《金錢帝國》和《雷洛傳》

之所以走去看《金錢帝國》(謎之聲：忙完了…可以睇吓戲RELAX一吓了﹗好野﹗)原因就是《雷洛傳》囉。90年代初的傳記式電影(有《跛豪》、《新哥傳奇》、《藍江傳》…嘩…好多…)之中我最喜歡就《雷洛傳》，特別是下集《父子情仇》…無計啦，有郭富城嘛﹗

講我先講一吓這部我看了十萬九千幾百次的舊片吧﹗(同一時期我仲喪煲《91神鵰俠侶》…原因…也是郭先生…XDDDD)

話說《父子情仇》中郭生演初出茅廬的大學生，加入初成立的廉政公署做調查員，片中阿爸Lak哥(即劉華啦…)由頭到尾都好威風架嘛，突然有個死0靚仔不停數 落佢，好有型﹗好正義啊﹗我諗可能係呢個角色令我對廉記有莫名好感…(同埋我真係諗過去考的，可惜我的體能太出色了…)

(廉記知道有人因為這個原因而想加入會有嘔血的感覺嘛？哈哈…都說偶像影響力大啦…)

到底是戲嘛，小時看戲不太看得明當中講既貪污壞處，而且片子都幾著力淡化主人翁呢方面的行為，嘩，都係為咗食飯啫…喎﹗奸既野好多都去咗死對頭顏同(秦沛)，阿Lak哥就有勇有謀又有情有義，仲鬼死咁專一添，初戀情人邱淑貞(忘記了角色名)無啦啦消失後才戀上有錢女張敏，喺佢阿爸提攜下先官運亨通…說實在，唔講…真係會覺得呢個角色係好人囉…

到後來娶了妻的Lak哥喺戲院偶遇帶著兒子去看戲的邱淑貞…想納番佢做妾卻遇著政府落實一夫一妻制…兩母子黯然消失了，Lak哥帶著單車來卻只剩下空屋一間，訂造的新衣和猴子玉吊咀…很慘啊…話實，呢條感情線仲幾好睇添…

啊，我常煲第二集嘛，其實我想問點解明明Lak哥係眾人入面最年青的一個，最後卻如得了衰老症般係最老的一個，仲老過顏同和豬油仔？點解？點解？

***************************************************

有雷﹗小心﹗

睇了十萬幾千次《雷洛傳》打咗個好深厚的底，再看《金錢帝國》入面的Lak哥(梁家輝)對比就大囉，聲大氣粗(仲有鄉音添)、陰險、鹹濕(愛攪女人卻怕老婆…很攪笑)，好些場口我將之和《黑社會》中的梁生給重疊了…啊…五千億總華探長，咁樣聲大大先夠氣勢吧﹗

梁家輝演大奸佬、王晶演縮骨勢利豬油仔(《雷洛傳》入面係吳孟達演的，硬覺得達哥好像忠啲？﹗)和火爆差佬黃秋生，入型入格好像係必然的啦(又有王天林做叔 父輩，硬覺得係《黑社會》的鄧伯…)，反倒是陳細九(陳醫生)夠搶鏡，佢本來係善良小人物卻無啦啦遇上了Lak哥，無啦啦擦對了鞋就無啦啦被推上探長的 位，說無啦啦係因為佢無乜料到的，主要功用係幫各大佬們接收老婆，於是一次拖都無拍過卻有九個老婆，大時代的小人物，無奈地隨波逐流，陰公。睇到後來 ICAC對付各個大奸狗時真係暗暗希望佢走得甩，咁，好人…係應該有點好報既…

片子係由細九的獨白開始順住去，不住由佢 角度出發，實在陳生又演得七情上面，痛心佢被黑幫老大玫瑰(劉洋，都演得OK喎…特別係後段向細九坦白要走佬一節，無孟瑤咁一味show肉…)騙了，又開 心雖然9個老婆無個對佢真心，還好有個老四(徐子珊)真心對佢好，個個大難臨頭各自飛時，細九先發現自己連老四叫乜名都唔知(唔怪得一路都老四老四的叫佢 囉…)，老四答自己叫阿梅…啊…那一野真係被感動到了…(我當了這部是愛情片嘛？﹗哈)((謎之聲：煲完陳生的新碟再睇佢既戲…好粉絲的行為呢…哈)

一開始介紹細九各位老婆時，8個女人各自開兩枱打牌…嘩…勁似《唐伯虎點秋香》…好在細九係落街食飯…唔係好似伯虎咁見到娘親吊頸…(XDDDDD)

話 實前半部講Lak哥個金錢帝國點點點時幾緊湊的，初段忠角只有演大學生的方力甘出過一吓場，出場就係被砌生豬肉和被打到變豬頭。umum…方生個樣實在太 正氣了…唔演大學生(重點係而家咁既年紀仲係演大學生喎…)太浪費了。但我想說…為甚麼金錢帝國那邊的人個個做晒6、70年代造型，但ICAC正義一方卻 好像無記啲《廉政行動組》節目咁鬼咁現代？係咁2好似《雷洛傳》郭富城咁著吓大關刀西裝好喎，啲老西勁現代，啲女仔既suit直頭和我衣櫃內的見工戰衣沒 有兩樣，髮型也沒怎樣攪過的，等我仲以為現代廉記回到過去打大奸鬼呢…

呢個觀感除了係佢地既造型，重點係正義一方阿頭係林 保怡﹗成個感覺即刻變咗睇無記紀律部隊劇﹗(佢個角色姓嚴，跟住啲下屬叫佢做「嚴老闆」﹗《火舞黃瓜》呀﹗)…不過佢個角色被金錢帝國一方殘暴地害死一幕 係相當震撼…呢部片比起《雷洛傳》血腥得多…拍得住《黑社會》啊…(即刻諗起Jimmy仔殺人後攪肉碎一幕…囧囧囧囧…)反倒是黃秋生的角色火麒麟，在警隊行行企企食飯兩味，仲以為佢轉去ICAC會有大作為時…卻又…umum…個角色除了不停爆粗之外…好像比起其他男角(阿有為大學生除外…)比較少戲份和 發揮囉…

阿晶哥計過度過，部戲一定樣樣有啲，當佢娛樂片睇又得，當係6、70年代歷史入門(入門就好了…電影梗係簡化了和有作野的…如《雷洛傳》啦…)又好，感動吓笑吓(啲笑位多數係孟瑤和王晶既…)驚吓正義吓咁就兩個鐘，都OK睇得過架﹗(即是說，第時喺有記電影台見到，我懷疑我係會睇咗N次都好，還是會坐低睇的說…)

最後想說，香港，勝在有ICAC﹗

傳說中的角色原型，介紹還頗深入的，有興趣可以看一吓﹗