愛．回．帶

我的童年有兩款帶是必不可失，一是聽歌的卡式帶，二是睇的錄影帶。

錄了，我真係會不停翻睇又翻睇；在未有平價的VCD/DVD流行之前，我家又沒有LD機，要看戲除了入戲院或等電視台播，就只有去租帶台租，遇到本人熱愛的電影…係可以連續租幾次的…呢啲就係名副其實的「回帶」。

上圖幾餅真係以前錄落的《神鵰》，左邊兩餅是2000年重播時錄齊全集(仲特別用簽名銀筆寫tag添﹗)，右邊兩餅就得人驚啲，真係95年首播時錄落的，前兩三年睇係仲睇到的…究竟tbb/古生知有人咁長情會唔會感動落淚呢？﹗

其實我仲錄咗06年意粉隊砌低法蘭西隊世盃封王的一場…

吾家的影音器材是以落後見稱(要不點會90年代中才入手CD機…)，但錄影機呢就八尾九頭時就入了，原因就是家父熱愛睇波(當年仲係無記播英甲的…係英甲﹗ 未有英超…)、《變變變生命力》(或類似的節目…)和馬，而佢又返輪更的工，就需要錄影機乙部錄低容後再看，於是…下午時份…我睇唔到卡通…又唔可以同老爸爭電視(想死呀﹗)…嗚…我懷疑，這是本人愛上睇波的源頭…(當年好似係睇水晶宮、諾定咸森林咁既野…)

皇恩最浩蕩既一次咪就係本人乖乖就範努力溫書(是裝出來的…)，得到家父批准將錄起的《風之刀》拎出來睇…嘩，睇唔到的話我會喊架﹗

曾幾何時我家的天線收得麻麻，但經錄影機台看的話畫面又好清架喎，於是我們都習慣用錄影機台看…問題就來了，有人按了預錄但又有人無手尾唔熄錄影機或轉番去預錄的頻道…卒之錄唔到或錄咗其他野…還好吾家家人EQ都很高的，無拎菜刀砍人…除了一次可惡的錄影機將本人心愛的《神鵰俠侶再戰江湖》(其實就係套劇的制作特輯)食咗﹗﹗﹗﹗…我真係好想掉咗部機佢…可憐無記無再播啦…嗚嗚嗚嗚…

話說當年除了租碟還有租帶，快X美、金獅甚至超市都有租帶部門，還不計滿街小店，當年家父家母嫌一家四口到戲院睇戲貴…所以傾向事後租帶…這又是一個十分好的回帶機會：趁不同的同學仔來我家玩時借故叫家母租帶一齊睇，就此，我一星期租了三次《賭俠》，又或兩次《胭脂扣》…

其實租帶頗貴的，而且影帶看得多會花，式微是有原因的啦。隨著九字尾VCD興起，大家取碟捨帶了。而我媽當年十分捨得，最記得《甜蜜蜜》隻碟初初出時要成一百蚊的說﹗(不過就是無VCD機，電腦都睇到，方便是無價的啦﹗)

左邊這餅是本人趁金獅(還是百事達？)摺埋時入手的，還有另一餅《蘿蔔歐與豬麗葉後現代激情篇》，兩餅都係十幾二十蚊…

其實講咗咁耐，我想講，雖然我屋企仲有好多錄影帶…但係…錄影機係壞咗…同時無人有興趣再買過一部…Orz﹗

舊文：卡式帶
瘋狂煲戲日