2011/09/05

突然懷舊之陳百強篇


是咁的,行圖書館時搵到隻《陳百強一生紫愛》,就借了番屋企聽…好奇怪有啲歌名睇落唔識聽時竟然叮一聲:呀﹗係呢首呀﹗咁…好奇怪…

《深愛著你》在本博出現率極高,一聽到副歌「時日如飛…今天在我心裡是充滿不退的記憶」就黯然神傷了…嗚…

**************************************************
先講一個題外話,丹尼哥哥當然係好歌連連,但小的係近十年先搵番佢既歌嚟聽(如《深愛著你》一開始係聽張智霖在某次live show的version,最近敬hins在澳門演唱會也唱了…巧開心~) …um,唔知點解,細個時將丹尼哥哥和鍾保羅攪亂了,記得鍾自殺後娛樂版係有好大篇幅的報導,某日返學之前食飯…娘用報紙墊枱俾我食啦…跟住那張就係報導了鍾的死訊既娛樂版…仲要有鍾先生的遺容…那一刻真係好驚好驚好驚(小的好細個時去爺爺喪禮,被那可怕的長生化妝嚇倒,從此好怕去大酒店,更拍見那些中式長生化妝…都唔知係那張娛樂版定那個化妝影響了…)…因為小的分不清二人嘛當年,就對丹尼哥哥的歌有種莫名的抗拒…

咁大一點梗係知二人邊個打邊個啦,再後一點才知原來二人共演過電影,世事真係好奇怪,那電影的三位主角竟然都…令人唏噓…

話說回頭,對於小童,家長確係要screen吓佢會接觸到既大眾傳播媒界呀…童年陰影會跟一世架﹗
**************************************************


聽到第一粒琴音已經暈了~(此時諗起《龍咁威》入面的《漣漪》…真係囧… 其實唔好笑囉…)((某次在圖書館睇到本講哥哥電影的書,話80年代初有很多青春勵志為主題的電影,哥哥通常演叛逆花0靚,丹尼哥哥就通常係傳統直正好學生的說…唉,攪到我有啲想睇《失業生》添…))


友人介紹要聽的(70年代出道的歌手無乜邊個唔唱英文歌呀呵?哥哥都出過張英文碟呢…)又是一首好聽到暈的…


其中一首聽《一生紫愛》時驚覺竟然有印象會識跟住唱的歌…我懷疑當年我係將《老鼠也移民》和呢首《神仙也移民》攪亂了… XDDDDDD。(MV入面啲白襪黑鞋是向MJ取經的嗎?((呀…MJ都唔喺度啦…))XDDDDD…聽聞《夜的心》是特別向MJ的《HUMAN NATURE》致敬的喎﹗)BTW…唔知點解我覺得《再見PUPPY LOVE》跟林珊珊的配搭有點詭異…是廣播劇的歌嗎?


不知何解一直將《粉紅色的一生》歌名套了《疾風》的歌詞…一路都唔明咁勵志的歌詞點解有個咁唔襯的歌名…OH(哈哈哈哈…以前聽人家DUP俾我的帶,歌名寫錯咗咪攪錯囉…無網上丫嘛當年…)…BTW…你管度搵到呢條哥哥CROSSOVER丹尼哥哥…好爆﹗


其實無睇過呢套劇的(對詹秉熙的印象也只限於偉大的95《神鵰》囉…睇番維基…佢而家竟然係福建省政治協商會議委員﹗)…只是單純的覺得首歌好好好好好好好好好聽…


UM,我輩中人講起《幾分鐘的約會》梗係不能不提梁GG陳小東的《初戀無限TOUCH》…除了最後陳小東alevel放榜走去同梁gigi講自己入到大學小的一直存有疑問…大學聯招根據偉大的維基說90年時已有喎,除非當年聯招同alevel同一日開結果啫,一係陳小東已經報咗大學?唔係無理由alevel才放榜就知自己入到大學架…(我係咪太認真呢?哈哈哈)

講番轉頭,首歌真係好正,將地車浪漫化了…(好在巴士都有倫伯的《情緣巴士站》…我支持巴士架﹗)呀…突然又好懷念地車仲叫地鐵的年代,仲有未有電腦廣播時,車長要自己講埋下個站係乜,當年試過聽到"the next station is Camp Chung" 好爆…


當年《義不容情》超hit,《一生何求》更唱到街知巷聞:冷氣佬隻抽,回頭多咗隻狗…哈哈哈﹗係《兒童王國》:兒童王國,做主角,快樂常有,與小丑劈友,劈甩咗隻手都好似未夠…之外另一首熱唱耶﹗(典解我當年會記埋啲咁既野架?﹗XDDDD)


《我和你》又係一隻聽隻碟時叮一聲「係呢首呀」﹗奇怪的是可以跟住哼甚至副歌時可以跟住唱…好奇怪…我諗係細個時聽帶聽過掛…((睇完條片…其實係咪個個演唱會都要講一次「上面/山頂既朋友你地好嘛?」…哈哈哈…同埋我想問點解啲歌手咁鐘意講「XXXX(歌名),送俾你地多謝﹗」…多謝甚麼送俾我甚麼呢…我俾錢聽你唱歌架喎﹗))


話說點解搵呢隻碟嚟聽呢,就係某日在收音機聽到呢首《感情到老》,好奇怪,到了副歌時竟然又可以跟住哼,覺得好好聽就記住歌名之後再搵番隻歌嚟聽,竟然俾我無啦啦搵到隻丹尼哥哥精選嚟聽喎﹗

**************************************************
等我繼續努力去發掘丹尼哥哥的好歌先…(本人SIDE CUT症又發作…好多拎獎金曲都被我SKIP了…哈哈哈…)

以上。

10 則留言:

  1. black lab15/3/12 09:57

    《再見puppy love》係當年一齣低成本電影《朱仔飽與棉花糖》嘅主題曲,林姍姍(現名為林珊珊)有份參演。話說 Danny 一向都係姍姍嘅偶像,姍姍未入行前已經以 fan 身份識咗 Danny,後來姍姍簽咗華納,大家同公司,自然有機會合唱啦。BTW,姍姍入行第一首歌《戀愛預告》就係 Danny 作俾佢嘅。

    5th Sep 2011 08:32 AM

    回覆刪除
    回覆
    1. 謝提供﹗難怪了,原來同一間公司,硬覺得佢二人大欖都扯唔埋的。而《一生紫愛》入面收錄咗丹尼哥哥自己唱番既《戀愛預告》,不過用咗震音腔嚟唱有啲奇怪…可能聽慣咗林珊珊啲少女情懷掛?﹗

      9th Sep 2011 09:49 AM

      刪除
  2. 我第一次買膠碟, 就是陳的首張大碟. 不過, 不知甚麽時候被人丟了!

    5th Sep 2011 08:44 AM

    回覆刪除
    回覆
    1. 咁可惜﹗﹗﹗﹗
      細個屋企無唱碟機,第一次買「唱片」係餅卡式帶嚟的…哈哈…

      9th Sep 2011 09:50 AM

      刪除
  3. 唔知點解我細個覺得陳百強唔識唱歌,可能因為佢同其他人唱法好唔同,比較接近自己聲。

    人家林珊珊未做南哥經理人前係有出唱片的…還未變師奶前…

    畫出彩虹仲有張曼玉同劉青雲,有影射馬榮成之嫌…

    5th Sep 2011 23:39 PM

    回覆刪除
    回覆
    1. 唱歌方法我無乜研究,不過我係鐘意佢把聲配鋼琴音,好淡淡然的,同青筋暴現震晒音又係另一種韻味…
      套劇一路我無睇過呀,只係好鐘意首主題曲…(是馬榮成?我以為係黃玉郎添…哈哈)

      9th Sep 2011 09:52 AM

      刪除
    2. 因為套劇出之前,馬仔離開阿玉郎,中華英雄變咗其他人接手,然後馬仔、馬仔妹同唔記得邊個遇襲囉,然後就有了天下。

      10th Sep 2011 11:34 AM

      刪除
    3. 我係咪要睇番轉《劃出彩虹》嚟增長知識?﹗哈哈…

      16th Sep 2011 10:36 AM

      刪除
  4. 陳百強正呀,我鍾意他的歌的,迷失中有著你,凝望,當我想起你等等重有好多好歌!
    其實,我細個時都覺得佢同鍾生都有似架,又其實我依家都唔係好記得鐘生咩樣了,因為好記得佢死時啲報紙影啲相係超嚇人囉

    6th Sep 2011 12:09 PM

    回覆刪除
    回覆
    1. 真係越數越多好歌呢﹗等我再努力搵吓佢啲碟嚟聽~呵。
      係呀,以前啲報紙呢,過身既名/藝人會影埋出殯時的遺容,仲要中式喪禮既化到塊面紅卜卜咁,細個睇睇埋就覺得好恐怖,加之於自殺過身之嘛,更驚…
      講講吓鍾生和丹尼哥哥都係斯斯文文既style…我以為得我覺得他們二人似樣咋~

      9th Sep 2011 09:56 AM

      刪除

要講幾句嗎?﹗XD