2013/04/21

平而不淡~《東京家族》

真係不枉小的外勤完衝過海睇,完場後仲有登徒(浪子?)來個簡單的導賞會,加之於之前從報紙博客看過關於這部戲的點點滴滴(雖然,看點是…聰哥﹗哈哈哈),um,如果說之前《狼少年》是因為愛情而感動,這部就是親情而感動…um,家族之間的絆果然是很重要﹗(握拳﹗)
(圖片刧自豆瓣)

無呀,兩部片無關係的,只係咁啱都係電影節上過,看到博客的介紹很有興趣但飛已賣完就唯有等正場或出碟…咦,又好快有正場啦喎﹗不過場次很少啦,只有元素、電影中心或葛柑的百老匯咋…
電影裡其實無出現過呢張合照…我幾驚又好似《忠烈楊家將》咁將過身的人變黑色…大囧﹗

其實我無睇過小津安二郎的原版,只是看山田洋次版的介紹覺得幾吸引(同埋有聰哥﹗哈哈哈),睇埋預告片覺得很不錯就留意幾時有得睇啦。呀…我在劇透了,原版係1953年拍的,講戰後老爸老媽到東京探大仔和二女,三仔於戰時死了剩下三家嫂,大仔和二女因為事忙不能太照顧父母,於是呢個重任就落在三家嫂身上,後來媽媽急病過身,大家先發現人生係咁無常(轟隆﹗)…就重新思考家族的意義﹗
新版變成2012年的東京,大哥幸一(西村雅彦)開診所(字幕寫了趁所呀﹗),二女(中嶋朋子)開salon,角色仲多了個女婿幫忙打理店務,三仔(聰哥)翻生不過就成了吊兒郎當令父母心掛掛的一個,三家嫂(蒼井優)就變成三仔的女友。

弄得我好想睇番舊版睇吓有乜分別添﹗登徒話舊版鄉下人到東京驚訝東京係不夜城,新版媽媽驚訝大仔個大仔夜晚都要去補習班,仲要拎埋便當添,之後說東京的小朋友真係辛苦了,算係對照呀呵?

先唔理新舊版(sorry我太鐘意比較),成套戲講既其實係大家身邊都會發生的事,因為忙而唔得閒照顧父母,even佢地係遠道而來的;大仔和二女諗住夾錢俾父母住橫濱高級酒店會令佢地高興,但其實父母係想癡住仔女一齊閒話家常吓;大仔說陪父母遊車河時遇上急診,二女又說要準備夏祭,turn out,最肯陪父母遊山玩水的就係最令父母放心唔落的三仔;最後,在媽媽喪事辦完後陪爸爸的都係三仔和女友…嗚…

媽媽係個typical慈母角色,爸爸係惡的嘛(三仔昌次講過好多次細個時點俾阿爸鬧和嚴格要求…),見佢以為昌次屋企一定亂過亂世佳人,點之勁整齊,又發現原來有個「義工」為佢打理,個「義工」又相當唔錯時,個表情開心到呢,第二日返去大仔屋企時係咁同爸爸講「嚟到東京真係好啦」咁,唔知係咪有個傳說話如果老人家心願已了…可能就會好快走…媽媽真係轉個頭就喺樓梯暈倒,當晚就過身了…嗚…突然從好溫馨開心變成傷心…哭死我了…

當大仔唔可以同父母遊車河,大仔的細仔發老皮時,女麻女麻就同佢出去玩…嘩﹗好似我細個時公公婆婆的行為啊﹗因為見得少嘛,大家不免生疏,係靠出去行吓街食吓野買吓玩具打吓關係。見到小勇一開始叫女麻女麻做「おばあさん」,之後叫「おばあちゃん」,親密起上來了﹗

登徒講起過,發現有個好有趣的處理,就在媽媽喺昌次屋企一晚之後另一朝,佢就因為擔心昌次無金錢觀念所以拎了疊錢俾女友紀子,話有佢照顧個仔就放心云云。結尾爸爸將媽媽的手錶送俾紀子,說送俾佢做留念,跟住又話阿仔有紀子照顧好放心。原本喺父母眼中長不大又不中用的阿仔,從紀子呢個女仔身上令父母睇得出原來佢有自己生存的一套,大個了…於是連爸爸都放心了…

爸爸和紀子對話的一場,連我隔離個雄斗斗的哥哥仔都忍唔住要索鼻呢…嗚


風吹純姨姨﹗

又說部戲應該係2011年4月開的,因為311事件延遲了一年,於是戲入面加入了爸爸老朋友個老婆個媽媽被海水沖走,昌次和紀子就在311時做義工而認識的,跟爸爸飲酒個朋友又係咁話可能最後一次最後一次,有一野係灰咗…囧,人生無常啊﹗

但轉頭爸爸就嘔到二女一店都係…哈哈…

雖然媽媽係過咗身,不過整部片都係樂觀既,爸爸唔肯去東京,不過鄉下地方有人情味,隔離左右互相守望咁,應該…生活唔成問題吧?(我認真咗?)

另,橫濱酒店啲強大祖國遊人在高呼傾計又同bell boy商討咁,令爸爸媽媽瞓唔到覺(登徒說原版是去熱海旅行,夜晚因為隔離在打牌唱歌所以瞓唔到),笑係笑咗但心頭都係一酸,祖國同胞喺其他國家人眼中還…trouble maker了…噢…

感動之餘…讓我誤焦點一吓…幸一發音跟光一一樣…成套戲都在koichi koichi的…好開心呀…XDDD(當我回家時想親一親媽媽…佢開口就鬧我洗衫唔分多幾個洗衫袋了…嚇得小的急急走人…囧﹗)

4 則留言:

  1. 嘩好感動啊!之前完全無聽過呢部戲!仲有聰哥添!等我又搵來睇下先!

    回覆刪除
    回覆
    1. RE:鈴

      我都係電影節時先知有呢套戲,本身我頗喜歡聰哥的,有佢就想睇,再睇埋個STORYLINE覺得幾唔錯,就決定去睇啦~~~
      真係好感動的,唔止我,我隔離個哥哥仔都睇到眼濕濕…

      刪除
  2. 之前看了小津安二郎原版。阿媽急病過身後,那些本來冷血的仍然是冷血囉,沒有什麼思考家族的意義,只是個女即刻猴住阿媽啲和服。然後我發現原節子啲手毛好長(小姐你看到哪裡了?)。

    回覆刪除
    回覆
    1. RE:brownie

      我都想睇吓小津的舊版呢…
      哈哈哈哈﹗係咪五十年代唔興剃毛呀﹗你竟然留意到原節子的手毛﹗哈哈哈﹗那是黑白片喎﹗(雖然我都成日留意無聊野﹗)
      阿登徒說山田洋次係樂觀主義者,所以我諗佢改了少少人物的思路,家姐阿哥都有回頭是岸咁…

      刪除

要講幾句嗎?﹗XD