2006/10/05

城大遊記

今天又身痕到九龍塘的轉車到油麻地上堂,可是大塞車之下比預計時間遲了到步,再轉車都遲到了;走到火車站時忽然有奇想,咦,我好似好耐無返過偉大的 商大啦喎(我好似無正式講過我係讀呢間野架呵?﹗)…哼哼,我的走堂因子又發作,哼哼,誰叫出席率只需七十個巴先,不好好利用好像對唔住自己。偶爾享受越軌(我指走堂而已~)任性的樂趣是本人嗜好;就一鼓作氣,衝進久違的商大…

(條天橋好多人,趕時間之下快手影完走人…手震咗…)

1.攝於又一城入City隧道,係咪好有無記MTV feel呢?我無手震架,係企定定影,只是來往的人來去匆匆,出來只有人個影。想我當年返學放學和今人一樣來匆匆去匆匆,可能今日先係第一次好好睇真學校景物…

2. 步入教學樓,那貼著「推」的門依然可以拉。一入去左加兩邊多了兩幅壁畫,使唔使咁壯觀呀?那office(something like教務署咁既野)和那號稱「全亞洲單層最大圖書館」都係咁上吓,那中銀提款機和書店尚在,唔知係咪當年我日撳夜撳的那一部呢?再望一望民主牆,唔知係咪開學無耐都無咩特別,話晒之前網上見過有人貼「巴叔」,幾自由open呀﹗勁呀﹗無咩野望就上podium。

3. 一上電梯就見到呢舊野,呢舊野完全扭轉阿媽教落生日唔好送鐘比人的觀念,雖然話呢舊野係音樂的鐘,都係鐘丫,唔怪得佢show出呢後我就周身唔聚 財。而呢舊野擺既位置極之當眼的關係不禁引起本人注意,grad行禮那日卒之忍唔住近距離study一下,方發現(當時)原來有個牌寫住呢個鐘既來歷…真 係…唔該晒喎,咱們都係中國人你都整個鐘呢,啋﹗

4. 攝於有好多好味小食的cut price前,話說我初入學時啲express terminal係擺係左右Lecture Theater旁,如果無人排隊的話上網上得幾隱閉自在架。唔知係咪見啲人上得太開心,後來啲機就搬出路中心,無得挨牆check。見到有位金帽少女,唔知上邊支莊呢?﹗

5. 話說當年的LT全部用數字排,而家就見到有人名,都幾多添,會唔會好難記呢?﹗話時話,行咗一輪都唔見恆記,係搬咗定係摺咗?﹗(08後按:死囉…我老人痴呆呀…人家未畢業時…恆記已搬咗去圖書館入口隔雜…)話晒佢係當年等人約人的熱門等人location嘛。

6.Simple but artistic的dept so board…(個Soc又係攪呢啲野?﹗)

行完四樓順手走上五樓行吓,真係太耐無行過,在課室群中我竟有迷失的感覺,就像Yr.1前的summer一樣,被那五個顏色的zone弄得一頭霧水。算把啦,閃人。

7. 很想回味下南山出口又大坑行去太子搭車的沿途風光(因為本人唔鐘意搭地鐵), 想了很久,我當年從那兒走到下面的呢?CSC?ELC?唔鬼記得…記起有搭過的教學樓出面的電梯,應該可行的。行出教學樓…咦…當年的花槽全部無晒…死啦…幾時整架?﹗

8 & 9. 當年常行的路線--搭"車立" 到教學樓一樓出南山村出口直達大坑西村之後住太子奔往;有時一班人放學上堂前食tea食晏都常在南山村打"dun";一班人沿路嘻嘻哈哈是一樂事,一個人行也有一個人的樂趣,原來很多以前無留意的東西悄悄的改變中甚至已消失…

10 &11. 和我家附近的屋村一樣,小時候梗有一間係左近的「辦館」消失得無影無縱。南山的辦館是長大後讓我再嚐童年至愛粉筆糖、汽水糖(紅色一筒扮汽水罐拉環的)、魷魚絲等小吃。現在這邊的都關門大吉了,不勝唏噓…

12 & 13. 初來南山Hea的年代是幫襯傳統港式茶餐廳南豐,係嗰度撞口撞面都係同學仔,食既野亦食呢食去都係嗰啲,至常叫的就係牛扒餐(而家唔知仲有無呢?)--一塊薄薄的牛扒,多士,煎蛋(咁上下),其實都係嗰啲。

後來隔離開咗間品香樓簡直一身我地的耳目,殺死人菜式包括"鮑魚汁鱆魚雞粒炒飯"、泰式豬頸肉、椒鹽多春魚和西班牙朱古力,呢杯野其實係朱古力奶加pat cream,不過起個咁既名真係唔得你死﹗今日行過見到佢由南豐左邊的舖位擴展到右邊都開埋,實行左右夾攻,門口都仲有人等位就知幾受歡迎﹗可惜是,南豐右邊的舖位本來係間"蓮香樓"式(忘了名字)的老式茶樓,嗰度有唔理你的收銀嬸嬸(應該係老板娘),唔理你的小二伯伯,雖然service唔得但野食得,碟紅燒豆腐食極都食唔完,價錢又相宜~但最攪笑我行我素的嬸嬸呢頭推介完灌湯餃轉頭可以話你聽無,激死。

14 & 15. 步出平台,就見到南山商場的名,我成日想知呢個商場究竟係邊?我已行勻方圓百里的地訪都搵唔到個似商場的地方,唔會係頭先食野嗰個街市呀嘛?講開又講,我成日想知《烈火雄心》入面南山三虎的南山係咪呢個南山村?﹗(7/3/12後按:係呀﹗)

今日又有新問題,咩叫「香港平民屋宇有限公司」?﹗(18/05/2016後按:我到今日仲未解開呢個謎喎﹗)

16-18. 再行就到鬼咁大的公園,行到呢度已出緊汗,真係日日步行身體好,唔怪得當年的我鼻敏感好似無而家咁厲害﹗話時話,行過呢個唔知咩球的場時一股清香的草味迎面而來,青草味,好耐無聞過了﹗

19. 到太子了﹗為時一個多小時的無聊之旅隨著我抵達巴士站附近的這間老式參茸店完滿結束。雖然行到身水身汗又好鬼支力,但我竟有點意猶未盡…對,我還未到canteen朝拜一番﹗有機會有機會。

咁睇住當年的舊相補數先啦﹗哈哈…

撞鬼,打完都23點47分,差唔多中秋正日了,祝大家人月兩團圓啊~~
正宗雙黃蓮蓉月,送嘅﹗
*********************
關於我偉大的商大:
城大遊記2009鳥語花香升級版  31/08/09
我的商場大學  18/5/07 
178 

14 則留言:

  1. emotionicon

    6th Oct 2006 00:04 AM

    回覆刪除
    回覆
    1. 我又整隻兔仔先~~~

      人人都happy呀今日~~~


      6th Oct 2006 09:23 AM

      刪除
  2. 中秋節快樂...
    其實我現在都在那裡讀書...LLB...

    6th Oct 2006 02:51 AM

    回覆刪除
    回覆
    1. ohhhh…校友?﹗不過我係過去式了~

      6th Oct 2006 09:21 AM

      刪除
  3. 半夜食月餅, 你好勇呀~

    6th Oct 2006 09:53 AM

    回覆刪除
    回覆
    1. 興之所致嘛…屋企仲有幾個月餅等住清…食完個腩好恐怖﹗

      7th Oct 2006 16:45 PM

      刪除
  4. 中秋快樂!!!

    6th Oct 2006 14:55 PM

    回覆刪除
    回覆
    1. 大家咁話啦﹗﹗

      7th Oct 2006 16:45 PM

      刪除
  5. 曾幾何時,我o係city返過工o架,應該係我第一份兼最後一份長工,呵呵呵~

    6th Oct 2006 16:14 PM

    回覆刪除
    回覆
    1. ohhhhh…唔知有無撞見過呢…

      7th Oct 2006 16:46 PM

      刪除
  6. 中秋節快樂!
    今晚有咩節目呀?

    6th Oct 2006 19:05 PM

    回覆刪除
    回覆
    1. 和周生來個史無前例長的約會,渴睡…嘻嘻

      7th Oct 2006 16:46 PM

      刪除
  7. 呵呵呵~
    原來妳都係城大校友。。。真係「橋」喇

    唔係妳講我都唔知而家d lecture唔係用number排列...
    以前逢親廁所隔離都有部電腦俾人上網...
    仲有南山村的大排檔...

    真係「他鄉遇故知」。。。

    6th Oct 2006 21:16 PM

    回覆刪除
    回覆
    1. 我都係前日去先知咋,其實我都有年幾兩年無返過去…見佢咁就腳就行入去兜個圈~
      以前我地成日上網check分,經常長霸express terminal架…哈哈

      7th Oct 2006 16:48 PM

      刪除

要講幾句嗎?﹗XD