熱煲小生巡禮之1：古巨基先生

我又來開一個系列，究竟這一次會唔會有第2集呢？天知道﹗呵呵(上次的敗家實錄我還未開vol.2啊…orz…)

話說次次都係單丁一部劇咁來回味，不如今次以人為本，逐個人來回顧當年熱煲的電視劇唷。同上次個爛尾vol.1，首位得到呢個榮耀的人，又係古先生囉…

路人甲乙丙年代
1991年：橫財三千萬、我為錢狂、三喜臨門、火玫瑰(飾金蓮同事)
1992年：92鍾無艷、龍的天空
嘩，呢幾套都無睇過喎，《火玫瑰》我只記得跌膊海潮，其餘乜都唔記得了…《92鍾無艷》是鄭伊麵和松松姐姐x套合作中的其中一套，好像有睇過既…《龍的天空》記得係鄭伊麵和邵瑪姬拍出愛火花的劇(這博友指正，係林文龍和黎視后呢…)…實在…真係唔知有古先生喎？

1992年：壹號皇庭(飾酒吧歌手)
之前唔知邊篇文貼過一次，今次再貼(18/2/12後按：片源被砍了…)…原來呢條片係芒姐貼架喎﹗強﹗說實在…《壹號皇庭》追係有追(還弄得我有一水恨做律師…不過只係一水)，但過目就忘，已經唔記得啲case了。只記得，有好多天后級人馬客串過…

主角的弟弟年代
1994年：笑看風雲(飾包文虎)
嗱嗱嗱，呢套野又係同鄭伊麵啦，不過古先生個角色吃重好多，鄭伊麵是龍，古巨基(二弟)是虎，三妹是鳳，龍虎鳳﹗﹗﹗幾有氣勢呀﹗

呢套野鄭生要同松松姐姐、郭藹明談情之餘，又要同Adam鄭與大奸鬼郭晉安大鬥法(雖則我唔明佢唔做商業罪案調查科…為何…轉工會轉去炒股呢？)，古先生呢？攪爛gag囉，見上圖。那一水無記熱愛用華南理工配古先生，呢套野他的女拍檔是張延，又真係幾襯架喎。

而呢套野，印象最深其實係啲歌。不論是Adam鄭首主題曲(最好加埋隻舞…)、鄭伊麵的《直至消失天與地》和古巨基首《笑說想》，都是非常不賴的。

1994年：前世冤家(飾齊望星)

李美人邊度似以肥見稱既楊貴妃呢？曾華倩靚係靚，但係氣質同冷艷清麗既梅妃又好似唔多符合喎，好似吳美珩似好多(18/3/14後按：但向海嵐小姐的楊貴妃演出就…哼哼…)…umum…同埋，湯鎮宗真係湯鎮業阿哥嘛？當年阿媽係咁講的…

記得當年呢套野受到好多劣評，但我就睇得津津有味，覺得呢條轉世橋好好睇喎…(唔怪得我會鐘意睇《水滸無間道》)。

古巨基係演李美鳳個細佬，角色同《笑看風雲》入面既小虎係一鬼樣的說。《笑》入面佢好似係高考生…呢套居然再時光倒流多兩年…做會考生…orz…

估唔到，手頭上keep住的《香港電視》…居然會有《前世怨家》劇情…真係估佢唔到…

1995年：包青天之「雪魄梅魂」(飾白雪生)

正所謂十隻手指有長短，一個再全面既演員都總會有死穴…正如…《包青天》既單元。本來無記拉大隊到台灣搵咗元祖級金超群演包大人(有個單元係周慧敏的說﹗)，不過事後無播到。反而找來自己友再演一個，終於有播啦。呢個單元，角色係個「俊美飄逸的劍客」…一睇呢段描述…就…點解唔搵古天樂拍呢？都話十隻手指有長短…啲眼神…我係邊睇邊笑的說…

唔係得我咁講，當年「成報」個視評都係咁講架。

無記錯的話，呢個單元的女主角饒秋寶都係華南理工，外型標緻造型頗不俗。若然我又無記錯的話，後來她好像涉及些是是非非，和無記終止了合約，無聲無色的消失了…

題外話，維基上寫呢個單完係《踏雪尋梅》，實在係《雪魄梅魂》(有圖為證﹗)，《踏》係原版台灣出品《包青天》其中一個單元，講一個叫雪梅既女仔為報仇喺妓院度殺人，而佢又係展護衛既好友，最後梗係在案件被包大人查得水落石出後，展護衛看著好友伏法囉。這個是本人除了心水《屠龍記》另一非常熱愛的單元耶﹗哈哈…

1995年：總有出頭天 (飾 陳至誠/南瓜頭)

我常把這套和《五個醒覺的少年》攪亂了，因為那套涉及少年犯事劇情，本來很有gimmick的想找古天樂去演，最後因為太敏感而找上當年力捧的新五虎之一吳家樂去演了。

而呢套《總有出頭天》，應該係暑假for青少年的一類劇集吧？orz…我對個劇情無乜印象啊…原來有海俊傑架…

1996年：皇家反千組 (飾成國棟)

終於殺到去紀律部隊劇了。據說那一水古先生想全心唱歌，暫停拍劇，於是就給無記雪住拍劇，95年的《其實我…我…我…》專輯宣傳相對之前的《笑說想》就靜很多了…唔知係咪抱住呢個心情而拍，成套劇古先生都係黑住口面的說…XDDDD…講笑，其實呢套野個角色係講古先生唔妥老頂歐陽波比，之後先慢慢發現原來佢都有長處…都係那些娘野啦…

無聊一提，傳明憲在此劇個角色同我們的總理一樣…叫溫家寶囉…哈哈…

1996年：英雄貴姓 (飾林盆)

呢套野有點《絕代雙驕》+《蓋世豪俠》，兩個男角一個攪笑一個認真，一個扮勁一個真係好勁，咁古先生當然係負責攪笑那個，超記得有一幕他和傳明憲惡攪《神鵰俠侶》(古天樂版啦)，真係十個好笑的說…這套，感覺幾似之前黃宗澤和鄭視帝那套《強劍》…無聊人如我，又係由頭追到尾囉…

呢套野出街時古先生被雪緊，於是只在六點半新聞前的時段播過，無聲無色的播完他在無記的最後一部劇了…

(18/2/12後按：古生在祖國拍下的《情深深雨濛濛》跟《還珠格格》都係有喺無記度播的…)
******************************************************
之後的瓊瑤劇就不提了。

最後送上一張…很正點的…娛樂新聞眼既古怪基啊…哈哈…

今次應該會有第二集架啦。等我諗吓寫邊個先…



****************************************
「讀書又唔見咁叻一日到黑睇電視」歲月總集：
今期熱煲：長瀨智也~
熱煲系列2~光一王子 (7/2/12後按：原來我無視咗堂本剛那一篇喎﹗)
熱煲系列3~：古天樂先生
《十月初五的月光》+張生雜談 (理論上是第四集…哈哈…)
熱煲系列5~：王喜篇