2012/02/21

琴日大作戰~3:日能教材篇(貼圖總篇)

其實呢篇應該叫《敗家實錄~日能書本散錢記》。小的前後考咗3年,每年買10本,3年都30本啦﹗anyway,根據econ理論過去付出的錢就係sunk cost,唔關而家事的了(謎之聲:當年經濟的老師見我仲記得會唔會好安慰?)…anyanyway,就續前一篇大作戰,貼一吓陪小的走過考試之路的書吧。 

(OT謎之聲:一打sunk cost就諗起當年econ書sunk變suck的經典…忍不住要link一link…哈哈哈)

這兩本是第一套買的對策書(啊…對不起…我竟然把來源都記錯了…嗚呀…是…看這篇而得知的吧?)因為二級合格是靠背文型和語彙而騙回來的(就是從公開考試學回來的技能啦),於是決心多看全日文的書逼自己運用多一點,根基打好一點。這兩本圖都唔多幅(應該係無的),密密麻麻睇到頭都暈…呃…而,當中很多語彙莫講話日能,平時睇新聞上課看課文都唔多見,於是背背吓就無心機…到而家都仲有半本來吉的…(我成日都話中版書太多唔常見的字,但又說日能新制範圍廣了…好似好矛盾?﹗哈哈)

這是新制的了,這一套是比較全面的,一樣無圖得字密麻麻,但多了些解釋,練習也多一些,仲送塊紅色膠片方便溫習添。個人覺得這樣一套開始背文型和語彙的書一套就夠,唔使太多…同埋有樣野就係日本出的書呢,永遠有好多文型/生字(特別係副詞)從來都未見過(無論喺past paper定坊間的mock paper),查字典都查到暈,就算有例句都睇唔明…

呢兩本,我係由頭到尾go through了一次,將啲(我自覺)重要的字詞抄到簿上(而呢本簿就係我臨場考之前再望多次的最後溫習了…)…做晒啲exercise就pat埋一邊…無再睇過了…

其實我都唔知用開首兩套書來打底成效有幾高,但我記得n年前在工聯會上雞精班(3級時)個阿sir話背文型要背到一望就知佢乜意思,望題目時唔係諗個文型點解,諗都唔使諗一望就有個解釋在腦內,時間都用在睇邊個答案最似樣的說…都係架,尤其而家新制更加要活用,唔係以前咁直接…。

買一本解釋ok的文型書拎住嚟背(初初考時仲抄落小卡紙度隨身拎住背的說),in case做做吓練習唔記得點解可以拎出嚟揭(其實去到臨考,背咗年幾兩年…都不時要拎番本書出嚟查某個文型點解點應用的…囧﹗),坊間(通常係台版)有好多齋文型的,小的鐘意連埋語彙都有,感覺抵啲嘛﹗哈哈哈…你知啦,副詞和擬聲詞背到想喊的說,周不時都要拎番出嚟對照一番。

又說,文型手冊其實一本看門口就可以,大家都係那些文型然後唔同presentation,想all-in-one(如上圖左和中,不過日本出版的有個問題係厚重和永遠有好多十年唔見一次的文型…都唔知背唔背佢好),定係如右手邊那本handy啲(佢有出文型的,不過我只買了語彙)帶一本跟身做reference不賴的(或者,閣下做一個自家list也可以的)。

舊文說的395題語彙就係右邊藍色那本,真係做到頭暈。左邊那本台灣出的,舊制考完後先發現原來自己買咗。雖然係舊制,但呢啲幾百條生生不息六六無窮其實好有用,尤其是我呢啲永遠記唔實多一點少一點既人(我最討厭的擬聲詞呀﹗),做完395題,肯定會記多好多討厭的語彙,順手可以驗證吓睇完開首兩套語彙書之後有幾多成效,邊類字詞最差。呢款書舊1級的都唔拘,偶然在書店見到仲有舊制練習未賣得出的說。

呢兩本難得地平和handy的日本出版練習耶﹗佢係迷你版mock paper,每款題目都有,但題數就少啲,一本有30(好似係)個練習,又是一套可以重覆用的(小的係用本拍紙簿嚟寫答案,本書係留白,於是啲練習係可以做完又做做完又做同埋做完又做的說)。個人覺得呢兩本啲題目無開首兩套書啲內容咁「新奇」,比較貼近過往在past paper見到的語彙/文法內容的說…


這套也是大推,特別係聽解本書,佢首先係逐款聽解會出的題目類型分拆出來做練習,在答案本上有幾詳盡的解釋,再睇番script翻聽事半功倍(雖然試驗上小的還是低空飛過…囧﹗),聽解書我覺得還是用番日人出的好似比較好?反而語彙和文型練習可以用台或祖國的簡體版。

另外兩本漢字和文法型式類近開首兩套書,讀解我無買,實用性也不及聽解本書咁高。


除了上面粉藍色那本395題(我係咁叫那本書的),這個薄eat eat系列(我又的確係咁叫佢的)也相當不賴,跟上面黑色兩本型式相近,也是薄薄一本內藏十幾廿個練習,方便拎之餘內容也夠充實。其實讀解那本我係無做過的…聽解也不賴,不過把聲好難聽(這其實也是我鐘意做日本出版的聽解練習既原因…)…文型和語彙也相當不賴,夠多嘛…可以用來熟習題目模式。


溫得咁上下就開始成份paper計時做mock,其實台版的我覺得麻麻,有點太淺…


我記得10年轉新制首批上架的mock paper應該係圖中中間那本,但我唔太鐘意呢啲厚dup dup既mock paper(特別係中間那本),太重之餘(這個對我來說很重要),題目也沒出得很好。可能在新制初出時出版,沒太能掌握新考試內容吧,題目的範圍太窄…

右手邊那本反倒不錯,命唔命中就唔知,但確係能做到複習和鞏圍既功效。告訴你…左邊一本買咗未做過的…嗚﹗

從成本效益而言,呢啲厚dup dup只有5回(右邊那本好似有8回),雖然係有埋聽解cd,但百多差不多百中(甚至二百)的價錢嚟講如果內容不甚了了就有點浪費囉…

last but not least,我幾時都強烈推介一定要擺本喺屋企的舊制past paper。用開的真身俾我用奇怪紙包住就唔俾佢現真身了…。那本1991-2009真的很強大,除了做上面那些mock paper之外,每次準備考試最大的節目就係不停翻做舊制試卷,不過文字和文法就睇吓看倌們有無時間,因為舊制的問題十年如一日,答案翻炒度高,而且直接簡單,準備初期當熱身還可以的,反而是聽解啊﹗好癲,有啲年份超淺,有啲年份超深﹗完全打擊自信﹗但世上又邊度有練習好得過拎番考試當局的舊作出嚟練呢﹗

另外一本mock paper係祖國出的,幾廿蚊不妨整幾本來練習吓,而買的時候也沒理太多,求其啲圖唔好太樣衰,最好唔係黃油紙印刷…XDDDDDDDD。又說,比起台版出的mock paper,小的其實prefer祖國出品,覺得佢地貼得準啲,題目模式也較貼近考試內容。話晒…而家新制無past paper買嘛﹗(但祖國又名強國嘛,search一search好多真題可以搵到的,咁可以對照一吓囉~)

*******************************************************
一口氣喪打完一輪,係咁多先﹗

上一篇:琴日大作戰~2:日能教材篇
其實呢篇係跟紫熊大大約文來的:[韓文] 參考書‧教科書 - 總篇

13 則留言:

  1. 我好傷心啊~ 這兩本是第一套買的對策書(是…看這篇而得知的吧?)<< 紫色那本是我介紹給你, 甚至借了給你, 你覺得不錯所以自己買了一本, 然後又買了另外黃色那本.

    我回去哭了~

    紫熊

    回覆刪除
    回覆
    1. 啊…啊…啊…係呀係呀﹗啊…啊…啊…乖不要哭…係我老人癡呆了…嗚…

      刪除
  2. 喂喂, 我而家係屋企部機用firefox 用"名稱/網址"留言都一樣留唔到言, 咁應該唔關我司部機(用ie)事喎. 係留言格上邊出現一條紅線就停咗係度喎.

    你呢個問題另一個用 blogspot 的朋友都有. 你地駛唔駛研究下呢??

    紫熊

    回覆刪除
    回覆
    1. 咦…logout後用名稱/網址留言留到呀(呢兩個都係logout地留的…)

      典解會咁樣…看來要問吓其他blogger人先…奇怪…

      刪除
  3. 唔係可以揀身份留言咩?
    login住都可以揀用名稱/網址留呢

    回覆刪除
    回覆
    1. domotoiceko23/2/12 17:54

      紫大人說過留唔到言的問題,我試咗佢幾個留言方式…好奇怪,有啲可回覆但彈出的又唔可以click回覆…好煩…

      我而家logout淨係入名睇吓回唔回到…

      刪除
  4. 今日又得啦~ 可能21 日個日有問題吧?

    回覆刪除
    回覆
    1. 拍手拍手拍手﹗(這不是ppt effect…)

      um,因為選呢個嵌入模式的話回留言時可以click回覆嚟留,個留言會自動under本來的一個度,咁樣個presentation好organize…所以我係想keep住唔用多數blogger用家都用的彈出…嗚嗚…留到就太好了﹗

      刪除
  5. 謝謝你的詳細介紹!!
    小妹極討厭考試,所以都不知道自己在哪個LEVEL,然而好想深入小小學日文(起碼看得懂日文訪問之類的)
    可是坊間太多參考書不知從何入手(翻過的書都是混飯食的...)
    現在可以參考一下,真的很開心~

    回覆刪除
    回覆
    1. 你好~

      咦,如果你唔打算考日能,只希望學點來睇和聽,可以看這一篇:

      http://domotoiceko.blogspot.com/2012/02/4.html

      文中有些書適合用來自修的(唔知你會唔會去學校學啦),睇吓那堆書,再加上日文有漢字可以估估吓,應該有幫助的~

      努力啦~

      刪除
  6. 多謝介紹!
    日本版的封面好靚好吸引,但是祖國的就價錢好吸引,好難決擇啊!

    回覆刪除
    回覆
    1. 不用謝~

      睇吓你會唔會拎嚟拎去啦,日版精美但重身,我因為要返工所以在家溫的機會不多,於是很多時都prefer祖國的版本…輕啲嘛…咁講靚梗係日版架啦…

      刪除

要講幾句嗎?﹗XD