做個受歡迎的男士？

看金田一兄和紫熊大大講呢個topic講得咁開心，小的又想參一腳講一吓囉…

(主打係…我剛揭完《瞬間必殺50技--型男講座》，再望到金田一兄文中的行為…不禁諗起書中的圖文…會陰陰咀笑的說…)

又咁，要做到型/受歡迎係好難既，難怪要出咁多指南啦…

「大人になれていない男性～オフィス編～」(仍未成長為成人男性之辦公室篇)。

1. 穿西裝但揹背囊。背囊還是放得滿滿脹脹的。

揹背囊其實都ok既，我成日都見樓上IT公司的人用背囊放notebook，襯起西裝有種輕盈又優雅的感覺架喎。但重點是，請不要扣太多裝飾在袋上，又，請小心閣下財物，拉好拉鍊呀﹗見到閣下側袋度左一包曼補路右一疊六合彩/馬飛…個樣點優雅都假啦…

2. 辦公桌上放滿模型公仔。

我諗唔係擺hello mimi都ok掛？不過以我所見，我司的男生個位擺得最多既係…老m啲精品…

3. 熟讀少年漫畫雜誌，而且是一出即買的。

其實熟漫畫都係一個才能嚟架喎(小的不會否定自己的娛樂版功能就是了﹗呵)。其實日漫還是港漫也好，不要一卷野攝喺衫/褲袋或個袋度就好了。雖然，我司的男士多數係睇電腦野/打機的雜誌多…

講開又講，熟係一件事，點樣表達自己既pro係另一回事囉。最怕當大家漫無目的啱講到自己專業時，便有如滔滔江水連綿不絕，仲大件事過黃河缺堤…。更怕的是，當有人提出其他觀點時即以一千一萬個理由反駁之。更更怕的是，專選對自己專業知識的毫無概念的人發表雄圖偉論。更更更怕的是，自以為很專業的範疇其實了解一點也不深，換言之…係扮勁…

4. 嘴角出現謎一般的泡。

所以咪話女仔係又照鏡唔係又照鏡係姿整呀，儀容是很重要的說。雖然…講野講到咀角有謎一般的泡也太恐怖…咁呢位哥仔都應該檢討吓自己講野時係咪噴得太多口水…

啦啦啦，又講番照鏡啦，話實食完放真係要搵個藉口照照鏡，口水都可以抹走，但食完飯攝在牙縫的食物就唔係隨手可以整走嘛，飯後和同事對話見到對方口腔內的菜渣…呃…我想嘔呀唔該…

牙線係好重要的，ok﹗

5. 說什麼要是吵架的話絶對不會輸。尤其在被上司罵了一頓之後。

有咁勁的口才唔好去做律師？唔係跌落地「la」番渣沙就得啦。有point的話據理力爭都ok既，最怕係係又堅持唔係又堅持，呢啲係叫唔成熟囉，咁大個人，好應該明白人與人相處(特別係職場的相處)係要compromise既…

同埋，有錯就認，打就要企定我覺得更型…

「こんな28才はステキ！」(這樣的28歲太正啦!)。 (點解一定係28歲呢？)


第3位：辦公桌上放寵物照

我司好多男士都係放友人合照的說…狗仔貓仔反而係save喺手提，方便隨時同愛貓/狗之女同事分享…仲work過睇枱面的相架﹗

第2位：有工作能力的人

真係有至好呀，我最怕啲吹水唔抹咀、扮勁、得個講字、意見接受態度照舊、長氣、死唔斷氣、斷命追魂、語文能力差、email一大段卻睇唔明、永遠打嚟唔留voice mail、言之無物、無心裝載、求其、甩漏…(下刪一萬字…)

有入無出的黑洞族，而你永遠見佢準時放工食飯架喎…

第1位： 不覺意地表現出的關心

其實…有時…食飯/搭車/搭lift時很怕遇到啲點頭之交的同事，搭lift都好啲，共處一室只係一陣，講吓「今日天氣好好呀﹗」轉個頭就到，唔怕相對無雜言嘛。最惡頂是同車的時候，返工放工很眼瞓的嘛，加上大家又唔熟，話題實在係乏善足陳…而身邊的偶遇的同事人兄不停搵無聊野講…卒之就係行貨一問一答…心 裡唯有祈求快點到目的地落車啦…

*****************************************************

啊…其實上面講的不單止係男士架，男女通用的﹗我回帶，男女平等…哈﹗