2013/03/22

東京下町遊(1)~衣食住行

我回來了~~~~~呀,真係唔出門都唔知其實我咁唔了解咱們特區…哈哈哈。





  • 呢個中咗伏,多年嚟睇日劇呢三月倒四月仲凍凍地架嘛,跟住見氣溫有成十幾二十度,係驚凍多過熱於是輕裝一度之餘再執多兩件冷衫…
  • 典知去到係熱爆﹗一件TEE加件外套已經流晒汗…大佬我仲有條頸巾又驚死凍手拎件冷衫…錯晒囉…
  • 好衰唔衰周圍節能慳冷氣,熱到呢…差啲想叫個啤酒消暑…
  • 好啦,熱到成身汗,跟住有一晚落雨﹗大到個程度係濕晒逼住去買遮…我撞佢個鬼,買完入商場買少少野出番嚟之後停咗雨喎﹗
  • 就係又出汗又淋雨,本來諗住著一兩日的衣服都一陣味,換無可換(也用之作為藉口…XD),去親愛的U記執件衫著啦,我又撞佢個鬼丫…最後一日竟然朝早8度﹗凍到流鼻水呀﹗多晒﹗
  • 就因為前幾天熱到爆,櫻花都狂開了(小的無啦啦就可以賞埋一份,本來預咗無的說),這是BONUS了嗎?
  • 我咁(扮)日本人,在壽司國當然大快朵頤了…
  • 雖然(我自覺)識日文,但關乎飲食的用語就…人家問我咁咁咁定點點點…我就是估咁咁咁係乜和點點點係乜,跟住很傻地答要前者或後者,之後就等食物來到揭盅的一刻…巧緊張啊﹗
  • 好多店都係點完餐,上完菜就放低張單食完自己行埋櫃台俾錢,於是連手指打圈圈都唔使,咦,在日本有人明甚麼是手指打圈圈了?
  • 雖然之前是刨了堆書,不過最後是除了一兩間看完雙眼發光覺得好想去的外,都係行到邊睇到邊,見到邊間啱FEEL就入去食。
  • 喫茶店和和風洋食幫襯得最多,特色嘛,就說我是去尋找昭和風味(不過食唔到資生堂餐廳了…嗚)
  • 呀﹗我無食到咖哩耶﹗
  • 但我有食MOS BURGER和史打北…XD
  • 上年去泡菜國時最鐘意每晚都到便利店買飲料,本來今次都想照做,但第一晚飲完個雪印咖啡竟然失眠,眼光光CANDY CRUSH到兩點幾,唔係咁有料到嘛?明明好重奶味和甜到爆架﹗
  • 難怪看酒井順子(定新井一二三說的?)說東京是很適合一個人出走的地方,很多小食店方便一個人食野,又唔會因為你一個人霸兩個位而眼超超的…
  • 因為《虎與龍》所以鎖定了淺草,然後看了一輪選了家一邊係淺草寺一邊望到晴空塔…但TURN OUT入到房時係兩樣都望唔到﹗大囧﹗
  • 見啲COMMENT都說間房和張床好窄,但單人房(係,我咁大個人第一時一個人出走…XD)嚟講張床可以扮雨宮螢碌來碌去添喎﹗
  • 呃,網址說行5-10分鐘…係我雙手FING FING的情況囉,拖住個喼行15分鐘都唔止耶﹗不過從車站行過係一條直路,好易認就真既。
  • 好攪笑櫃桶內藏浴衣一件,嚴重OVERSIZE那種,難度浴衣都與YOYOYO 街頭一番?
  • 房租唔包早餐的,但貪得意試了一轉,1050yen嚟講…um,都係落商店街食soba或去MOS BURGER食個早餐好了…
  • 遠都唔係最重要,最慘係淺草個站無電梯,係LIFT和扶手電梯都無,去的時候個喼一半滿都仲可以一手抽起,走的時候乜都塞晒入去,真係想喊﹗上面說臨走一天突然凍番嘛?係呀,因此我是加了衣,但抽多幾抽…都成身汗了…我囧
  • 但如果附近的兩家酒店不是平很多,住番呢家都OK既…就因為佢遠,所以次次都順手兜吓呢兜吓路先返酒店,就貢貢吓貢熟了雷門一帶地型…哈,我巧叻﹗
  • 點解從我知道呢個世界有樣野叫「機場巴士」的時候我就以為係通宵既呢?因為我懶醒選了個早機去晚機返的機票,早…係8點幾,即係6點幾要去到啦,THEN 4點幾5點就要出門口…無地車嘛,也無機場快線,連巴士都無﹗天呀﹗咁總有人要坐夜機架(原諒今宵我告別了?)?END UP,係搭的士…
  • 個司機以為我係遊客好攪笑地同我講英文…佢以為我係邊度人呢?
  • 而我不知道那班機原來是香港和西雅圖路線,中途停東京而已,難怪咁好有電視睇,我睇了不下十幾套戲喎﹗(不過只有一套是睇得晒的),啲空姐空少又港人又洋人又有日人,令唔令就見仁見智啦,我想問的是,點解佢地有一百幾十款制服?
  • UM,初時看東京的地車網我真係頭暈,我是地車白癡呀﹗在九龍轉車都可以轉錯的(太耐無搭了﹗哈哈哈)…但去到又OK喎,啲指示又幾清楚,雖然唔及泡菜國咁整晒號碼咁簡單(始終九十幾間公司RUN呀啲路線),不過自己手拎住個路線圖跟住望番車站邊個月台,都相當易搵…
  • 出機場呢,因為酒店在淺草自然是考慮京成上野線,NEX+SUICA的優惠爆抵都享受唔到了。跟住就係SKYLINER和ACCESS了,ACCESS京淺草但時間唔啱,就只有搭SKYLINER在上野轉車,而上野時我又唔想吓吓去買單程,就要搵買SUICA的地方…個叔叔指了我上JR車站…呀﹗又是一個怒行。話說回來,天天都在上野轉車,但是最後一天才認真行吓上野公園…去花見呀﹗~
  • KEON、METRO和JR都俾我搭勻了,東武呢就因為好攰而懶搭去看吓晴空搭,唔係差唔多搭埋的了﹗
  • 去到自由之丘時見到尾站係橫濱真係想去睇吓…太癲啦呵?﹗哈哈哈
  • 雖說一日劵係抵啲,不過我地點做BASE而無理路線,所以每天都喂SUICA食一張一千蚊,由佢DO爆啦…
  • 好想試吓坐巴士的,但見親啲站都唔啱既﹗
  • 呀,我去租了張SOFTBANK的上網卡,怒上的,但METRO銀座線一「捐」山窿就收唔到,反而JR收得好好喎﹗好詭異﹗

寫住咁多先,再續﹗

8 則留言:

  1. 自遊行最慘係離開時要自己搬行李落地下鐵的樓梯,上年去韓國旅行離開那一天,除了大喼外,我還有背囊和一個手提袋,於是上午我要把背囊和手提袋先寄存在地下鐵的儲存箱內,然後下午再回民宿拿走大喼再匯合其他行李去搭機鐵,唔係一袋二袋行落樓梯都幾狼狽。 其實我曾想過找有電梯的出口的,但可能要走一大段路才去到那個出口,加上又人生路不熟,而最重要的原因是只需行一段樓梯而已,辛苦極有限,免得麻煩,還是依最簡單的方法好了。

    回覆刪除
    回覆
    1. RE:五月

      係呀﹗去的時候個喼唔滿係見步如飛的,但到走的時候個喼滿晒,就咁行都要用力推,行樓梯就更想死,最慘係喺淺草站完全無電梯,好辛苦搵到一步但唔係去我想搭那條線的站…完全O咀了…掉轉頭行又用好力了,跟住我就係一鼓作氣咁抽起個喼頂完那十幾級樓梯…完全覺得係突破自己極限…尋找自我的方法呀﹗

      刪除
  2. 我都好想去資生堂餐廳扮貴婦(重點誤)
    自從早排聖誕試左佢地個聖誕禮盒就好想去試均佢地D CAKE

    回覆刪除
    回覆
    1. re:散漫生活

      其實我那幾天轉車會經銀座的,不過行過一轉後覺得好似行緊尖沙咀,太多名牌我買唔起所以無心機搵資生堂,轉頭就走番去淺草搵野食了…
      資生堂餐廳下次去要體會吓先…聽聞lunch係平啲的…

      刪除
  3. 我定左係9月去東京,我想問每日1000YEN用唔同得晒???

    回覆刪除
    回覆
    1. re:喂丁

      1000?一餐飯都唔止喎﹗
      通常一餐飯千零yen倒啦,搭一轉地鐵就百零yen,唔買野齋食(兩餐正餐)和搭車周圍去,5000yen一日都可以既…

      刪除
  4. 講錯,係每日1000yen入suica卡用唔用得晒???

    回覆刪除
    回覆
    1. re:喂丁

      我搭metro銀座線百零二百yen一程,1000yen可以坐到五、六程倒,去得遠啲要轉線就唔止,1000yen應該都可以頂到大半日既…

      刪除

要講幾句嗎?﹗XD