街景

每天搭車都要行經東廊，每次對正東廊的低層單位…我仲會唔會住落去？雖然話係望海，但行東廊車上的人完全望到自己單位內觀，好無私隱啫…。而且都無理由將啲窗簾一日拉到黑不見天日終日架？

總覺得間屋入面點靚，個景觀唔得…真係唔得架喎…

睇二手樓都還好，起碼可以睇實物/景，諗過度過先卜搥，住落唔鐘意係你既事，與人無尤嘛。但買新樓就…哼哼，買既時候係睇示範單位嘛，啲示範單位又總係貼晒 啲醉人夜景，要不就係開揚海景喺窗口度，然度入面就放盡各式美輪美奐的家具設施…嘩，真係尖house呢…。到收樓時睇實物，嘩…勁近馬路…人聲車聲狗吠聲又應到不堪…這時…只有一句浮在我心中…貼錢買難受…

當然，我望著的那個應聲樓盤係我買唔起既，這個「難」我沒福份享了。

實在香港地少人多，高樓大廈起到一街都係，除非有錢到可以買豪宅，要不在市區找個安樂窩，對景觀都不能要求太多，我諗，最基本係唔好對馬路，塵多人多聲又多，對睡眠和健康都唔好啦；第二就係樓同樓之間不要太近，要不天天望住人地做乜時，你都係天天俾人望住你做乜…好無趣啫…

我屋企的單位係十字型的，每個L位每邊一個，其實係睇到隔離屋人做緊乜的，同埋兩邊露台係對住，近到係一支地拖位(於是某次我爹和娘無帶鎖匙…爹竟然忽發奇 想喺隔離屋爬返我們家…囧…爹可不是蛛蛛俠…當然被我娘ban了…卒之要幫襯開鎖佬…我們住高層呀吓…)。我懷疑，兩家的娘親係可以喺廚房互相邊煮邊交換心得的。就係近到咁，細個時經常喺大人唔俾我睇電視時，我就返入房對住個窗斜望樓下單位的電視機…(小時的我已經電視癮甚深呢…)。

呀…喺香港買樓真係煩…顧得入面又顧唔到出面呢。不過筆直所限都顧不得咁多，像我家般單位與單位之間很近的都很難避免，還好只有左沒有右，正前方仲係開揚山景(晨早空氣清新開朗~~~)，計計埋埋都叫ok既。

點…都好過對正大街…終日要拉窗簾的住戶吧？﹗一大片無敵海景得物無所用呢…囧

舊文： 再問典解：假豪宅