琴日大作戰~1：日能復仇記

誓要去…入刀山…傲氣壯…過千關…

昨日之日不可留，亂我之事多煩憂(唔好意思，睇得《洪武三十二》多，個人都古裝咗…)，為了一雪兩分的前恥，小的從知道又衰咗之後就開始地獄式(我自己覺得啫)溫習，希望今年7月得手，從此脫難﹗

(UM，琴既係鋼琴的琴，日就係日能的日，呢兩個係小的今年兩大目標，都說2011好刺激架啦~)

自從日能2010年轉新制，果然是把小的這個只會背死書的人玩謝了。

先看看這個：

以前四份卷：文字、文法、讀解、聽解(恕小的懶不打日文漢字了)，只要總分加起來達到合格點就可以，但現在有基準點，即是要每分卷(總分60)達到19分或以上，再在合格點方面合格方可。我等國人一向靠漢字食糊，然後聽解一塌糊塗，就不可以搏慒了…。唯一的好處是有line-curved，不用自負盈虧；二是卷數少咗，精神上是負擔少一點既…

1. 言語知識

將舊制的文字．語彙和文法二卷合而為一，對只懂背書不求甚解的人(如我)就慘了。文字方面減少了漢字和平假對換(即執分題)，保留最難的俾個字你跟住4句例句選番用得啱的一句，然後有同義字、(繼續有的)填充應用，以前執分分到笑的同音字無咗(帽子和死亡都唔知出了幾多千次…)，無啦，要認真背生字啦…嗚…  

文法以前也是執分執到笑，背晒文型落肚就得嘛，選擇的答案十居其九都係文型嚟既，mei埋眼都識 選咁濟。而家都仲有10(定15呢？)呢類題目，不過答案就可能係對話，無咁直接了。除了要知道文型通常接乜之外，仲要識埋個語氣、場口formal唔formal嚟選，10年第二回就係咁，睇住啲題目睇到發脾氣…都唔識既…囧﹗ 新制既新野包括5條重組句子題，反而呢個就ok喎，總之背熟文型就好易估。最後既新野就係一篇文入面選答案填窿，呢個我做親mock exam都屍橫遍野的，一來通常4個答案都好鬼似(小的又鐘意憑感覺估邊個順口啲)，二來要熟生字再對前文後理，成日好多tricky位的…嗚…。 基於小的聽解差，讀解好神經刀，所以呢份卷一定唔可以死。聽解假設只能拎25分，而讀解頂多28(10年兩次我都係緊緊貼30而已…囧)，即是說言語知識呢份卷要47分或以上…咁死啦…死得啦… 以前我只係做晒啲past paper和背晒啲文型就算。唔得啦，而家要新思維呀…囧。第一就係痛下決心勁背生字，動詞和形容/形動其實都ok，考嚟考去都係那些，最慘係我記得好差的 XXったり和擬聲詞，記到想喊，似樣之餘意思又差鬼咁遠…真係好易中招的說…好啦…我背…囧。我諗，熟啲生字應該可以順手救一救聽解和讀解掛？

2. 讀解

除了一貫的長短文外，新野有兩篇對照(叫統合理解喎)和一篇情報檢索，不外乎係廣告、notice再叫你search番啲資料出嚟，對照那兩篇不算太難的，反而最後一題情報檢索就好tricky，睇少一句半句都隨時中招，好似以前UE practical skills 咁有個例子，咁咁咁既情況，你就要睇番篇文嚟答番佢要幾多錢、幾多日呀咁，要好小心睇，但我一向大意嘛…

呢份卷我會大概6月倒先煲相關的練習和mock paper，現下當務之急都係提升語彙能力嘛﹗

3. 聽解

聽解我一路都麻麻的，第一次19，第二次竟然29喎﹗(拉-curved之神奇啊﹗) 題目有舊制沿用開的有圖題和無圖題，跟住有乜鬼概要理解，講完一大堆野，跟住先講答案你聽(問題紙上係無的)；即時應答，二人一個問，答那個就會讀三句， 要即時估邊個係答案；之後統合理解就係聽一篇超長的野，再聽問題選答案(也是問題紙上乜都無的)，聽到瞓著咁濟…囧﹗ 小的一路都係懶認真狂寫notes的，但發現係完全唔work(狠眼地說)，估得寫就估唔到聽，寧願聽真啲每一句佢講乜，除非係概要/統合理解就真係要寫低啲keyword既。無圖題和即時應答邊聽邊答就可以了…

我諗…係咪應該睇番多啲日劇呢？習慣番個tempo？um，以前通常係好正經一男一女在對話嘛，而家夠膽死扮eva喎…死唔死…囧﹗
**********************************************

繼續努力了~~~~

(27/09/11後按：唉…又衰咗啦…又要再入多次刀山啦陰公﹗)
(10/2/12又後按：終於都大仇得報啦﹗yeah﹗click番入嚟睇…做乜咁多錯字…嘩﹗肯定係受打擊太大所以癡咗線…)

合格点と基準点
題目sample
琴日大作戰~2：日能教材篇