奇趣學科、另類課外活動

娜姐呢個題目真係考起，話實，雖然母校積極落實每人至少要參加一個課外活動制，但hea爆的本人由於不想投放太多學習(這是假話，同阿媽講的)和玩樂(這是真話，同我自己講的)，於是中一開學後，拿著學會列表，不消一會就選好了。巧合地，卻和我會考高考的科目有奇異的牽連。

估你唔到，係電腦耶﹗嘩哈哈哈哈…

其實貪圖制服的本人是有想過join紅交叉(無惡意，係當年友儕間咁稱呼呢個會而已…)和鋸雞(亦無惡意，當年有join鋸雞既同學都係咁叫)，只是如前述，唔想投放太多時間，硬覺得放學要留校很慘(估唔到我中一已有反OT意識…)；同時有諗過學樂器，不過我上中學時見使費一大筆，新書新校服新書包新乜乜新物物，實在唔好意思再叫媽媽拎錢出來買樂器，於是造就本人到今天仍不通樂理，和年年music科因為唔識睇譜而險些不合格…

題外話，後來家弟上中一，佢居然參加紅交叉又學結他…激死我﹗

說回本人的電腦學會，點解會選上呢？無他，諗住電腦勁嘛，中一時屋企邊鬼有電腦，玩具反x城把鬼扮學習機電腦就有，看著簡介，嘩，教你寫程式喎，幾勁呀。不過這不是主要原因…最主要是…星期六返﹗﹗﹗哼哼，其實我幾鐘意學校當年的校服，返屋企都唔捨得換那種(不過本人絕不會校服mix人字拖落街，我覺得好醜樣﹗)，有多一日可以著喎﹗不過，最深層既原因當然係返去課外活動一個鐘，玩樂幾個鐘耶﹗中一無補習的嘛，難得有街去就常約小學仔出來行街(不過我們的活動範圍只在方圓一個地車站的商場…很乖的說…哈哈)…

扯遠了。講番呢個課外活動，整件事都係十個奇特的。首先是地點，人家的電腦室應該是光線充足的嘛，可是咱們的卻是大樓後面的小室，轉來轉去先轉到入去的，入內黑漆漆一片，不開燈是伸手不見五指的，尤如雜物房般。而那些電腦活像史前文物，是九萬幾年前鍵盤連芒那一種，我懷疑，是八十年代尾出品…很驚…最衰當年無影相…呃…

而內容，就是學logo，話實我都唔知係乜，老師堂堂俾份筆記我們，我地就跟住打打打打打打，enter後個program會自己run，嘩，遊戲呀﹗唔該晒呀…最記得是青蛙過河。話實都幾無聊的，乃因那部「先進」的電腦太「先進」，雖然那是仲未人人有自家電腦的年代，不過我相信買的都唔會係那部史前文物型號…應該無人會在家中「應用」到吧。 還有，五吋軟碟，那時是第一次亦是最後一次見到。

就這樣，無聊聊的無聊到中三。

之前覺得廢廢地既野，估佢唔到後來會用得著。話說會考選科時很隨心選上自己喜歡的科目，之後，開始選覺得實用的了，見到「電腦」梗係覺得實用啦，當然，我又被騙了。讀的那科全名叫"Computer Studies"…科學﹗幾勁呀。上咗堂先知又係program…嗚…今次教的是Pascal，話實，讀完都係佢識我我唔識佢。只係，之前課外活動時成日打Readln、Writeln、open、end竟然在Pascal用得上場，一時間本人好似好勁咁，其實係假像﹗哈哈哈。

好在，上課時終於可以重見光明，這回課室在大樓內，光線充足，電腦是先進科技產品，配備當年最新的window型號，注意，有接龍玩架啦﹗話實本人實在無乜寫program天份，呢科，僅僅合格。合格呢，就係因為考的兩份paper一份係電腦知識，有書讀就無死啦，program那份，應該係死掉的。

其實我到而家都唔明10101010101同電腦有乜關係，那些有九牙邊的卡…關電腦乜事？

中六選科唔想再被騙，唔想做電腦人的了，點知見學科名係"Computer Application"，應用喎，今次無program啦掛﹗錯一半啱一半，應用那邊真的很應用，Office/上網/email/中文輸入法盡學齊， 我省下出去學的錢呢。中招的是繼續有program，今次是更唔知佢做乜的Sql…orz﹗由於A-level時CA係最後一科，我又掛住去搵暑期工…這科的下場…哼哼…好在係AS咋…

教呢科的阿sir是個懶年青的年青人，後來本人上了商大，偶然於商大碰到他(佢應該係來進修)，同學竟以為佢係本人中學同學囉…吓？﹗

電腦盲玩足七年電腦，係咪奇先﹗

其他奇怪學校生活文：
寧死也不穿的…校褸
Computer Studies / Computer Application
中學術科奇怪項目
運動嘛…
**********************************************
相信比我更奇趣的博友文：

牢騷絮語：奇趣學科、另類課外活動 (aulina)
紫熊部屋： 課外活動 (紫熊)
cosmicrays：尚存模糊記憶的課外活動 (cosmicrays)
一個好人？：校園電視 (Guy)
飯．格：11.06(另類)課外活動 (rice)
加百列傳：我的奇趣學科 (Gabriel)
Yan's Space?： 集體發文之另類課外活動 (yan)
no reason：另類課外活動 (no reason)
依莎貝兒的格．仔．簿：另類課外活動 - Prefect (Bel Bel)
Uncle Ray's Corner：奇趣學科／另類課外活動-人肉層層疊 (UncleRay)