2010/10/24

【小熊人擂台賽】12:其實我介意

(我竟然仲記得有首叫《其實我介意》的歌﹗哈哈﹗漢洋仲有首我好記得既歌…《失戀2000》…囧﹗)

我介意既野何止千萬,當中最憎爆既,兩個字:奉旨。

  • 我介意有人覺得該事物實有人做,於是放著走咗去。例如:食完飯唔洗碗,洗完衫唔晾,滿滿的垃圾唔倒,亂爆既廳唔執,壞掉既電腦唔FORMAT…(呢句有心人可以轉給我弟嗎?)
  • 我介意人家問完我幾句,而我又衰懶樂善好施知幾多答幾多後,人家就順勢將任務推俾我。(呢句有有心人可以轉給某些A字膊同事嗎?)
  • 我介意有事鍾無艷,無事夏迎春。(呢句都係要轉俾某些A字膊的同事,不要再用我喺吾司做得耐做藉口去JUSTIFY自己當正我係人肉GOOGLE,自己搵答案都懶囉…)
  • 我介意人HEA。公司請你返嚟係做野,就算你不出盡全力,好歹都應交出正常水平之作,公司請你返嚟食飯呀?(呢句請轉給啲患有公司剝削逼害症的人,咁辛苦就唔好撈囉。請不要吓吓覺得自己好多做好慘就大條道理交HEA野出嚟,你狂HEA,可憐跟手的人就要執手尾執餐死…)
  • 我介意人無禮貌,講句唔該好難咩?(請轉給那些覺得自己俾錢就可以使死人的客人聽)
  • 我介意人以為自己大聲就係有道理,而完全不睇吓成件事前文後理,總之我話咁就咁。(請轉給那些亂咁投訴,郁啲就話唔公平的人知)
  • 我介意有些人成日以為自己參加緊全港中學辯論大賽,無事無刻事無大小都要嗌餐死,死都係嗌到嬴為止。遇著呢啲人,我會好介意浪費咁多時間嗌埋啲無謂野浪費時間。(呢句請轉給各位唔係辯論隊但辯才出色的人士聽…)
  • 我介意人講野大聲。特別係喺辦公時間公然講私人電話,仲要呵呵大笑,面皮厚到無朋友。(呢句請轉給吾司某位阿姐聽,佢把聲唔拎去錄HALLOWEEN VO真係暴殄天物﹗)
  • 我介意人家當正我係TRANSLATOR,係呀,曾經打電話催我返OFFICE CHECK EMAIL幫閣下CONFIRM 酒店BOOKING,同埋叫我幫手譯餐牌既…係呀,我講緊你呀﹗
  • 我介意人家第一句係好輕CAN既舉手之勞,我同意幫手後先講第二個要求,而第二個要求往往不止舉手,全身上下花體力花時間架囉…唉,如果該班人知我講緊佢就好啦﹗

其實我介意我咁多介意,但出來做人做事,好多野係應該有要求有底線有限度,卒之好多時遇著啲軟皮蛇或更衰既卑鄙人,就只得自己谷氣囉…嗚…

我學緊睇開啲架啦,同埋遇到賤格既人,要大聲嗌唔好,同埋講俾可以信任既人聽~

2 則留言:

  1. 最後那句最管用:)很多人因爲一句“不好意思”,就事無大小都say yes, 那就是自討苦吃了。

    24th Oct 2010 17:32 PM

    回覆刪除
    回覆
    1. 做YES MAN無SO的,這是我在社會大學得到最重要既得著…

      3rd Dec 2010 14:52 PM

      刪除

要講幾句嗎?﹗XD