愛蛋說

近排太愛《笑忘書》，所以發文的題目都要工整點，今次個題目係抄《愛蓮說》的，哈哈。

話說返家後一開雪櫃，老媽買的蛋竟然多到雪櫃門頂的蛋隔也不夠用，要再用碗來載著，有供才有求，想來我家確是個愛蛋家族。然而，蛋黃和蛋白之千變萬化確是叫人吃不厭，不禁要唱一隻N年前廣告歌：「鹹又啱甜又啱味說真好，凍又啱熱又啱給我活力…」(哈，係豆漿廣告歌…)，實在很難不為之著迷；爛gag乙個，考試測驗的食蛋除外。

就來數數本人熱愛的吃「蛋」款式。(排名…係分先後的…哈哈)

1. 蒸水蛋

蒸得滑一滑的水蛋用來撈飯真係一流。話說小時候的我嫌白飯單調，一碗飯食到《歡樂今宵》都未食完，於是媽媽就出動加蒸蛋的撈飯引誘我加快食飯速度，卒之媽媽成功了，每撈飯本人食的速度快多之餘還會添飯﹗本人至愛是老媽特別版走蔥肉碎鹹蛋黃蒸蛋，咁多料，用呢撈飯當然滋味又食得快。有一排媽媽試過用瑤柱，加埋蛋味出呢好淡，還是配蛋黃最正﹗

另一本人熱愛蒸蛋伴侶係魚腸和油炸鬼，蒸埋一碟真係有說不出的滋味，尤其是媽媽因為衛生問題已極少出手整呢味餸，更令人懷念~

2. 蛋撻/冰花燉蛋

只係一個有撻皮的蒸蛋變奏，嗜蒸蛋如命的本人自己愛屋及烏將之視為下午茶佳品。不論酥皮或聖X娜皮(唔知點形容，即係唔會食到一地都係，質感實啲的一種)都唔拘，因為我最愛是新鮮出爐時中間又香又甜又滑的蒸蛋，嘻嘻。

除了餅店入面的蛋撻，茶樓的迷你蛋撻都係本人熱愛點心，填點心紙時本人第一樣叫的唔係蝦餃燒賣而係蛋撻仔﹗(另一個必叫點心係奶皇包，最好係流沙的說…嘻嘻)不過可惜唔係間間茶樓都有…

再來一個蒸蛋變奏，冰花燉蛋係我去糖水店必叫的，仲要係凍既。雖然本人愛甜點，但幾抗拒甜到起痰的咩咩物物糊，而且唔係間間做得好食，最保險的就係叫燉蛋，若呢個甜品都做唔好，間舖可以摺埋了。

曾幾何時媽媽教過我整燉蛋，水要幾多蛋要幾多蒸幾耐，當年的實驗品出來都幾成功，話實呢個係極容易的甜品，係屋企失驚無神想食都整得出(屋企通常都會有蛋standby嘛)，不過年代久遠唔記得咗個比例，好耐無整了。

3. 煎蛋

呢個類別包括老麥煙肉蛋漢堡當中的煎蛋，餐蛋麵隻蛋(我愛"發"起的煎蛋)和早餐配腸仔的太陽蛋(一定要太陽蛋才夠風味)。蛋白邊煎燶了變脆身極香口，無論係配煙肉做漢堡，加出前一丁煮麵還是加腸仔(落大量美X鮮醬油)，都係人間極品，早餐必備。

4. 蛋球/芭夫

蛋球一係在傳統餅店買，要不就是飲茶叫的點心；內裡煙煙軔軔，外層沾滿砂糖，食落索索聲，諗起都想食﹗另外最近熱愛是芭夫，原味即係奶油的一種，咬落又係煙煙軔軔，加埋pat cream，又係食到停唔到口。

話說昨天行過灣仔某餅店見一眾令本人口水大流的蛋球，忍唔住拎電話出呢影，突然有個叔叔行出呢問我使唔使較光啲燈﹗嚇死我…唔通佢以為我係遊客？真係好客香港之道喎…

5. 打邊爐用的生蛋加豉油

呢個汁係沙士之前本人打親邊爐必備的，若然有蒜蓉的話更野味香口，至於點解係生雞蛋…我都唔知，乃係屋企教落的。在H5N1和沙士之後唔敢食生蛋了，所以打邊爐就只點豉油，鹹得要死，不其然想打隻蛋…

6. 粟米羹當中的蛋花

唔食粟米的本人卻極熱愛這個湯，重點是要有蛋花，"杰"身的湯裡面滲著軟綿綿的蛋白，口感一流，得有飲有得嚼，正﹗

7. 火腿炒蛋

炒蛋好百搭，無論係蝦仁、叉燒、午餐肉、火腿、豆角都係咁一流，本人最熱愛就係炒火腿，仲要炒得啲蛋有少少生，食落軟淋淋的(太熟的就乾身又硬，唔好食)，濕濕地熱辣辣的食落肚，連鼓油調味都唔使，又係一款一流早餐選擇。

8. 烚蛋，尤其是加入蓮子百合糖水中的

本人極愛吃加落糖水的烚蛋，反而極少就咁食或用呢整沙律。當蛋白會吸收糖水的味，撞埋本身的蛋味感覺好正，好難得嗜吃蛋黃的本人反為愛吃蛋白。除了糖水蛋，茶葉蛋和附屬炒粟子檔的鹽焗蛋，都係本人飛佛~

9. 煎年糕加蛋

據媽媽說加蛋煎年糕係為避免年糕癡鑊底；本人嗜好沾蛋煎來回幾轉，讓年糕面包著幾層厚厚的蛋，外面脆(咁樣來回煎沾上的蛋都煎到乾了)入面的年糕又香又軟，諗起都流口水。所以本人唔鐘意食茶樓的乾煎年糕，無蛋之餘阿姐同時煎其他糕，甜甜的年糕滿身都是蘿蔔糕或芋頭糕的殘骸，攪到又鹹又甜，不倫不類。年糕都係留番新年在家配以本人獨有的西多士式煎製法才食吧。

10. 蛋治

基本上本人極怕食濕的麵包(沾了汁的包或沾了水蒸氣的中式蒸包)，雪白的身體頓時灰點處處，好像發霉一樣，未吃已覺倒胃。唯獨蛋治，配上無烘過的方包(烘過反而唔好食﹗)，軟軟的方包吸了殘餘在煎蛋身上的油，淡淡的方包登時和香口的煎蛋變得相襯，若然能加多塊火腿就更PERFECT了。不過，蛋治係要趁煎蛋還熱(或暖)時食，否則軟軟的方包吸油後再凍埋一切神奇魔法頓失，變回會令本人反胃的發霉濕包，免了，謝謝。

說著說著，等我諗吓今晚食邊款蛋先，嘻嘻…

另一堆蛋：叮叮試食記2：黑白心太軟蛋糕