咒怨輪迴之《殭屍》

我有無講過我由細個就好怕睇鬼片，特別係港產的，無論係鬼定係清裝的殭屍片我都一一華麗地避過，就因為細個去親戚屋企玩時…大人們竟然在看《鬼新娘》喎﹗大佬王小鳳個鬼樣我驚到而家，於是林正英的殭屍系列我避得都避，或者我已經好似修夏咁因為唔想記得所以選擇局部失憶了(硬要tag一tag某DIDI…XD)

any肥，聽見影評說豬奴這部新片玩了很多舊殭屍片的元素，大有致敬之意，咁我呢啲咁鐘意懷古的人就決定鼓起人生最大勇氣主動入場啦﹗

Search一search我的database，我僅餘的殭屍片記憶應該係無記的《大頭綠衣鬥殭屍》，又係錢小豪﹗這不是重點，重點是關寶慧角色的setting大有《鬼新娘》王小鳳的扮吊頸點知弄假成真化成厲鬼(仲要由頭紅到腳呀大佬﹗)…嚇到我…跟住就係完全唔驚的《殭屍福星》…譚小環和陳小東…驚得啲乜…之後的《我和殭屍有個約會》其實我係前兩年先睇的…那是後話了。

雖然說向八十年代殭屍片致敬，但我是無乜點睇過嘛，就當係支持吓港產片咁囉。但…我完全唔驚喎﹗除了放了很多殭屍片元素，背景是港式公屋，演員班底都是港星之外，根本就是《咒怨》、《貞子》啲朋友，呀，因為清水崇呀…呃，我想話日本的鬼片我唔驚喎，遠的《貞子》近的《鬼來電3》不是睇到瞓著就是睇到笑…囧﹗

期待是給人家的評語影響了，大家都話驚嘛，咁我好驚地入場囉，一嚟仲要整首細路唱的《鬼新娘》主題曲呀﹗毛管都棟晒啦…點知…除了陳友的道士得閒出嚟同啲怨靈呀殭屍打吓時會講到吓道士和殭屍的點點之外，大部份時間配樂、影像同隻鬼本身都係日式驚慓片…音效是得人驚的，做了個嚇人氣氛正要期待隻鬼點樣飄出嚟嚇我的時候…要製做唯美效果於是啲血絲呀鬼呀影吓都是慢慢飄出嚟…呃…點呀…

或者係我expectation錯了，或許劇組不是全心嚇人…哈。想當年啲港產鬼片之所以嚇到我死吓死吓，一來是背景就熟悉，二來是夠low tech，啲殭屍醜到無朋友，一味失驚無神標出嚟又打極唔死，跟住啲演員又交足戲整啲十萬年無瞓覺既鬼樣出嚟，嚇到無朋友…但而家…CG太美麗了…就算整埋啲紅眼呀白色無眼珠眼都唔驚囉…就算公屋呢個設定我們應該很有代入感，但…我未見過咁少電錶的電錶房…也沒有見過貨lift咁大的lift囉…

亮點是演員既，梅姨(鮑姐)對冬叔(吳耀漢)的老夫老妻之情所以不捨佢就咁死咗而中九叔圈套，俾佢令老公變成殭屍，佢推小白入廁所俾已成殭屍的冬叔吸佢童子血的一幕睇得人非常抽心，而佢兇狠地打死燕叔一幕又是一個驚嚇(梅姨呢個角色有可以發展成龍婆的潛質呀﹗)…至於阿鳳(惠英紅)的失心瘋女子，帶住個仔小白周圍食人家拜神的東東，原來有個慘痛過去，兇宅之所以成為兇宅就因為佢老公攪孖女而弄出兇案，佢返屋企接受唔到所以失心瘋了…呃…但去到佢拎住個ling ling搵小白(即阿仔)，意外打開了困住孖女兇靈的衣櫃時…suppose係高潮的嘛，我仲以為佢地兩個either上阿鳳身或者作惡報仇呀咁，車…上咗冬叔的殭屍身就無野啦？最後的阿友(陳友)跟錢小豪(佢角色…真係叫錢小豪…囧)合力整死隻殭屍…呃…有點拉時間囉…

除了很多血很多血和很多血，很多粗口很多粗口和很多粗口…呃，三級在那呢？學友人話齋，我好似看了個個幾鐘的mv…呃，看來想解除我的童年陰影…都係翻睇《鬼新娘》吧啦…囧﹗