2014/06/29

《東京小屋》~紅色的屋頂是帶著神秘…

本來沒特別打算看,但見卡士有松隆子和妻夫木聰即刻想睇咗。難得仲未落畫就算要過海都睇啦…呀,山田洋次,上次睇《東京家族》都要過海的呀﹗我真神心﹗

Any肥,兩部片都有妻夫木聰,但邊看邊想起的不是《東京家族》,反而是《永遠的零》。



平而不淡人情細膩跟《東京家族》是一脈相承既,而望住上次做孻仔今次做細佬的聰哥,上次陪阿媽(和阿爸)今次陪姨媽(婆?),上次有女友蒼井優,今次有木村文乃,噢﹗不同的是…聰哥今次降呢做大學生…仲要係未畢業那種…噢﹗佢又再後生點了﹗

um,不停讓我想到《永遠的零》,是因為年代都係圍繞二戰年代,又是後輩搵長輩再搵出真相,一開始又是一個葬禮,《永》係搵出外公膽小背後的真情啦,《東京小屋》就慘囉,女主角時子(松隆子)個仔幾廿年後遇到女傭多紀(黑木華)的後人健史(妻夫木聰)時,卻得知自己阿媽堅係有偷情…噢…

《永》入面做孫的健太郎(又係健﹗)challenge那年代點解啲人會咁狂熱戰爭,《東京小屋》似乎有個答案。要有這樣氣候至有各樣妖獸嘛…(這首歌好好用﹗哈哈),經歷了關東大地震人們都不敢投資驚損手,扭曲風氣讓軍國主義抬頭(就說正常年代應該不會有人選希魔吧?),南京事變(是事變不是侵略喎﹗)日本人係去百貨買野,又覺得在中國的戰事很快打完,又覺得美國不會得閒理太平洋戰線,仲歌舞昇平…雖然劇情之後都有講配給呀盛咁,但慘極還是有個譜,跟從戰場士兵出發的《永》完全兩碼子…當健史說姨媽(婆?)太美化戰爭時,老年多紀反擊說咁我當年見證的係咁嘛…呀又係喎,每個人經歷都不一樣時寫出來的東西自然也不一樣…

這就讓我有點糾結…宮部咁辛苦保命為了回來見松乃和清子…時子你掛住攪婚外情﹗吼﹗(<--太投入了…拖出去打)

就說個故仔係多紀婆婆回憶自己少年時喺平井一家打工的日子,戲名的小屋企指平井一家新起的紅色屋頂小屋,在關東大地震之後當時的人都不敢大興土木,平井卻敢起了關精緻又sharp醒的小屋,次次影親間屋都好似卡通片森林大宅咁既feel,襯起平井一家好似好有品味咁。但原來係平井先生(片岡孝太郎)借銀行錢起的…跟住我心諗…咦,打完仗仲使唔使還?

無聊一吓,戲中間講少爺恭一有病天天都要去按摩,話說地點在日本橋,極遠的。跟住我就好奇啦…記起之前去青梅時見過個勁耐世紀的山手線圖…雖然唔知係乜年代的…咦,又真係無乜幾多個站,難怪時子一聽多紀話天天帶少爺去時噢了咀囉…

um,套戲其實沒有太多感情起伏,最多就係平井先生除了工作還是工作,讓時子氣悶。當佢遇到丈夫公司的年輕設計師及板倉正治(吉岡秀隆),發現大家志同道合竟然熱戀起上來(而平井先生竟然沒發覺?還是佢當唔知?)…最大的轉折位都係板倉要上戰場,夫人想同佢見最後一面,多紀阻止說可以幫佢帶信,而夫人寫的那封情人多紀最後收起讓二人沒見得成面。最後,平井夫婦在戰火中死去,板倉戰後回來成了畫家,畫展中展示了一幅紅色小屋的畫,板倉自己飄向喺閣樓的時子和多紀…呀…其實我都同恭一少爺一樣,以為板倉會喜歡多紀的…

就說是多紀的少女日記,喺佢眼中夫人的事當然是天大的事…但在我眼裡…呃…我好似偷睇人家日記咁…呃…

其實…我不太受得到吉岡的文青造型,反倒是隆子姐姐又令咗,曲髮加和服很昭和很令呢…

唔知係咪睇《永遠的零》太投入,又有《東京家族》先入為主,這部其實我都睇得開心的,但總係覺得爭咁啲野…呃…係咪聰哥太少戲份呢?定係呢水小的太like准一哥…哈哈哈…

4 則留言:

  1. 見到個題目名忍唔位笑出來, 外子話你可能和我們差不多年紀.
    不過我相信只是你喜歡懷舊嘢, 你應該比我後生得多呢.

    回覆刪除
    回覆
    1. RE:Saman Man

      其實我唔細架啦…八十後囉~

      因為我細時阿娘唔係睇電視就係聽歌,所以好多劇/歌都細細個聽/睇落會一路記得,就算忘記了大個後偶然聽/睇番都會即刻RECALL番,其實好多劇我係睇重播架﹗哈哈哈…同埋後來喺圖書館搵番CD儲番全集咁…

      刪除
  2. ......點解頭先打完的字無哂....
    我係七十後, 所以一定老過你囉.
    不過因為細個家人管得緊, 又無零用錢, 所以好多年青人做的事, 我依家才有空間做番...e.g. 追日劇, 迷偶像, 和買書睇....不過學日文就因為返完工無精神, 所以只係不斷買書返來, 但睇極都仲係五十音咁囉, 太失敗了.

    回覆刪除
    回覆
    1. re:Saman Man

      好似話唔知乜野符號會食字?

      少少啫都係,唔係老好多啫…哈哈

      我娘只要唔阻礙讀書就唔理我迷偶像,細個最唔開心都係考試無得睇電視,當年零用唔多只能抽吓yes卡買吓yes,聽歌都係dup帶咋,cd要中學先買的說。所以好多碟都係入u零用多咗去二手店度買的…哈…

      我當年學日文就係為了迷偶像﹗雖然到而家都係未聽得切歌詞和睇得明劇集,但睇得明小說和雜誌已經好開心了…哈。有啲明星教日文既書架…你要買嗎?加油﹗

      刪除

要講幾句嗎?﹗XD