2008/05/29

[港劇]其實《銀樓金粉》是一套笑片

此劇英文名原來叫"The Silver Chamber of Sorrows"…

我沒有特別追這套,只是夜晚在家吃飯時偶然看一看,上星期五晚播大結局,庸懶之下就坐下看一看,看畢…減壓功效一流…我不停睇到笑…

自從《金枝》成功後,TBB一路不停自我細胞分裂一堆《胭脂水粉》、《火舞黃瓜》出來,方程式是一樣的,總之是一堆女人你鬥我我鬥你就行,只是出來效果就差 之千里。《金》對白、劇情相對比較講究(回帶:到今時今日我還覺得如妃、皇后,甚或淳貴人演出都比視后來得出色,只係有啲野係不由人,無得講),不如之後 的A貨,穿了古裝,卻說時裝片對白…今次《銀》也如是,原來「我想同你喺埋一齊」由民初講到而家的了?那可真是句老情話啊。

是我口味問題,還是主流觀眾較BUY呢,阿秋菊、大奶奶和三太太演出比平時浮誇十倍,要不是超大的肢體動作,就是面容扭曲的面部表情,就算劇情是自言自語…又唔通這是佛山的民風?orz。另一疑問,秋菊明明是丫環,但她的塗的睫毛液比千金小姐尚可怡還要勁…好得人驚…

兩小時的結局,suppose是尚家家族悲劇的高峰,老爺秦沛得知獨生子被自己女兒殺死,大老婆得知內情又包庇個衰女,三老婆心繫二叔,害他以為對方腹中塊肉是二叔經手,一下子打死自己親骨肉…最後放火燒屋一鑊熟,多悲壯呀﹗但我又唔明,明明間房已被反鎖,老爺又在外舖滿柴枝,但房內竟然有一角沒被火燒,可 以讓一班女人在房內高聲呼叫…,安全島來的嗎?之後仲俾佢地爆窗逃生?﹗乜野火…燒得咁慢…

又話說老爺以為二叔想害自己, 於是設計害死二叔和周至誠,據說是在車子煞車制下了手腳,劇情也講他們的車子高速行駛(係用了快鏡﹗民初版《頭文字D》嗎?),全家的女人都以為他們必死 無疑,三太更為此發難要向老爺報復,和至誠有情意的秋菊在逃生後見到二叔和至誠二人無事無幹回來,竟然只說了句「你無事就好了﹗」…咁平靜既?﹗這不是重點,最強都是他們跳車(注意那個車速是有快鏡配合,「理應」很高速…還要不能煞車…)後無事無幹,還以腳代車返尚家大宅救老爺…既然他們的腳那麼神,去廣州又為何要坐車呢?﹗

整個結局,以為會死的不死,死完又翻生番,兼且是無事無幹的,很神,只有老爺就真係死咗囉。我.笑.了…(同時我媽也笑了…啲人總係無啦啦彈出來的…)

我想當年的年青一代開始受西方思想影響,想追求自由戀愛,但舊一輩同時信奉有盲婚啞嫁,雙方時有衝突,要不也不會有《家春秋》、《雷雨》那些家門不幸的悲劇寫吧。但阿大奶奶一把火燒完屋就說封建被破除云云,又是很神,多年思想一下子就沒了,真開明。封建思想…應該是後世人對當時的人的看法吧?﹗

家燕姐無時無刻不皺眉,又不時"mak"大個口…不知怎的我反而覺得演二太太的陳秀珠比家燕姐更有大奶奶的氣勢和氣質,她失心瘋後又變番天真無邪的妹仔,個 人覺得她演得比不時mak大個口的大奶奶好…。還記得《金》時她演的皇后行出來很有霸氣的,又或者,劇本是特別安排大奶奶屬善良的一群,人善被是妹仔出身的二奶奶欺?﹗三太太伍姑娘角色最多愛恨交纏,最大發揮,只嫌面容太浮誇,使唔使倒毒藥進香爐都要一擠出陰毒表情講(係真係講出來的…)和咒老爺…好像驚死人唔知佢係奸咁。至於平時常走音的二老爺,出奇都無乜走,不過表情…應該是非不為也是不能也,硬擠極都擠不出應該的表情,又是一個笑點。不過,TBB的劇…也不能要求太多吧…

這個結局,讓我過了一個充滿歡樂的晚上,值得賦文一篇以作留念。

要看禮教如何吃人,還是睇廿幾年前的《京華春夢》吧。

銀樓金粉@維基

10 則留言:

  1. 呀主人成日屈我話我好鍾意睇呢類戲, (只因我鍾意睇《金枝》咋喎, btw 《金枝》幾多年前先, 同咩人擔正先) 咁我唯有去究明一下我係咪好鍾意睇啦. 但我係次次頂到賣第一次廣告就走入房睇日/美劇.
    點解tbb 台的演員咁勁, 演技浮誇到如斯地步? 唯一一個我欣賞係大老爺羅. 陳秀珠都唔錯. 其餘人士都好難頂, 其實tbb 有冇諗過開番藝員再培訓班呀?

    29th May 2008 15:25 PM

    回覆刪除
    回覆
    1. 小聲:佢係咪將「呢類戲」和韓/台劇撈埋咗?
      大聲:雖然都係tbb出品,不過金枝好睇好多,我會稱後來者(如上列的兩套)為a貨,畫虎不成反類犬…
      楊c琪我一向都覺得佢誇誇地,家燕姐係一貫咁誇,人家說這是民初版大契,我覺得在氣度方面已差很遠,大奶奶係個壓唔住細太既囉…
      陳秀珠我覺得得架,佢係輕輕一個眼神已勁乞人憎,好戲囉…(我經鐘意睇《金」入面皇后和如妃舌劍唇槍的說…)

      29th May 2008 18:16 PM

      刪除

  2. 我家大少爺小肥因為自出娘胎都未看過這種婆媽劇,所以是津津有味的。:)

    29th May 2008 22:32 PM

    回覆刪除
    回覆
    1. 叫佢睇埋《胭脂水粉》、《火舞黃瓜》啦,笑片三部曲呀﹗

      30th May 2008 09:40 AM

      刪除
  3. 帕拉汀10/2/13 20:12

    最後一集,見尚老爺臨死前的一掌,力量大得可以把伍姑娘逼離火場,真是無言!

    29th May 2008 23:04 PM

    回覆刪除
    回覆
    1. 同埋我唔明點解啲火humhum聲伍姑娘都可以唔死…
      話死的人總係可以生勾勾無事咁行番出呢,很神奇的﹗

      30th May 2008 09:41 AM

      刪除
  4. 靜靜地 ..細鈿聲講比妳知, 我其實好迷金枝的.

    29th May 2008 23:24 PM

    回覆刪除
    回覆
    1. 其實我都好迷架,本身我鐘意睇古裝片,正經的歷史特別是清裝片更甚,睇得台灣/大陸制作多,好頂唔順無記啲爛清裝片(特別是服裝上的hea),金枝係難得各方面都認真,我特登買咗套碟翻煲架﹗

      30th May 2008 09:43 AM

      刪除
  5. 我又要細聲講,金枝好好睇law,係我第一套一晚煲幾集咁捱夜睇晒的tbb劇...
    果陣我對阿淳貴人完全改觀...反而視后就真係唔得喇
    (但係果陣呢我d 同學話套劇名似鹹片所以唔睇.....orz)
    之後果批東施真係全部唔得...

    30th May 2008 09:12 AM

    回覆刪除
    回覆
    1. 我地大聲啲講啦:金枝真係好好睇呀﹗
      大結局那晚我係同啲fr過馬交飲飲食食,到差唔多做既時候就仆返酒店睇的說﹗
      我之前都唔多鐘意淳貴人啲戲,金枝入面佢真係做得好好,想愛又不能愛…嘩,啲眼神幾悲哀呀…
      視后我覺得浮誇…
      (個名其實真係幾似鹹片…哈哈,初初我以為係清宮氣數錄那些講風水既添呀…)
      之後的東施(這個叫法很正…),笑片來的…

      30th May 2008 09:45 AM

      刪除

要講幾句嗎?﹗XD