[港劇]最喜愛的回顧~4~民初劇類

如題，繼續寫。

京華春夢
以主題曲同個劇名的響亮度來說，應該是《萬水千山總是情》、《千王群英會》比較hit？呃，但小的睇完又無乜特別印象，反倒是《京華春夢》唔覺意午間重播時lap到就忍不住一路追落去，之後見到有官方vcd出仲買番屋企再煲大結局又再喊過…嗚。以港劇嚟講，呢套個大結局都算喊得我最慘(不過王者還是《一公升眼淚》了)…

Anyway，除了n年前重播的《家變》，我好似未睇過阿姐啲劇的，而一路印象佢都係啲剛強既女強人，點知燕秋竟然係外柔內剛的一類，估佢唔到。咁見《京華春夢》有劉松仁咪睇囉，當年阿姐和松哥都三張的年紀扮青春少艾梳孖辮著校服竟然又ok，仲要唔係濃妝抹艷那種，清秀那種喎﹗(潛台詞是：點解而家同樣係三張出頭的女藝人…個個啲妝濃到死人化妝咁，跟住隻眼連瞓覺都smoky eye架囉…高清吖嘛，我錯…)見二人撲晒蝶咁以係純純的愛情故事，又竟然有婚前性行為仲攪到奉子成婚，喺提出婚約到結婚那天燕秋暈到差啲被發現有咗是好緊張囉﹗跟住就急轉為家族劇，睇住金家又盛轉衰，好似睇緊迷你版《紅樓夢》咁，邊睇邊心up的，一開始鬼咁輕鬆以為係愛情劇的嘛，點知最後家散人亡又妻離子散。

呀，而我想說，演燕秋情敵的韓瑪莉姨姨…呃，唔好意思講句是自我有煲劇的印象以來，佢後生極都已經係媽媽級(爭在劇中仔女年紀幾大啫…)，巧京京﹗原來佢係有後生和靚過的﹗演刁蠻千金入木三分，討厭得想打佢幾巴。江毅叔叔自我有印象以來佢就係飛天蝙蝠柯鎮惡，呃，即係一開口就鬧人那種，要不就係時裝劇啲奸既股東…佢喺《京華》竟然唔係奸架喎﹗(最奸係大仔譚炳文…)仲要係長年患病的二少(又係二少﹗難道逢係二少都是病患嗎？笑)，佢過咗身後二少奶蘇杏旋離開金家獨自生活，都幾悲情的…當然最悲情係七少(劉松仁)要死…一家三口才相認就要天人永隔…哭死我了…呀，阿仔馮志豐真係演得好出色的說…

[雜談]我最「難忘」的電視劇角色…@TBB
我最喜歡的男演員(電視版)

流氓皇帝
雖然秋官名作無數，但我有印象都係睇過《笑看風雲》和《天地男兒》咋，佢最有名的《倚天》、《楚留香》、《書劍》我都沒看過(唔知vcd有無出番呢？)，咁某年見午間重播這套《流氓皇帝》好奇看一吓…呀﹗真係殺手都有小學同學，繼我發現原來韓mary姨姨後生時靚之後，司棋姐都好靚喎﹗(咁鬼叫我睇電視時佢地啲新劇都做媽媽了…)…其實故仔大綱甚麼的我不太記得了(又嚟話最喜愛但又唔記得內容…XD)。咁我記得係好好笑囉呢套劇，跟住朱錦春中六合彩，個號碼係1,2,3,4,5,6﹗

話時話，首「飲勝，咁至醒，飲晒落肚先算醒」係來自呢套劇既？

大頭綠衣鬥殭屍/殭屍福星
話實呢，我係好怕睇鬼片，細個被《胭脂扣》和《鬼新娘》嚇到傻咗，那些《殭屍先生》自然唔敢睇(但我在泡菜國睇電視他鄉遇故知又睇得好開心喎﹗)，堅驚的…。咁電視的尺度驚極有限…好啲。《大頭綠衣鬥殭屍》呢，我見到主角係錢小豪時都有一個驚的，哈哈，女主角係當年未減肥變金毛強的鄭天后，一人分飾兩角，大孖(？)飄雪係斯文但死咗既女鬼，飄紅係在生既細孖粗粗魯魯(咦，有啲似翁美玲套《生鏽橋王》，又係孖生又係一個斯文一個粗魯)…我懷疑是《浪族闊少爺》、《皇庭》之故當年我係ok鐘意睇鄭天后的…

Anyway，呢套野殭屍位我唔記得，我反而記得關寶慧個角色本癡戀錢小豪(而小豪哥係鐘意死咗既飄雪喎﹗)，求愛不成就著紅衣扮自殺，點知佢真係死咗化成厲鬼(recall晒我《鬼新娘》的恐怖回憶…)…嘩﹗當年睇時我勁驚架﹗跟住好似飄紅唔知點樣救錢小豪所以死咗…當時錢小豪對飄紅有感情的了…佢死咗後就等佢十八年…轉世後再追過佢…好似…無記有一水好似好鐘意呢啲轉世情緣(仲有《蜀山》伊麵和松松那套﹗)…轉世再續有少少畫蛇添足但吓吓死人又好慘既…

同埋我想話首主題曲好好聽。

至於《殭屍福星》…劇情是零記憶(我肯定是有殭屍的﹗嘩哈哈哈哈)，記得有呢套劇係因為…有陳妖lone先生配搭我當年勁熱愛的小環啊﹗

大鬧廣昌隆/情濃大地
淨係首《抱緊眼前人》已經加晒分啦(而家睇番個mv，真係好疑惑mv入面個男主角真係陳生？﹗)﹗同埋個故仔輕輕鬆鬆又有啲淒美咁，重要既係無殭屍，唔會嚇死我呀﹗

呢套劇舊文提過就不重覆太多了。

至於《情濃大地》…其實小的好鐘意睇《阿信》式死唔斷氣人生起跌悲喜交集但又正能量滿溫心的劇，但太《雷雨》我又受唔住…於是我是受唔住《萬里長情》的(好記得句「一家人要齊齊整整平平安安」，好似《酒是故鄉濃》那種(相對)無咁煽情會比較好…um。《情濃大地》特別有印象係…阿好(周海味)一個仔唔記得病死/失散定點，另一個仔因為老公(羅家良)誤會係青梅竹馬的二少(張兆輝…咦…終於唔係長期病患的二少)所生，於是妒忌起上來唔肯俾錢贖佢，救得番(也知道係自己所出)時已經為時已晚…好慘啊﹗…中段有個位係阿好嫁咗俾羅家良(忘了角色名)又對佢唔多好咁上吓，當張兆輝回鄉想話帶佢遠走高飛，阿好卻選擇跟老公一齊…然而最後主人翁卻因為老公想唔開而無咗個仔…哭得我好慘的(<呀…都好煽情)

um，前段其實相當《再見艷陽天》，個女主角又係由低做起，慘到無朋友又勁俾人恰，跟住去有錢人家打工慢慢被賞識，以為人生會先苦後甜的時候就遇上戰亂(二戰啦又係)…轉個頭…oh，老了﹗

同《京華春夢》一樣個大少又係蝦蝦霸霸的，我記得佢老婆(崔嘉寶)…是難得(演)一個好人(咦，這又跟《京華》一樣喎﹗)…

天涯歌女
其實我有呢套劇的vcd…(有郭富城嘛﹗)呃，印象告訴我《月兒彎彎照九州》(小時我一度懷疑是九洲紫菜的九洲)當時我是鐘意多啲的，但記憶告訴我關於套劇的劇情已經清空了…(其實我前一兩年係買了餅vcd翻睇既…)。um，兩套都係講歌手既，俾松松姐姐發揮佢歌喉順手出埋碟咁，因為一碟在手所以我只記得《天涯歌女》了…。其實唔睇真係唔記得是有郭天王(同《蜀山奇俠》)，我只記得有黎天王…而那年頭黎天王啲劇是相當不賴的(除了小的睇完又睇的《人在邊緣》和《今生無悔》，《回到唐山》((我竟然哼得出主題曲《恕未從俗》))和《當代男兒》…我記得喎﹗仲有睇到我一頭霧水的《原振俠》…首《願你今夜別離去》實在是太好聽了﹗雖然劇情我只記得啲女角陣容很強大…最爛的應該是《阿sir早晨》)…

OT晒…翻睇的時候先記番周旋之所以改藝名做周旋，是因為劇社個劇的其中一句歌詞「與敵人周旋於沙場上」﹗嘩﹗真係大發現﹗then最後小紅(即周旋)跟子華(黎老闆)個結局係好sad的…同埋呢，呢套劇一度令我以為民初啲女仔都係紮孖辮，到大個咗就會打散啲頭髮，到後來結婚就會電曲髮…而當年係點電曲髮既呢？﹗一個謎﹗(另外有套係有mention是用個在炭度燒熱的鐵棒電曲髮的…令我對曲髮有莫大恐懼…雖然之後我日日都用直髮夾…囧)

拳王賭至尊
順手寫埋個劇名喺度，so far咁多年都未有機會重溫。記憶中是好好睇的…但劇情零記憶(這個系列的特色是係咁話套劇好睇，但我係講唔出劇情內容…囧)…只記得有吳剛師傅和江欣燕…完…(囧﹗)

********************************
寫了一大爛餐終於完成，噢耶﹗下篇再續。

全集：
[港劇]最喜愛的回顧~1~《人在邊緣》 / 《今生無悔》
[港劇]最喜愛的回顧~2~古裝片(武俠片類)
[港劇]最喜愛的回顧~3~古裝片(非武俠劇類)
[港劇]最喜愛的回顧~5(完)~時裝片