幫仲實際。轉身入廚房煮麵食，一出呢見到一班「美女」唱歌劇…又呢男扮女裝？又係曾志偉？度橋的大佬彷彿已將他扮女人情節昇華如 《東華》一定要有新馬師曾般，為保食慾唯有轉台；看後感，蔣志光，你真的很專業。最好看的，可能係opening大晒冷，人多勢眾，看著看著，我想起《紅樓夢》的大觀園…

算啦，那一小時的惡夢和一集《My Boss My Hero》的opportunity cost俱往矣，展望將來，看看無記出年點樣「走在最前」。

年年我都好不幸被《台慶》悶暈後忘了睇節目巡禮。呢個節目可能係無記全年最好睇的一個，這是無記來年劇集和綜藝節目的presentation，其實係用呢sell俾各大廣告客戶，作為電視精，唔係target都要睇睇既，主打睇吓個樣板和製成品出呢差幾遠。

而 每年我都有被呃的感覺，巡禮用得呢sell客片段中卡士一定精英盡出，但片中擔大旗和最後開拍的卡士可能差十萬九千幾里。當然，這可能和藝員檔期有關，不過出到呢唔會原先的卡士會幾失望囉。尤記得當年重拍《鹿鼎記》，康熙話係由古先生演出，最後…《帝女花》由阿蛇拍張智霖，最後…(馬小生我唔係話你唔好， 不過先入為主丫嘛)；《血戰軒轅》的古先生變了林lone…(最後我無睇呢套劇，唔知林小生做得如何，只記得阿姐高八度的片尾曲：問蒼天~~~~~)；某年說有古先生和宣萱合作一套驚慄片，最後係無拍到…同埋《婚前婚後》(忘了無記點樣食個昏字)阿姐個角色其中一個仔係陳曉東嚟架﹗

今年我坐定定睇，睇吓無記出年點「呃」我。

有啲我知已拍咗，有啲聽都未聽過，以我所知，《學警》係拍咗(記者成日影容天后開工嘛)，有一套《？心風暴》(忘了第一個字)應該都係拍咗的，仲有《搜神傳》和《天機算》(即係攪到馬小生受傷朦眼拎獎的一套)。

有兩套，本人幾有興趣，又即管睇吓無記拍成點(如果真係會出街的話)。

一套係秋官演辛棄疾(完全唔記得個名)，辛棄疾(生平) 名句「驀然回首，那人卻在燈火欄柵處」/青玉案(從yahoo search搵，個人兄打錯了「蘭」和「珊」，錯得仲離譜過我啲錯字喎﹗)人人皆知，當年讀文學見識過他文才，對他的生平事跡所知甚少。若呢套野拍得正正常常的話應該幾好睇，秋官做個能文能武的詞人點都似過市井出身的劉邦掛，若無記拍得正常的話。另外辛的兄弟有黃德ben和關禮傑，當年看《蜀山奇俠之紫青雙劍》極欣賞呢位的水有如公仔麵的大師兄(雖然我還是欣賞苗僑偉的楊康多啲，嘻嘻)，真係幾期待。

另一套完全係震撼我的心靈—以《紅樓夢》 的王熙鳳為主角(都係忘了名字…哈哈)，唔知係咪見蔡少芬做焦當家咁掂今次比佢升級做大觀園當家？蔡少芬應該carry到鳳辣子既，若蔡無期可以諗吓鄧萃雯？﹗蔡做主角唔係最震撼我的地方(呢個選角OK我覺得)，最驚係無記挑戰呢套經典，究竟無記去邊度搵景？戲服道具得唔得(曹先生書中之描述極仔細的說)，還有其他金釵會係邊個「花旦」做呢？呢個我係最驚，唔係太留意到邊個演林黛玉(應該係我miss咗)，寶玉係蓋鳴輝(…又搵佢嚟反串？﹗)，寶釵係廖碧兒(唔知點講，總之唔係我想像中的寶釵…)。雖然唔熟《紅》書，但話晒會考日煲夜煲過，仲有八、九成背景資料留在腦中。本著本人鐘意睇古裝+歷史，本 書又叫識少少，而且本人熱衷睇原著改編劇，又睇吓無記拍啲咩出呢先。

還有套是回歸十年作。另外有一套《珠光寶氣》，話係匯聚全台精英，講鑽石。由頭到呢不停影住鑽石和飛藝員的相出呢，睇完都唔知套劇會講咩…

講完出年的節目後，有一part講明年節目會以高清廣播，看得我和小弟一頭霧水，甚麼畫面顏色更靚、輪廓更分明…點解咁似高清電視機廣告啲內容？﹗究竟係sell我睇你的高清廣播節目定係sell我買高清電視架？

雖說我心早已奔向日劇，但無記始終係本人由細睇到大的電視台，實唔忍心見到現在出品質素/量之高。走在最前係要行動唔係一大堆人講就行的，現下亞洲各地出品水準日高，唔止日中台韓，甚至一路買港劇的東南亞都有不俗出品，現下的港劇如何和人家競爭呀？﹗

(08後按：《珠光寶氣》講咗兩年，卒之會喺今年做台慶劇…卒之播了﹗另外講辛棄疾的一套和《紅樓夢》那套係完全無影…嗚…)

***
雪球--我對電視劇的期望
文風--萬千猩猩賀園慶
******************************************************
08節目巡禮
09節目巡禮
10節目巡禮
11節目巡禮
12節目巡禮
13節目巡禮(其實是沒有看的…於是只能從網上找資料)
14節目巡禮(也是沒有看的，也只能從網上找資料)

其他的年份就看下面的tag吧…