突然懷舊之張學友篇

原來只欠張天王，四大天王十首之選就寫齊了~(繼續都係寶麗金﹗哈哈)

要數張天王至招牌的歇斯底里唱到青筋暴現情歌個人最愛係呢首(小的是side cut精，越大熱我越避開的…哈)(千fa前幾年拉闊唱了個現場的，去k必點﹗)，但小時一路都有問題：點解雨係藍色既？到後來知道德永英明的原版叫《Rainy Blue》…啊…憂鬱咁解呀…幾驚係氣候變化溫室效應《酸雨》(danny summer呀﹗)啲friend呀…

已忘了點解會識這首歌了，好多都係小時候聽姨姨dub俾媽媽的卡式帶學番嚟的，這首《藍雨》和《太陽星晨》都是很細個時就已經唱到曉背了…


小時候的我曾經以為這首《花花公子》和同名成人雜誌是有關係的…(壞小孩啊﹗)…well，唔知點解我好鐘意呢種輕快得來有點都市又有點輕鬆又有點型格感覺既歌(你明我講乜嗎？)，即係唔係一貫死人lum樓情歌咁既囉，有新鮮感嘛…(點解小時候我又識分邊啲係情歌邊啲唔係呢？真難明…篤…)


真覺得《夕陽醉了》個色士風music transit很迷人很浪漫…誠如舊文所說，睇完《我在柏斯的日子》就迷上呢首歌了，但我係中學先知原來柏斯唔係喺歐洲…我一路都以為係歐洲城市喎﹗囧﹗另，仲有首《再愛上你》都係呢種中版有點慵懶既，都係本人飛佛~


都說我好怕啲你唔愛我但我勁愛你你飛我我超級勁慘的慘情歌，平時生活已經有各式壓力…聽歌都仲要聽啲咁慘既真係唔該晒(不過我好鐘意《情已逝》，真係慘到爆…同埋林家棟扮佢唱《遙遠的她》…哈)…。做人多啲正能量嘛應該，《月半彎》超級sweet的，迷死人(原版安全地帶也是一聽著迷的…)…

除了這首還有一首《天變地變情不變》又是迷死人…

唉呀…《年少無情》貼唔到plug-in添…

數張天王唱過咁多電視劇主題曲，咁本人又係一件電視精，唔貼番一首半首對唔住佢啦﹗個人至愛圖中右邊那套《蜀山奇俠》既主題曲《年少無情》，話說套劇用了奇幻的焦焦聲代替一貫武打，幾新派的，造型又奇特，跟住警我師兄又靚仔…首歌又好聽…(sk姐真係萬能合唱王…邊個男歌手都夾到的說﹗)…超回味的說~

不過講到有印象既都係《祗有情永在》…還有人記得係張天王和鄜美人合唱的嘛？well， 套劇《賊公阿牛》沒看過，有印象因為呢首歌係阿姨和佢老公既金曲，年年食飯都硬係點嚟唱…仲硬係要走音地「呀~~~~~未怕分開…呀~~~~~~縱使分開」…喂…原唱無咁難聽架喎…(well，我是一個乖小孩，當然呢句只放在心中…遠目…)


又一定要數吓快歌既。9字初萬X路RED HOT HITS大灑金錢史邦沙唱片公司出碟大攪音樂會咁，先係華星《火熱動感》，但只動了一輪就轉了去寶記， 寶記真係做得幾亮麗的，《熱力節拍》而家草蜢演唱會唱親大家就自動high不用講，張天王《愛火花》、黎天王《火舞艷陽》都係一時之作(《I LOVE YOU OK》都係喎﹗好驚…)…咁睇一睇梗係張天王啲勁歌熱舞好睇啲啦﹗仲有首佢同王菲合唱的《非常夏日》，sports day必用…好驚。

快歌仲有《忘記它》和《餓狼傳說》都係本人極愛…好型…特別係後者啲狼叫聲…哈哈。


合唱歌應該係和湯寶如合唱的《相思風雨中》紅啲，但我喜歡和小恩子合唱的《長流不息》多啲，「人潮裡跌蕩…未抽空細看」很適合星期日在人頭湧湧的老尖邊行邊唱…如果閣下仲有閒情去唱歌的話…


其實我沒看過《雪狼湖》，只是很喜歡《花與琴的流星》的意境。以上。(但應該係《愛是永恆》最hit吧那水？)


張天王結婚那水《你的名字我的姓氏》係勁hit的嘛，不過本人專避hit野的…個人喜歡《有個人》多啲，lum爆，但我成日攪錯咗《有個人》配《想和你去吹吹風》踏單車的封面…，個感覺好fresh好簡單但又好盡在不言中。無既，我唔鐘意乜都畫公畫出腸，subtle啲咁啫。

不知何解聽《有個人》我會諗起《飛機師的風衣》… 好typical既港式情歌melody…但又莫名有印象…到後皮球出復黑王…第一時間買了有呢隻歌既《相愛》大碟…一望…嘩﹗86年…撞鬼囉…


朋友寫給朋友的歌，歌詞每聽一句…淚就越想滴下來…oh…2003年啊…

*****************************************************
攪掂﹗(係咪真係無至hit啲歌呢﹗﹗哈哈哈)

26/2/12後按：很喜歡的《留住這時光》呀﹗差啲miss咗﹗

四大天王全集：

劉天王/ 郭天王 /黎天王