2013/04/28

《僕等がいた》(我們的存在) 前篇

或者直譯《我們的存在》本地人會唔明吧?但戲名譯成《相愛的約定》真在是太娘了…如果譯成《戀之承諾》會唔會好啲?

上星期去看《東京家族》時看了預告片,完全唔明點解可以玩到兩個鐘仲要分上下集…雖然是粉但又驚悶…卒之算啦…我睇…咦,又ok,起碼無悶到想推銀(雖然我而家已經無推…)

又說,星期日早上場,竟然九成滿…而當中好多都是比較成熟的一輩…完全唔見後生仔喎﹗

不過重點唔係套戲…而係我完場之後的奇遇﹗

成套戲純過蒸餾水,最壞的一幕意圖獨處都爆笑收場…呀﹗初戀呀﹗純愛呀﹗

個故事看豆瓣的簡介啦,總之是很正路的setting,女一愛上了男一,而男一身邊有個女二死纏不休,而女一身邊又有個溫柔體貼的男二,而男二和男一係好友,佢就成為男一和女一之間的紅娘穿針引線(同時又強忍自己對女一的愛),是相當老套的,不過拍得人令景令,是相當有青春氣息的,那些歌唱比賽、文化祭、夏天的花火大會…真係使唔使咁青春呀﹗點解當年我高中時只有會考和高考…我的青春呀﹗

<--令男一回想不絕的前女友…一看…嘩﹗利智呀﹗

吉高我只看過《不能戀愛的理由》,本身唔太鐘意套劇所以沒有太大印象了。這部戲佢同斗真同學齊齊做超齡高中生…又ok喎﹗開朗活潑幾討人歡喜的…

至於斗真同學…太強了﹗27歲仲可以演高中生,重點是…當年都係27歲演高中生的長瀨大叔係擺明超齡去攪笑(我講緊《My boss my hero》),斗真驟眼看都ok…佢唔好笑﹗真係唔好笑﹗啲眼紋好勁…出賣咗佢啦﹗真係要keep吓先得,要好似某人咁成日full mask先得了…

好啦,呢個星期去睇埋個後篇
*******************************************************
重點來了。

話說完場時小的一心想飛撲去死手間時,隔離兩個位的一位洋人大叔無啦啦問我:呢套戲喺邊度拍,咁我話個故仔就係北海道,但我唔SURE個拍攝的場景係咪真係北海道啦,之後佢又問我點解知,我就話係睇維基啦…佢…好似唔知乜野係維基…囧﹗

ANY肥,因為END ROLL都END了,於是戲院的人就趕我地走,我就走出去去死手間,點知個叔叔一路行一路講,話個故事好唔合理咁,我好奇就問點解你咁覺得啦,佢就話有乜理由個男仔(斗真個角色)對個女仔(吉高)咁衰,個女仔都死心塌地,佢身邊明明有個好好的男仔(高岡)架嘛,好唔REALISTIC咁話,我話呢啲係純愛片嘛,FORMULA係咁架啦,唔係少女邊有FANTASY。但佢對我的解答好似好唔滿意,仲話美國愛情片合理得多…同埋佢屋企的事SOMEHOW似戲中斗真既經歷,所以先嚟睇喎。

傾傾吓我忍不住問佢你來自邊度…佢答:美國﹗噢﹗咁唔怪得啦…而,佢對住個咁崇日又唔鐘意老美主義的人來讚美美國片…我心諗你都算搵錯人了﹗又說,呢套係高中生愛的故事嘛,初戀通常都會被美化架啦,而且愛既野邊有得話LOGIC唔LOGIC,講LOGIC的話超雲就無理由會同小聰聰拍拖啦。跟住我腦中就浮起高中生愛的故事《吸血新世紀》了,白面仔,BELLA和狼人啲SETTING跟這部戲一樣的嘛﹗我諗個叔叔無睇過四集《吸》片了…

講講吓佢又講到自己旅居世界各地,覺得香港唔好住,美國、歐洲也不及以往,最好住的算是東京…呀﹗我應該開心定唔開心呢?聽佢怒踩香港係心酸一酸,但我又駁唔到佢…生活條件來說比起我細個時真係差了很多,當然…不硬去追求中產生活,應該都會搵到一片樂土既…。而東京,雖然我都好嚮往,但我又覺得個叔叔唔知人家都有很多社會的深層次矛盾,淨係社會老化、少子化、經濟低迷都帶來數之不盡的社會問題啦,我地去走馬看花梗係好架,到你住落就係另一回事啦…

UM,最後佢問我係咪有"STUDY"日本電影,佢話佢唔係好熟…哈哈﹗STUDY咁嚴重﹗我係為睇斗真先睇之嘛﹗好膚淺架咋﹗因為我地企喺《東京家族》的POSTER前面,佢就問呢套係咪喜劇(都有笑位既﹗),仲要問了好多次﹗(我就答了好多次係套溫心的家族片…),佢應該適合睇《東》多過呢套《相》,睇《東》可以了解吓日本而家家庭社會模式,MORE OR LESS都係香港人面對緊的問題…佢好似稍為放心了…佢好驚驚又中雷嗎?(咁係佢EXPECTATION錯了喎﹗)

睇睇埋埋啲旅行文學既,啲作者都話好鐘意跟當地人傾吓計了解多啲…唔知呢個叔叔會唔會將我講的野當成日本電影認知的基礎?(我偉大了﹗介紹電影和文化背景喎﹗哈哈哈)等我下次去日本時又試吓睇場戲跟住捉個令仔傾吓計…

18 則留言:

  1. 我最憎啲人响人哋國家住又踩人哋國家,唔鍾意咪走囉,邊個歡迎你,我响首爾都撞過呢啲人,不知所謂,你家下有咩貢獻要人回饋你?

    回覆刪除
    回覆
    1. re:brownie

      討論不緊要,不過唔使咁pushy要我認同佢囉…我想話好多荷里活片都唔realistic的說…
      佢有話喺香港遇到祖國同胞覺得佢地無教養又猴琴,我話過去成百年得最後廿幾年係改革開放,要同國際接軌要時間既,想當年香港人七八十年代剛剛有錢開始去外地時都係好失禮架啦,文化既野係要時間培養…佢又好唔想認同我…哈哈。

      刪除
    2. 呢番說話我都有同一個在內地出生,但已在多個國家住過的網友說過,她也不認同。

      刪除
    3. re:brownie

      哈哈,我自己講完都疾了一疾…但樂觀都無壞吧,只是向好的方向諗,如果幾十年後仲有自由神喺老尖當街同細路or尿尿就真係大獲了…

      刪除
  2. 原來你係去睇呢套,係噗浪睇到你話唔悶仲諗斗真同學最近有新影嗎?!

    呢套的斗真同學靚仔到想尖叫!!不過呢套上集好純愛,下集好狗血好悶。。。等你分享下集先

    回覆刪除
    回覆
    1. re:鈴

      哈哈﹗我真係有去睇…我粉到不能呢…
      斗真同學貢係令仔(馬上把仲基哥哥和聰哥忘掉了),不過佢第一吓喺天台的令仔場口令到好些叔叔笑了…XDDDDD
      下集會狗血?﹗大囧﹗ANY肥,雖然我覺得呢部會可以喺網路度睇到,但還是入戲院支持吓…之前《人間失格》和《源氏物語》都好似無喺香港上的說…

      刪除
  3. 前篇戲情已經比較美好,想睇多d斗真與吉高一齊的片段,女二夾係中間好煩=,=
    這部戲拍到兩人好美(?)!!!
    後篇就好唔明白斗真的想法...

    兩人上日本綜藝宣傳呢部戲,兩人的互動超好笑,感覺兩人私底下幾friendXDD

    回覆刪除
    回覆
    1. RE:小木

      我成功爭取睇埋下集啦,個女二繼續係好討厭,點解佢會咁煩死纏斗真不放架﹗
      或者因為佢不顧媽媽而去攪到媽媽跳樓,所以當女二同佢講BYE BYE時佢驚會重演所以佢選擇留在女二身邊了?

      我好耐無追綜藝啦…為了斗真係咪要睇吓…XD

      刪除
  4. 想看.但找不到.....
    希望不要那麼快下畫.我要14號才有時間呀-.-

    回覆刪除
    回覆
    1. RE:星晴

      哈哈哈…偉大的祖國可能幫到你呀﹗

      刪除
    2. 搵過一次..唔多覺...最多俾套動畫我睇~~
      遲D再搵過XDXD

      原來香港依家得一間戲院上=.="

      刪除
    3. RE:星晴

      你SEARCH"我們的存在"就有架啦~~~~~
      一間之餘而且啲時間唔係幾好,呢個星期我決定去睇《白金數據》先囉…

      刪除
    4. 原來我應該多打"電影"2隻字就易搵D..
      依家搵到喇....呢幾日食飯時睇下先^^

      thanks 冰子!

      刪除
    5. re:星晴

      睇劇的時候係不禁要讚美祖國的強大…
      我而家成日出去食飯,好少喺公司度嘆飯盒煲劇了…

      刪除
  5. 點解我冇啦啦click 呢部呢?明明我都冇睇?

    咁所以無啦啦睇到洋人個 part. 作為香港人, 我都覺得香港唔好住, 尤其而家好多自由痕, 銅鑼灣同旺角都逼爆人 (押韻的!) 不過咁囉, 我又不見得東京好好住, 因為其實冇咩人真係住東京架, 除咗瞓街個啲, 因為東京住宅用地好貴, 所謂住東京其實係住東京邊皮, 日日坐個幾兩個鐘返東京返工, 我又覺得好辛苦. 即係話, 其實每個地方都有長處短處, 睇下你個preference 係點啫.

    回覆刪除
    回覆
    1. RE:紫熊

      那個鬼佬叔叔真係幾爆炸架,佢應該滿肚不滿要搵人嚟講,咁啱又有個無聊人企喺度(我)聽佢講喎,我完全係好客香港之道囉,應該令佢對香港加番啲分吧﹗

      東京物價高,比起上嚟香港可能易生活少少,不過我都係去走馬看花,未試過住落,住過之後又可能係另一回事了…呀﹗我最接受唔到係去邊都係搭地車方便啲呀﹗我鐘意搭巴士架嘛﹗XD

      刪除
  6. Please,想問下,邊度有後篇看?板主你在香港看吧?!
    很想看耶!

    回覆刪除
    回覆
    1. RE:Arthur Wai

      打呢套戲的國內譯法,會有很多方法的呢…
      我上下集都是在香港戲院看的,之後上網搵片源截番圖的說…

      刪除

要講幾句嗎?﹗XD