[日劇]《My Boss My Hero》

話說呢期煲的劇唔係喊苦喊忽就係爾虞我詐，實在需要平衡一下，久仰《My Boss My Hero》爆笑力強，一看果然威力無窮笑到我傻。昨日(見下文一雞兩味《My Foot My Ankle》)拗柴事件令本人痛得不能入睡，狠下心腸一次過煲晒最後三集，功德圓滿，安心去搵周生了。

Tokio主音長瀨生形象表面上cool cool地(至少係舞台上)，不過佢係我心目中不嬲都係「傻傻地」，對住佢正經做的戲我都係笑；真喜男呢個表面黑社會內裡純真的角色真係開正佢嗰瓣。

幾年前無記夜晚有Johnny's Hours(無睇過或唔識Johnny仔的朋友可以飛咗呢段﹗)， 播日劇之餘仲會播Johnny仔主持的節目，通常係《堂本兄弟》搭Tokio的(唔記得個名)或V6的《Viva Viva Viva Viva V6》，身為KinKi粉當然幾夜都要睇的說；話說某集《堂本兄弟》的嘉賓正是光一的老死長瀨，長瀨既傻吓傻吓言論絕對和他高大威猛外型不符，包括每次光 一visit長瀨佢都係請人飲草莓牛奶(佢以為光一好鐘意飲…之後次次都請呢個野飲…)；又同阿剛兄jam歌唱光一鐘意飲既草莓牛奶；最後長瀨生稱小牛 (calf)做"Beef baby"，人家同佢講係"calf"時佢仲好有感情的問唔係"Beef baby"咩？﹗笑鬼死，總之唔係筆墨所能形容，最衰youtube搵唔到呢集…自此我覺得佢係傻既…嘩哈哈…

嗰一期除了有節目仲有好多劇集，除了本人熱愛的《沒有天使的街角》，仲有一套《巨星夫婿》， 長瀨係劇中無獨有偶又係兩個身份--舞台上巨星櫻庭裕一郎酷酷的(黑社會時的真喜男都係…)，返到屋企就變回傻氣十足(學校中的真喜男？﹗)，劇情溫馨得呢幾好笑，吸引到無睇日劇的同學都早啲返學校一班人睇完就一齊去上堂；播完《巨》劇無記重播《沒》劇，情況完全相反…無個人肯陪我睇…唉…。女婿咗兩次，再 加上之前係電影度扮演過黑幫份子，仲唔手到拿來。

 ^巨星和夫婿？﹗講開又講，櫻庭裕一郎成套劇由頭到尾都係得一首《孤獨的牙刷》…巨星得一首歌咁驚？﹗Single都有主打和side B歌啦…

 

左上和右：真喜男的好友櫻甚麼的和小光~呢場藍球比賽甩褲真係笑鬼死我…

比起櫻庭裕一郎，《My Boss My Hero》的真喜男極誇張和卡通，相比歌手和女婿，黑社會和高中生的對比強得多，配合如劍心兄所講極「占基利」的表情，想唔笑死都唔得；加埋對本人必殺的時裝片橋段：古惑+靚仔+煲煙，仲唔死心塌地由頭煲到尾…到第九集係學校打交打到身份暴露連紋身都暴露埋時(其實個情境係好灰的說)， 本人竟然諗起…陳浩南…。諗住睇呢笑唔使用腦時劇情會令你有野諗，點解要返學？青春是咩野？校園生活還是繼位黑幫？每人都有自己的道路，眼看追求唔到不如珍惜美好回憶。看著真喜男參加藍球比賽、文化祭、搶布丁…再回想自己中學年代在老師威迫下參加過吓比賽，啊，總算無白費到當年美好的青春﹗唔係錯過了校園 生活就無得番轉頭啦，Water啊﹗W~A~T~E~R~~~~

右左和右下：嘩…我真係睇到嘩嘩聲…南哥呀…

Johnny仔拍劇總係買一送一，今次劇中送了兩件，小和田中聖(28/1/14後按：估唔到佢會因為越軌行為被開除了…囧)有份演《沒有天使的街角》，士別三日無咗當年個頭盔髮型好樣咗好多。另一位櫻甚麼的手越佑也原來係News既一員…死囉…我認唔得晒News啲人…嵐我呢講已經好新…上網睇睇先知News仲有麻生同學份…撞鬼囉…

(28/07/2016後按：我唔知News有乜人的程度是上年年中熱愛菅田將暉，睇吓佢有乜新片時先知其中一部《粉與灰》的小說原作者是…News團員﹗哈哈)

左中：講開又講，日劇好鐘意安排主角熱愛吃布丁，想當年《沒有天使的街角》小輝都係布丁怪…今次直情係全校為布丁狂，真喜男真仲為咗買到限量布丁而設計咗個飛越學校衝飯堂裝置，呢股熱誠和傻勁唔係人人有，又抵得佢真係飛到過對面…真係只要有夢想，凡事可成真。

<-我又整個布丁食吓先~~

咦…個title話係講《My Boss My Hero》…係咁講《沒有天使的街角》添…哈哈

想笑？睇啦。想重拾童真？睇啦。想回味青春歲月？睇啦。想做番中學生？睇啦。(或好似本人咁得閒搵番套校服出呢著一著啦…哈哈)

***

 

加送：凌厲眼神乙個

《My Boss My Hero》劇情
《巨星夫婿》劇情