2011/10/25

《奪命金》~做人有時真係無乜原則的…

好鐘意個戲的英文名,中文名大概是點出人為財死,英文名講的更大…Life Without Principle…可能係自願或者不自願…um…

um,其實我唔係套套杜sir的戲都看,撞正有張coupon而對呢套戲的題材又有興趣,去看囉。反正人人都看《那些年》時我走去睇《奪命金》我覺得我好有型﹗典知張coupon竟然過了期…唏﹗既然嚟咗俾錢照買飛…唉呀,我真沒原則…

(這是甚麼一個爛gag…)
((就是說我不是一個professional菇徒,但兩個何韻詩我都看齊了﹗哈哈哈))
(((上圖那張保濟丸式poster好有型,但佢三人個名同張相唔對架喎,會唔會有外國人以為何韻詩係叫lau ching wan呢?)))

((((注意有劇透))))

看前做了少少功課,知道今次唔係《暗戰》、《大事件》(唔知點解一見任生就諗起呢套戲)、《PTU》(唔知點解見到青雲哥哥就諗起《衝鋒隊之怒火街頭》…跟住諗《PTU》…雖然《PTU》係任達華的…哈哈哈)…是走番《大隻佬》式講故事的路線嘛?

也知道任生(警察)、HOCC(銀行職員)和劉青雲(古惑仔)三線唔會有交錯,全憑盧海鵬演的貴利佬linkup的,帶出點樣人生財癲人為財死,其實大部份時間都係舖傳說中的「奪命金」點樣飄出嚟,到中後段鵬哥遇襲先入正題…um… 前段其實我有少少推過吓銀的…哈哈…我不集中了…到結局時有一吓呆咗…吓?完架啦?咁舊錢就咁就完架啦?返屋企諗一諗,個openend都不無道理丫…人家炒股又何嚐唔係同劇中人一樣無啦啦執舊錢?都係喺人家一頸的血上執錢啫…

其實我個人想多少少交代HOCC和青雲哥哥的下文(任生查唔查到佢地舊錢啫?)…唔知呢,既然個故事係一個荒謬既城市發生既荒謬故事…um,或者係想留多啲空間俾大家諗?(斷估唔會開續集掛?)睇睇吓先知係時空交錯…真係有野諗喎﹗

HOCC一段我看得最投入,小的曾經做過銀行嘛,就好似HOCC那種咁,開口想講基金時人家一開口對答如流弄得自己嗲都無得嗲了(講娛樂我就識啫…),諗嚟諗起都唔覺會做到YOYO陳那種CHUR到盡的SALES,為跑數要向婦孺開單又好似好對唔住佢地咁,呢段完全係小的當年寫照囉﹗(嗚…)…不過小的無俾叔叔摸過手仔和唔使夜媽媽CALL客咁解啫…見到劇中Teresa遞信走人真係鬆一口氣的,不過佢老細Jackie姐完全無挽留時心又不禁酸了一吓…oh…原來自己真係咁無存在價值的…又或者,家陣做銀行只係賣產品跑數機器,老細不會appreciate你用太多時間去幫客人做啲無so既野吧?

任生一段就係查案查案同查案,野係辣薑哥做晒,任生係行行企企睇吓野咁,電梯一段勸個阿伯放低火機算係最大發揮的吧?HOCC係俾老細捽數,任生就俾老婆囧囧捽,其實佢老公一個人搵錢…買層八百幾萬的數係咪太誇呢?仲要養多個失驚無神跑出嚟的阿妹喎(細路女來的)…難怪任生開工時都木口木面了…(不過,囧今次無咗佢既奪命smoky eye係順眼好多的…係咪特登要老婆hyper然後老公木口木面嚟做對比呢?)

青雲哥哥那段奇情啲,為幫大佬搵錢保佢出嚟而周圍度水,但人人都無面俾卒之要搵小黑哥同佢玩炒股,然後小黑炒出禍又跟佢去補鑊,唔知頭唔知路之下無啦啦俾佢炒出個未來…呢段至奇情(前兩後都好生活化架喎﹗)…又竟然俾佢掂咗﹗仲可以同HOCC各自嘆舊奪命金…真係人生無奇不有…

故仔我係想結局多啲交代…比起個故仔…啲人最好睇。鵬哥做貴利佬和蘇杏璇演對投資一無所知俾人說咗去買基金的大嬸都做得好勁,一句「清楚明白」每次講都有唔同表情唔同感覺的,好勁,即刻將HOCC比下去了…(不過HOCC係做得OK的,係啲心理場口位爭啲…)…跟住執紙皮的黃日華和炒股炒到嘔血死的小黑都好搶,一個靠勞力搵實在錢,一個係靠炒股呢啲虛浮野搵錢,個對比好正…數吓數吓…仲有做過氣大佬的丙門哥,成日俾差佬捉的拜山華(張兆輝)…好多無記人啊﹗

要挑呢…係我想問鵬哥咁老謀深算,識得睇準時機等啲人炒股炒到損手爛腳時借錢獲利…點解拎成千萬cash會單拖赴會?唔驚出事嗎?而且佢咁信HOCC擺番五百萬唔簽入數紙?跟住HOCC又唔驚CCTV影到(佢枱底擺錢影唔到啫,之前鵬哥走人時只拎到一半一定影到架,佢走人唔撈都會trace到啫…)…另…套戲據HOCC個blog說係拍吓拍吓又拍吓咁,於是囧囧和HOCC個髮型都有啲唔連戲…哈。

ANYWAY,那些年我現兜兜俾錢睇《奪命金》都OK既…雖然個滿足度好似唔及前作…um…以上。

也有講炒股的:[日劇]人善天不欺《BIG MONEY》

8 則留言:

  1. 太好喇,多個Blogspot 人

    回覆刪除
  2. 係呀…我幾鐘意blogspot啲小工具,唔使吓吓搵外掛…

    回覆刪除
  3. hihi!試埋喺手機回留言先!^_^

    回覆刪除
  4. 呢套都想睇,所以你呢個post我唔睇,驚睇左都唔洗入場。

    不過唔想睇jj,唔係佢差,而係有靚女既戲好似好阻我尊心睇部戲,哈哈

    不過我都唔想對呢部戲太大其望,好似「攝」聽風雲2(唔識打果個字),我就幾失望,第一集果時無期望睇,真係好正。

    今次呢部又係有劉青雲,又係講錢,貪心果d野,令我都諗返可能「攝」聽風雲差不多,其實套戲正唔正?

    25th Oct 2011 13:58 PM

    回覆刪除
    回覆
    1. 呢套其實我覺得遲吓電視啲電影台實有得睇,唔係心血來潮以為自己有免費飛的話我都未必會去睇…jj唔好好多戲架咋喎…um…佢外型ok,不過唱歌(那首《花貓變身豹》有啲…哈)…um,回說套戲,佢係眾多串星既其中一個啫,都唔會好話令你專心唔到既…
      《竊聽風雲》第一集我好誠心去戲院睇,但2我就無睇了…硬覺得翻玩多次會唔及第一集好睇…

      2nd Nov 2011 10:16 AM

      刪除
  5. 人地話鐵甲鋼拳都好睇,其實我本來不大興趣,不過講到好睇引想睇,如果要選,睇奪命金定鐵甲好?

    25th Oct 2011 14:01 PM

    回覆刪除
    回覆
    1. 鐵甲我麻麻地,其實我唔鐘意睇打打殺殺的戲,鐘意睇劇情片多啲,無論港產或西片…所以對我來說毫無疑問係選《奪命金》囉…

      2nd Nov 2011 10:18 AM

      刪除

要講幾句嗎?﹗XD