中招路線圖~童星篇

講完男和女仔，唔爭在講埋童星和綠葉吧…(這毫無疑問是呃文的行為…)

先講一吓我喜歡的童星。其實唔係中唔中招既…(純粹順住個series咁去啫)，正確一點來說是我最喜歡的童星~馮志豐小朋友啊﹗(雖然佢已經唔係小朋友好耐…)

(幾經辛苦搵番餅《射鵰英雄傳》出嚟cap圖之後…我發現…我cap的角度和帶銀公主網頁中那幅幾乎一樣﹗大家都認為這個角度馮小朋友最可愛？﹗)

(講開又講，之前講女仔時講到福田麻由子，佢都係14歲咋喎，係咪應該放番落童星篇度呢？)

話說馮志豐的劇我都是90年代中後看的，當時佢應該讀緊浸會傳理系(我曾經很憧憬的學系啊﹗咁你明點解我咁buy佢啦﹗)，過幾年仲入埋商台做《18樓C座》(我屋企係唔聽商台的，這是我後來才知道的…)。個順序係看看《射鵰英雄傳》、再到《神鵰俠侶》、然後到《京華春夢》，這3部馮小朋友都好突出吓的，即係呢，啲演技係好自然(對比演華箏和郭芙的小朋友李嘉穎…)唔浮誇但你又唔會覺得老積(人細鬼大的小朋友我不太BUY的…可愛得來有點老積…係咪有點矛盾呢？又要演 得自然但又唔俾人老積喎…)，特別係《京華春夢》(仲有呢篇：[港劇]最喜愛的回顧~4~民初劇類)，馮小朋友係最後兩集才出現，佢喺破廟度同阿爸劉松仁相認，得到媽媽燕秋確認佢就係阿爸時撲埋去攬佢那一野…超感人的…那一幕…我睇親都喊架﹗(哈，我又回這部劇的帶了…)

引起本人興趣去起呢個小朋友底的契機係《人在邊緣》，話說這部劇有個角色叫Mary，係阿龍哥(黎天王)的少年犯倉友，佢懦弱成日被人恰，雖然係配角但都幾搶的說(其實我覺得佢演得很好，非常入型入格的說…)。睇睇吓…喂，呢個哥哥仔個樣好熟口面喎﹗查一查…咦，和童年郭靖及楊過係同一人耶﹗(在無互聯網的年代都俾我查到，勁呢﹗)再之後睇到篇報導，說馮小朋友長大後見自己慢慢由大俠童年演到變配角123，覺得沒太大發展於是說專心讀書去，之後做過 電影編劇，再當上DJ。

看著看著，童星之路不易行啊﹗想來好似馮寶寶、唐寧那些可以由小朋友過渡到去大人的真沒多個。一， 可能大家對小時樣子太有印象，長大後外型反而尤有不及(光頭仔？)；二，可能是小時可愛，大個外型和以前還是一樣可愛(安達佑實？)，沒成熟味道之餘反而似老人精…唉呀，這真是童星的哀歌呀…

前幾年見鄧一君轉去做保險(是吧？佢好似拍過部短片電影的說…仲搵咗古天樂做添？)，荷里活界的Macaulay Culkin小弟(其實佢大過我架喎…XDDDDD)仲衰…又吸毒又盛咁，其實入過娛樂圈這樣五光十色的行業，係咪真係好難番轉頭做番普通人呢…人們都說童星在長到青春期上下進入尷尬期，演小朋友不是，演大人又不夠成熟，很多時童星星途就暫告一段落，大個一點讀完中學仲有興趣演戲的就回歸再演一吓。不過童年撈得掂，唔代表觀眾在你大個時一樣buy，累積的觀眾緣唔可以帶到去大個…真無不感概。

見到阿泳漢泳豪繼續努力演出真係要向佢地致敬﹗(不過我仲未分得出邊個先係CK姐男友喎…囧…)

TBB童星近年的飛佛是《烈火雄心2》演瑤瑤的成珈瑩，佢同王喜演兩父女真係超合拍的說(最緊要係佢塊面豬done…可愛得想meet吓…)前幾年的《天幕下的蠢人》時見佢大個咗好多了，維一維基，原來佢仲有拍劇的說…啊…中學生學業要緊啊﹗

 題一個外話， 我常覺得這位齋藤隆成小朋友很有馮小朋友當年的風釆(隆成小弟真係小朋友來的，96年出世架…)，外型有丁點咁多多的相象，重點是演技一樣咁自然流暢，看《唯愛》時我甚至覺得佢演技好過佢那位忙著耍帥的男主角哥哥…

只係唔知隆成小朋友長大後靚唔靚仔呢？(我還是很膚淺…哈哈…)

21/02/16後按：嘩…睇相…完全唔認得…