2013/07/06

東京HEA遊(3)~第二天

第二天的行程:明治神宮-->新宿御苑-->淺草-->銀座-->自由之丘

頭四個地方都是坐巴士團去的,度度去一去咁就半天了﹗

話說N年前看日劇(唔記得係咪《To Heart》?),記得女主角有次唔開心無啦啦join了個巴士團遊東京,睇住風景邊散心咁,一路都好記得呢幕,前陣子看《東京家族》又有巴士團喎,於是我決定去體驗一吓﹗因為想朝早去(咁就有成個下午周圍去啦﹗),又只想去半日,於是就選了上列頭幾個地方的團,係…英文tour guide的…一開始都驚佢講啲我聽唔明的和式英文…點知…係十萬個字正腔圓…佢唔做導遊可以去教英文啦﹗(Btw,坐飛機時啲空姐機長廣播,佢地啲英文聽鬼死我…完全無晒r、l音((好了,國內航線有英文你聽都算啦﹗))…)

巴士團上車地站在濱松町站,這個濱松町的車站都唔算好遠,搭地車半個鐘多啲,神奇地小的經過第一天不眠上機,竟然趕得及7點半起身(係7點半呀﹗即係香港時間6點半呀﹗)我返工都無咁準時起身呀﹗諗住時間充裕去到仲可以去便利店睇吓有乜野飲買,點知…我喺車度瞓著咗…囧﹗醒時過了兩個站要搭番轉頭,好在去到時都剛剛好9點(係,呢個團係9時至1時的…好早啊﹗)…未遲到…

東京鐵塔﹗是經過沒有落車行的…遠遠望既就多,經過就未試過,好宏偉啊﹗雖然佢已經俾天空樹過咗頭,不過我啲老餅鐘意老餅野架嘛,始終都覺得東京鐵塔先夠symbolic~哈。導遊的小知識,東京鐵塔之所以油上紅白二色係因為航空管制,天空樹因為唔起航空路線之內所以就可以選白色。跟住睇書又發現名古屋鐵塔明明高過東京鐵塔,但又唔使跟規定油上紅白二色既…因為佢比東京鐵塔早幾年建成,建成的時候仲未有紅白二色的航空法例囉~呀,真係學海無涯﹗(04/05/15後按:一年後終於有機會上去一看了﹗)

又係小的迷偶像時間,我就說一街都係福山叔叔嘛﹗真架﹗(上一篇文唔記得貼這張添﹗),跟住在街上見到好幾次安室嚟緊10號出的新碟廣告﹗巧開心喎﹗都好揼本呀啲宣傳﹗巧期待﹗Then去到表參道,阿導遊姐姐係咁介紹呢度點點點…我只諗起敬Hins隻歌…夜深表參道…容我再起步…何處是旅途,隨處是旅途~~~~~

第一站明治神宮(其實我好眼瞓,都唔記得報咗個團係去邊啲景點…哈哈哈﹗我係諗住神宮和御苑呢啲地方以我咁唔觀光的人來說應該無幾可會去,難得有車跟唔使自己搭餐死,咪到此一遊囉﹗)雖然神宮是戰後重建的,歷史唔算長,但都係宏偉既…但…好熱呀﹗熱死我…咁行法我會無心機睇架﹗


完全看不明的和歌…
導遊姐姐說因為夏天好多時會落雨,於是夏天通常都無乜人結婚,但我地去的時候有兩pair新人…好好運咁喎﹗而…著校服去觀禮好正…我細個時都好鐘意無時無刻著住套校服…但會俾媽媽鬧架﹗

 跟住就去新宿御苑啦,未去到時經過個水池…呀﹗Swan lake呀﹗

 
天氣是多麼的好呢﹗熱到死呀﹗

 <--於是…去了兩個景點,我已成枝茶飲晒落肚…囧﹗
不知何解慢慢變了自然生態堂,阿導遊姐姐係咁介紹不同植物俾我地聽…囧…咁…我又影吓啦…


第三站淺草,因為…太近酒店成日行而我又太肚餓關係,於是一開始自由活動時間我就去搵野食,本來想再挑番大黑家或者三定的天婦羅,但見好多人排隊,而這家小店有吉位就衝入去,其實呢個Pirafu(懶唔打日文了…XD)我唔知係乜,見佢700 yen有肉有湯好似好抵咁,叫了之後先去wiki原來係解炒飯…出乎意料的勁好味﹗食到美人照鏡…勁呢﹗



最後到銀座下車就完了。時為星期六於是銀座幾條街變成行人專用區…佢地叫作…步行者天國…好正﹗哈哈哈﹗雖然銀座係好多名店聚集,which我買唔起的地方,不過都有山野樂器、教文館、伊東屋等行了一大輪…我…又買了一棟書啦﹗哈哈哈﹗

UM,這兩隻貓唔知點解喺街道牌上…有一千個人圍住佢影相,包括我﹗

之後想去一吓中目黑(睇完《最高之離婚》嘛﹗)但喺中目黑一出地車對面就有班去自由之丘的列車開住門的等我…唔上有啲對唔住自己喎﹗就上了。上次我都唔知去了些甚麼地方,今次沿路見到好多有趣家品用具店呀咁,間間都樂而忘返,不停提自己唔好買咁多…拎死架…卒之…我買了兩包湯﹗係兩包湯,即食同埋冷食的,好有趣嘛,同埋有試味幾好食咁…呃…


行到腳軟就搵咖啡店坐,好鬼鐘意東京周圍都係喫茶店,雖然蛋糕加咖啡通常要800~1000 yen不等,計落都幾貴架,成餐飯喎﹗但佢地小店風格坐得好舒服,食住cake打打機睇腸書好爽的。這家店呢個芝士蛋糕是好吃的…連隔離拌碟舊橙我都食埋﹗不過係當日好多人(星期六嘛﹗)同埋啲人傾計勁嘈…阻住我睇書…(<--扮文青中)

另,通常啲店都喺上完食物後擺低張單等你出去櫃枱找數,這家店的這個茶壺小夾好可愛,真係想問店家喺邊度買…

回家(酒店…)路上…地車也是福山叔﹗哈哈哈。由於已買到一袋二袋,這晚喺酒店樓下的Grill Burg甚麼的地方開餐,這個漢堡steak比前一晚的那個好吃多了﹗(我竟然到達兩天,餐餐都是洋食…囧)

左邊的是喺Village Vanguard見到的風呂套裝,很爆地有埋墊頭用的枕頭,初初我以為係浮喺水面,諗諗吓唔係喎…唔得架喎…佢布嚟架喎﹗囧﹗

另,Family Mart的甜點…好…難…食…囧

返酒店食住甜品送電視,又係中居﹗(第一晚佢有個落田實習的節目﹗)好啦,甚麼音樂之夜的,諗住update吓有乜Jpop新歌的時候…我…見到…西田敏行叔叔﹗囧﹗好懷舊﹗江口嫂唱的甚麼《如果我變了大嬸》,我心諗嘩…新歌嚟的嗎?仲如果…(sorry,無惡意),邊聽邊wiki一吓…噢…原來係舊歌…唱的時候佢仲係少女…原來係咁…但都未算…最爆的是唔知點解佢拎埋支牧童笛上台表演一番…

懷舊停不了,有中居當然有SMAP,佢地唱了一千首的medley(太誇張了﹗XD)…跳完一輪竟然見到木村彈結他唱《夜空ノムコウ》,巧開心啊﹗UM,佢地首《こんいちは》真心難聽,但《JOY!!》很不錯,聽得開心嘛﹗

另外一個大叔是德永英明,佢又唱《Rainy Blue》啦﹗真係百聽不厭的說﹗呀,佢首新歌《Statement》都好好聽的說,弄得我忍不住買埋隻Single


另外見到AKB48…嘩﹗究竟佢地有幾多個成員架…pan極都未pan完既﹗

**************************************************
基於前一次遊記想以地點劃分卒之寫到無影,今次回歸以日子嚟劃分,應該會快啲寫得完﹗哈哈…

以上。

4 則留言:

  1. 跟巴士團要幾多錢呀?係日本即場報?

    回覆刪除
    回覆
    1. RE:NATSUKI

      呢個團4500 YEN,半日…無野食的…
      我諗即場報都得既,反正都唔滿,不過早啲網上報就方便預時間多啲…

      刪除
  2. 因和媽媽去旅行,都有想過跟巴士團,唔洗行咁多嘛,但咁早起床,都係算囉。

    回覆刪除
    回覆
    1. RE:五月

      佢有下午的半日團架,一點先開始,也有晏一點的十點開始的,你可以睇吓邊個啱心水,不過有啲係日文案內,英文的時間選擇唔多…

      刪除

要講幾句嗎?﹗XD