下集：My Foot My Ankle

話說昨日lunch打完文就高高興興去叮飯，打文三十幾分鐘keep住無轉過坐姿，企起身感覺良好就邁步向前。行了幾步勢色唔對：腳痺…可恨意識到時已太遲，雙腳一軟整個人向下墜，右腳首當其衝"black"一聲拗了一個世紀大柴，痛不欲生…

好在我無貪靚著幾寸高跟，唔係call定白車打石膏都得。以往拗柴後痛一陣好快就無事，今次之所以稱為「世紀大拗柴」，就係因為隻腳郁一郁都痛，行幾步路猶如行刑般完全腳踭痛歸心，為行少兩步本人只得開動自動減少排水系統，皆因未到死手間我已痛到半死。好在，無腫到變豬蹄(3/12/06後按：後來因為追車和快步落斜路…本來好多了的痛腳還是腫了…)，係少少腫變鳳爪。如是者捱到放工，下車後兩個字的路行咗四個字，返到屋企索性由房單腳跳入廁所，再跳入廚房；好在屋企無人，唔係見到我彊屍先生上身都幾驚。最撞鬼佢越夜越痛，攤在床上向左瞓向右瞓都唔啱位，腳大佬不停投訴…算把啦，煲劇把啦。好在，今朝醒來雖然仲痛痛地，但已可雙腳著地，唔係我就諗住去睇鐵打…

由於隻右腳隱隱作痛出唔到力，唯有以龜速一拐一拐的行。奇怪，一路上 竟然有兩個八公邊行邊擰轉頭啤，真係啤一聲，有咩好望呀？﹗唔知點解我嗰頭有好多呢挺好奇心旺盛的人哥人姐，有事無事都望一餐；試吓搵日企係天橋度隨便搵野指住嘩嘩聲的叫，唔使十秒就一定聚到十幾二十個呢啲八掛人望埋一份，不過，無人知望緊咩。拐吓拐吓的本人多多少少感受到傷健人士所受的歧異眼光。黑仔事還未止，到百佳買早餐，本人仲有幾步就行到龍尾時有個西裝友走出呢攝咗我位排係我前面，唉，算啦，鬼叫我行得慢咩，誰不知我行到前面個打尖友後面排之後有另外一件西裝友遲我半秒攝到我隔離…作死呀﹗連續兩個西裝友打我尖？﹗本人即時施展真喜男怒啤眼神…行得慢都唔係俾你地當病貓呀話…排隊啦…

 ^就係呢個眼神啦…幾凌厲…

被人望和被打尖時突然想起《一公升》中亞也看弟弟弘樹踢波被人用奇異目光眼望望 一段，在指指點點人家的人方可能講完兩句就算，轉個頭就唔記遇見過一個咁既人；但對被指指點點的一個可以好hurt；或許，友善的眼光比出手相助對他們來得更窩心。何必將自己快樂建築在人家痛苦身上呢？有咩好望有咩好講？

痛了一日破晒之前的拗柴紀錄。幸好而家無咩點痛，開始有番力，終於唔使龜速步行…因為今日龜速…我追唔到車立…追唔到架地鐵…追唔到車…嗚嗚…

以後坐完半個鐘以上千祈千祈千祈唔好一起身就行，呢個教訓真係好痛…

上集：
[日劇]《My Boss My Hero》