2013/07/21

讀書報告 #12~《斷捨離》+《一整年不用錢》

本來我不知hit緊的《斷捨離》是甚麼,一嚟是聽陳天后的歌…哈﹗any肥,咁小的是執屋控嘛,於是就忍不住揭了幾野。襯番而家熱話的源頭減廢呀堆田呀咁,睇呢啲書啱feel呀﹗


斷捨離》的作者山下英子是…雜物管理咨詢師﹗這個title好勁。而本書最大的理論就係:

斷+捨=離…就是將不要、不適、不快換成要.適.快
斷-->唔好買野、唔需要的物品唔好買、必要的物品再check係咪真係需要
捨-->廢物、catalog都掉晒佢、賣、送、recycle、減少物欽
離-->了解自己,仲會鐘意咗自己添﹗好好的狀態,不時review自己的觀點…

切斷物欲,捨棄舊物,就等如離開對物欲的執著,做到清晒眼冤野的境界。確…係好中的,小的就是儲物狂嘛,最狂就係鐘意儲實物,唔捨得掉,於是左堆一堆右堆一堆,開頭睇佢呢條formula是相當擊得中小的既。其實收納喺日本一路都有,山下就說收納跟斷捨離是有分別的,收納就是將啲野整齊的堆番埋一堆,其實啲野既總和係無減少到,而好多人(如我)鐘意一路執一路回味每件物品的往事,呢樣唔掉得那樣唔掉得,於是樣樣都唔掉,就只是整齊的放番埋一堆,到下次再執屋的時候再拎出嚟回味和放番埋一齊,呀,我真係試過呢過cycle好多次。

至於掉野嘛,小的都算係狠架啦,特別係衫方面,每到轉季就將啲坐低三年無著過的一次過入袋拎去回收。Um,就說行街時見到啲衫總覺得會有機會著,但turn out係無乜點著過,就是說,無論買了幾多件衫,其實著嚟著去都係那堆,好囧。

呢本野講既,都唔算係乜野驚天地泣鬼神的東東,我都知啲野堆到周圍都係時令我心情很不爽,掉咁啲野令到地方見使番當然有煥然一新感覺,梗係好啦。而鬼唔知應該一開始就唔好堆野,但唔係日日都有時間執架嘛,而我都知從一開始用完既野放番回原處就無堆野的問題…呀…我知我知,但…但…又但﹗藉口﹗﹗﹗﹗哈哈哈,好啦,就堆到周末先清一清啦,當係做運動囉。

呀,佢有將「掉唔到野」的人分成三類:
1. 現實逃避型(就是成日話自己好忙所以唔得閒執野…)
2. 過去執著型(就是鐘意將舊野儲住,得閒拎出嚟回味吓…)
3. 未來不安型(就驚第時有乜衫長褲短乜都買定先)

呢個係有令我諗吓自己係乜野型的…不過…都ok吧…Um,就說本書講的都係老生常談,又會咁勁可以怒開seminar又出書又出呢又出路,神級喎變咗個作者。前段講「斷捨離」理論是頭頭是道的,老生常談不過總得有個人出嚟當頭棒喝既。只是之後啲成功例子就有啲sell野feel,好似話你睇吓人家join了我地而家人生變得幾美好咁…於是…小的在出門時等上機時揭揭揭,兩日就睇完(小的買日文版…貪佢文庫本夠薄,turn out係平時睇中文版更快睇完﹗)
***********************


橫掂都睇開啲減少物欲的書,唔爭在講多本《一整年不用錢》。

話說這是一個(我覺得有點癲狂的)實驗,有個哥哥仔叫阿mark,佢決定要一年都唔用錢,於是佢去農場度做義工,令佢有個森林可以藏身,從交換物件網頁(我忘了是欄定係網站)度收集了一個人家唔要的車廂做屋企,之後佢用農場的土地種野食和周圍收集的廚餘解決平時一日三餐,交通除非係人家順路要不就去邊都踩自己的單車,咁話得唔用錢,於是單車壞了要自己諗辨法整啦,本來唔用得電嘛就電器都不能用,但因為好多人訪問佢個人年唔用錢計劃於是手提和電腦都要有限度用住,就唔知點樣整了個發電機…好勁﹗唔使講,食野的「爐」都係自製架啦…
呢個就係mark哥的屋企了﹗

佢個實驗地點喺英國,佢竟然可以用順風車和靠電視台俾佢的船飛去愛爾蘭探親…實在太強大了﹗

一路睇時都一路有諗呢個實驗喺香港得唔得呢?um,首先我要keep住返工…已經唔可以靠單車啦﹗(首先係我唔識踩…哈哈哈…而且踩得嚟返到公司都天黑了﹗),跟住食野…我喺邊度搵塊農地出嚟呢?或者喺自己屋企個露台度種吓小型瓜瓜菜菜都得既…呃,咪住╴返屋企﹗我屋企十幾樓架喎﹗唔搭lift…行…成粒鐘喎﹗而我行既時候層層樓梯都有燈…又唔得了﹗

當然唔係要咁歇斯底里既(阿mark哥個女友本來都支持佢呢個行動,但卒之都係分咗手…噢),不過呢個咁神奇的實驗確係可以令人諗吓生活當中好多野確係未必有需要,係可以減輕吓,對個地球好啲,等大家都可以過多幾十年安樂日子咁…

呃…但夏天三十幾度…唔開風扇又唔開冷氣真係好培架喎?

呃呃呃呃呃,看來我都係得個講字的了,最多…買少啲樽裝飲品啦﹗

4 則留言:

  1. 講到一年唔用錢,我係fb都見過有本書又係差不多,不果個主人翁係個外國阿婆,我唔記得叫咩名,不過個概念係差不多。

    而家我洗一蚊都擇低,不過都洗得好勁,可能唔擇既日子,比而家洗得少,係自己唔開心就亂洗錢,唔洗唔安落。

    而家跟本只係車錢都洗好多,食我公司都有包,不過都慳唔到幾多,如果唔包洗得仲勁。

    以前我好宅,衫都係老母買,係而家先買下衫,自己買得,都唔會係平果d,學得阿媽真係下下一百蚊十件果d cheap野咩,而家多衫,都係我媽呢樣唔丟果樣唔丟咁解,我媽好白痴,佢唔會諗下件衫好out,舊既唔去好難有新,自己買既衫都係三份一。

    要唔洗都可以,你生存,只係為生存,而唔知做過咩,做人都好慘。

    by 無敵

    回覆刪除
    回覆
    1. RE:無敵

      世界個個都話使錢使錢的時候有總會有人反期道而行,提吓大家其實唔使買咁多野既,一個CYCLE來的…

      我係去旅行時先會神心地MARK低啲洗費,平時都係大約記得就算,雖然咁樣其實好易使多咗唔知,不過我懶啦…哈哈哈…

      刪除
  2. 我都睇過《斷捨離》呢本書,最初感覺都幾"搞笑"...
    不過又想起佛家講"貪嗔癡"...其實都幾有哲理-.-!

    回覆刪除
    回覆
    1. RE:奕山

      佢係有哲理既,其實講既都係大家都知既道理,只係知易行難咁囉…

      刪除

要講幾句嗎?﹗XD