失驚無神泡菜國之旅~5~第2天

毫無疑問是被《王世子》影響了，繼飲香蕉多多、吃芝士杯麵後，仲特別點了個蛋包飯來吃囉…XDDDDDDD

第二天以為從山區回到地球時…原來酒店…繼續在偏遠地區…我幾時先入到城呀？

第二天很簡單，一朝早去甚麼Blue Canyon(我懷疑是打錯字呀吓張行程表)，基於小的不懂水性敬謝不敏，就留在酒店那個熱被窩裡睡到自然醒，之後到樓下lobby上網解毒。下午行程只有一個…樂天世界開心樂園…囧﹗

山區仲雪景處處，而步出酒店時仲下了一場小雪，由於是行了出去先落，咁小的有幸食了幾啖雪…入口即溶…巧奇妙啊(？)﹗

 

左：甚麼香菇火鍋，阿導遊話個團的膳食安掛就係：燒烤、火鍋、燒烤、火蝸，果然非虛喎﹗

右：河南呀﹗嘩哈哈哈哈…(繼上水之後)

山區果然是山區囉，搭車都搭咗個幾兩個鐘，瞓到人都癲…囧﹗呃…這個甚麼樂天世界開心樂園，落車的一吓見到啲代言人果真很開心…不過入到去…刺激的無人想去玩，然後望落唔刺激的真係好唔刺激…呃…忽然很掛住海浪公園…

都說，亮點是一落車見到的這個代言人billboard(有人一落車就衝咗去影相…雖然佢口口聲聲話某代言人個郁好唔掂)…而入面啲小檔其實…都是相當流fei的，啲skincare梗係唔買住啦，明知之後會行明洞架嘛，then有一檔詭異地好多《原來是美男》的精品…呃…套劇真係咁有影響力？而又說…啲精品係咪街頭小檔那些？

導遊係咁講話啲阿豬媽掛幾個鐘隊都要坐《天國的雞批》阿女主角坐過的那個旋轉木馬…囧﹗呃…我無睇過囉…嘻嘻…卒之坐了個甚麼法老王甚麼，有個船的，有個木頭車的…呃…十分流fei，而且同一條formula只係住的medium唔同了…到決心出去玩室外的玩意時…已經要陪長輩們去食飯了…果然，出門旅伴是很重要的﹗無人同我行那個甚麼韓流明星館甚麼的東東囉…

呀，睇番相先記得仲坐咗這個甚麼world monorail…叫做兜了個樂園一圈囉…

呀，又係睇番相先記得，個雪糕極得，古古力那邊係有古古力碎的，不過我地拎住嚟食邊掛左圖那個甚麼monorail，被在場的工作人員哥哥仔叫住話唔可以拎上車食…囧﹗要極速吞噬咗佢…

長輩們說要吃飯…於是行了一輪搵到呢個甚麼lime sauce 炸雞的飯…二萬幾won架…但長輩一句凍既…一句無味的…oh﹗而那個很pro的3號牌…我地仲諗緊係咪會有餐時會bibi叫我地出去櫃枱拎時…發現…我地諗多咗…佢果然只係一個有號碼的牌…

上面個飯讓長輩們吃不飽，於是兜了一輪在樂園另一邊發現有個頗多選擇的foodcourt，個蛋包飯相當不賴喎﹗最緊要是平﹗無野飲，但個飯本身萬令won，又有配菜又有意粉的，買埋個飲品都仲平過上面個lime sauce甚麼炸雞飯…

係，因為《王世子》朴荷媽弄了個超好味的蛋包飯讓紅黃藍綠叔回味又回味，於是見到有蛋包飯小的就二話不說叫了，然後飯腳們又一齊叫…卒之叫了三款…那個肉丸好好笑…好似幾粒丸在游水…囧…

回酒店又是一個二萬五千里長征，搭車都搭到嘔…囧﹗話說這個HK Resident(我有諗過HK係咪指咱們特區？我諗多咗…)有兩家分號，一家在首爾一家在仁川，吾等search過以為應該係首爾入面那個，典知係喺仁川那家…佢坐落喺4號線1123號站間石五岔路口…要喺1號線第158站轉車，而東大門就喺呢條線既128號站，搭30個站囉唔該﹗癡線的﹗

(勁唔鐘意搭地車的人知道酒店路畸唇後差點要癲了﹗)

這天沒外出，就到附近的便利店買野食，我都話《王世子》勁影響我架啦﹗明明唔肚餓都去買個芝士杯麵(後按：經高人指點，原來劇中食的那個不是圖中那個…anyway，都係套劇arouse我去搵芝士杯麵來吃的啦﹗)，仲學埋朴荷媽媽咁將蓋掩扯下來摺幾摺成杯子咁用嚟食麵…哈哈…右邊的燒雞是路邊小檔買的，7000won，見佢鬼咁令燒得就買來當宵夜，詭異地入面極竟有人參飯(﹗)…勁飽肚和好味喎﹗(仲有幾隻味粉提供添﹗)…咁食法…攪到個胃頂住頂住…未瞓得著咪狂睇電視…唔係點會發現無啦啦電視台重播《愛情雨》兼睇埋…囧﹗

**************************************************************
泡菜之旅全集：
失驚無神泡菜國之旅~7(完)~第4天 & 蝸牛面膜
失驚無神泡菜國之旅~6~第3天
失驚無神泡菜國之旅~4~睇電視(廣告)
失驚無神泡菜國之旅~3~第1天
失驚無神泡菜國之旅~2~一人闖弘大
失驚無神泡菜國之旅~1~橡筋鍚