[日劇]《太陽之歌》first impression

我有舖續煲癮(6/3/12後按：這就是後稱的「」也…)，嗰期煲完某人的劇會再找其他的來煲。狂煲完竹野內豐，今次我的目標轉向澤尻繪里香，睇完 《一公升眼淚》 再嚟一套她上季劇集《太陽之歌》。看了兩集，劇情仍在舖排中未入正題，談不上有甚麼看後感；反之不停令我想起兩樣野：濱崎步和《火舞涼瓜》。

星座說本人看人看事都極重第一觀感，本人一直深深認同；若人事變得和自己第一印象不同，本人可真要費一番功夫來調節自己。認識的人如是，睇劇亦然。本人睇《一升》在先，看慣澤尻簡樸學生look(其實…我覺得她在劇中的casual look衣服幾…娘…可能係要配合屋企開豆腐店的設定掛…)，一時間睇唔慣《太陽之歌》中的自彈自唱型女look--衣著型，化妝勁咗好多(其實看《一升》時本人已不停投訴邊有人病得呢塗鬼咁勁的睫毛液架…)，我邊睇邊懷疑眼前呢個薫係咪之前的亞也，點解個樣唔同晒既？係佢笑時見到隻爆牙的才能確認係同一個人。當然，《一升》中她是十五歲的學生，《太陽》的角色就十九歲，切合番佢本人年紀，也許，街頭歌手係要呢啲郁，又或者呢個濃妝型女look才是澤尻自己(睇佢近期出席公開活動的造型…)。某幾個角度(例如三年前薫手術住院時的孖辮look)望埋去仲有啲似步姐(正確來說是步姐剛出道成歌手時的樣，98年個陣啦…粉絲唔好打我呀﹗)，尤其是對大眼，撞鬼。

我諗我要啲時間適應，包括劇情和造型，適應得呢劇情都應該入肉架啦。

在這第一印象影響下，本人適應case還有  《summer snow》 中演耳疾二弟的小栗旬(右圖)，他在劇中唔多出聲勤力讀書(所有對白都比堂本剛以機關槍形式講晒)，造型總是娘娘的，到睇《我Miss係大佬》和《花樣男子》(左圖丫唔該)時，嘩，使唔使咁型呀﹗接受唔到﹗另外是高島禮子姨姨，《大奧》和《女系家族》她都是做些攻於心計陰毒女子，在《不能結婚的男人》終於有機會睇佢做番個「正常」的女子了(會社員only)，正常咗我反而唔慣，要啲時間…

此劇的第二個觀感係《火舞涼瓜》。

呢套無記鉅獻最令人印象深刻係由頭到尾「黃禁禁」，而《太陽之歌》就係黑麻麻。因為女主角患的病不能直接接觸陽光，所以她的日常生活都在黑夜開始，於是日光日白的戲就比晒山田孝之，澤尻就算係屋企燈光都係暗暗的，真係好似某柔順劑廣告話齋：「好似黑夜咁黑。」睇完隻眼好支力。唔知係咪因為場景黑麻麻，所以澤尻個妝就厚啲呢突出番五官呢？﹗

最令本人驚喜的是澤尻的兩首歌《タイヨウのうた》和《stay with me》，唱得唔錯，起碼無本人最驚的雞仔聲，輕快pop-rock，加埋個靚到要殺盡天下少男的PV，唔怪得上到oricon第一啦﹗

因為男女主腳的關係，《太陽之歌》難免被拿來和《世中》和《一升》比較，不過而家只係睇咗兩集，未係時候判斷好唔好睇，再觀察吓先。睇資料說此劇改編自同名電影，而電影是翻拍(？)港片《新不了情》，除了絕症和音樂，暫時未太感受到《新不了情》…又係要再觀察…

官方網頁 / 劇集資料
電視vs電影後記： [日劇]太陽之歌VS太陽之歌