中學術科奇怪項目

我也不知點統稱音樂、美術、家政、體育呢啲主要科以外的科目，除了體育(慘痛的往事啊﹗)我係勁憎外，其他幾科本人可是樂在其中，可以發揮創意自由發揮嘛；其他科目不是不喜歡，只是中英數是主要科，肥咗好大劑，有壓力有壓力有壓力；history、epa等不是不喜歡(其實很喜歡)，不過去到考試就 乜樂趣都無；地理、IS非不為也是不能也…。所以我最buy的就是可以從平時課業儲平均分，不用被考試測驗幾野定生死的科目。

又咁講，吾校雖然都幾落力谷學生課業，但在術科方面都幾有心機…雖然…啟唔啟發到學生的小宇宙是另外一回事啦…

呃錢堂係本人最開心最enjoy的堂，唯一一科完全無考試無筆試嘛…(吾校係癡線到PE和Music都有筆試的說…足球越位的定義…係有notes要讀的…癡線架)

雕刻刀﹗年年都要玩，年年都見血收場…。玩法是自備一盒雕刻刀，在一塊都頗硬的膠板(死啦…我好似在講粗口？﹗XDDDD)上刻圖案，然後塗上顏料，上舖畫紙乙張， 拎去個碌碌機壓一個圈，板上的圖案就會印在紙上架啦﹗…點解年年都見血呢？就係因為這塊野頗硬吓的…咁我又唔記得把刀係利過普通cutter很多的…刻唔到就出力推…咪中招囉…。亦因為咁，浪費很多膠板的…(這是不能重用項目…) 

這個，完全係小學用薯仔整圖章的升級加強版…

兩生花version仲有喺厚厚的透明膠片上界圖案，之後舖紙落碌碌機，不過很易界穿，同埋因為透明而成日唔知自己界得啱唔啱…

發泡膠﹗有發泡膠就通常有佢既好朋友天拿水，將之點在發泡膠上「la」出各式坑紋，再上色就完成作物的說。shape可以係一塊板，也有一條尤如兩頭圓的圓柱體，整條發泡膠應該有呎幾兩呎咁長…啦啦啦，見到呢個shape就造就本人的一件得意之作…話說當年大口仔有款原子筆也是兩頭圓的，蓋和筆頭都是白色，中間筆身就係支芯的顏色，那時本人可是很喜歡這款原子筆…見到條發泡膠係呢個shape靈機一觸跟住枝筆的details整了一枝放大版…

不過我的創意不太得到老師的欣賞…那舊野得分很低啊…miss，你睇吓而家滿街都係日常用品的放大縮細版啊﹗睇吓我走得幾前﹗

陶泥﹗其實我最enjoy就係將一pat水咁既野搓到變一團泥，做法就係不停拎起一pat水再大力pat番落枱面，呢個真係超級有效的解壓方法，發洩內心的暴力因子啊﹗又不會傷害別人喎，幾好呀﹗當年老師係叫驚敏感的人去買醫生手套…不過搓搓吓會gel住隻手套的說…還是用手先夠暢快…同埋，整呢啲野可是奉旨yap高衫袖，which這個行為平時係嚴禁架﹗

只係搓完泥後整成品就…囧。我地柴娃娃係無得扮《人鬼情未了》玩機的，要自己落手整的…本人年年都係整杯…十足十小學整紙「lim」土(撞鬼囉…唔鬼記得晒啲字點寫…)。咁那隻hea hea的杯在miss評完分後…咪扑碎再浸在水中等下一手人解壓囉…(吾校是相當環保的…)

我記得都係我啲自覺充滿創意但不太為miss欣賞的大作(其實我床下底仲收埋中三時的畫簿…)…鬼咩，整鬼做怪我就得，正經的素描、水彩我係唔得的…

家政堂整的野其實都好正路，needlework不外乎買吓布車衫(好似係裇衫…)和裙咁，miss俾完分派番俾衫俾我之後…就會分屍整俾芭比著…最記得係整十字繡，本人的作品…係超人心口個鑽石logo…一大個S那個…那個miss欣賞我的創意啊…有A架﹗cookery就悶囉，超recipe做，完全沒有發揮的空間…超級失望﹗

音樂堂… 其實無乜特別裝備，咁本人又不通音律，走去考要填五線譜的筆試係超級苦差乙件(仲會拉低平均分添﹗)，兼之，本人對唱k就有興趣，但音樂書唱嚟唱去都係 《Somewhere out there》、《歌聲魅影》、《Autumn Leaves》…很悶…要不就唱吾校教會的系列會歌…小學唱到中學…囧﹗(但都係唔多明唱乜…)

比較有趣就係吹牧童笛… 曾幾何時本人好有熱誠去練，仲有神心到買流行曲的歌書(當年坊間係有呢啲書的，有齊各式hit歌的歌譜…應該係俾人彈結他…)，邊首練得好的話就拿來考 practical…這項目可是挽回本人不通音律而致呢科頻臨肥佬既境況架…當年本人至拿手的一曲…係《天空之城》首音樂﹗哈…(點都好過求位識彈琴的同學叫佢同我伴奏跟住大庭廣眾獨唱既…)

體育堂呢…其實都係打波跑步乜乜盛盛，最奇怪的項目是每年總有幾堂要玩體操，隨之而來就要帶對叫技巧鞋的東東，呢對野都唔知邊度有技巧可言，薄eat eat的布鞋乙對，我返學對襪隨時厚過佢，跳落地時大力啲腳板底會勁痛… 又話時話…行路成日無啦啦左腳cake右腳的本人…居然可以走上平衡木行足一程…中間仲要坐低轉身…好有成就感架﹗(我是運動白痴就是了…)需知…本人可是跨欄和跳馬不行…打擊自信…

更奇怪的係韻律操， 人家奧運體操項目玩的那個貌甚保齡球但過度輕巧極難控制的波，玩法是大家跟(沒甚韻律…我很討厭那miss就是了…)miss學了幾野精要(不外乎玩這個球的pose…)，跟音樂跳跳跳(啲波係四散周圍飛的…太輕了…要從左手順住背脊fing俾右手…係mission impossible…)，之後就要一組人(係一組人﹗仲亂…仲周圍飛﹗)自己度一隻韻律操出嚟…當年吾組好認真(大家都怕這個項目肥佬？﹗)，度好招式後就走去公園(係公園﹗)度練習(﹗﹗﹗﹗仲要朝早…勁似人家晨操﹗)好不安的說…玩親這個項目…我就會諗起楊過被小龍女困在籠裡面捉雀仔…啲雀仔亂飛… 就如上堂時個球不受控亂飛一樣…

好在吾校無泳池，唔係要玩韻律泳我就死俾你睇﹗
***********************************************
我的快樂母校生活：

星期日=下廚日
寧死也不穿的…校褸
運動嘛…
奇趣學科、另類課外活動
Computer Studies / Computer Application