[韓劇]笑翻了~《原來是美男》

可能是龍年來了，於是小的一條龍龍到停唔到…

我想問呢，點解話自己係搖滾的人唔搖滾，但明明似偶像的group又玩晒樂器咁既呢？

個故仔係漫畫改編的嗎？突然覺得好似睇緊《花樣少男少女》(只看過日版)撈啲《流星蝦丸》(其實我只看過少少台版第一輯，和為了斗真而看的日版第二輯第一集而已…)，上一篇花癡文所講的formula仍然成位，也許偶像劇都係咁吧…可愛+傻氣&半隻腳踏進一個陌生環境的女主角，梗係會遇到一個古古怪怪的男主角，然後實有一個同樣旗鼓相當令仔的但相反係勁溫柔勁善解人意，個女主因為陌生所以攪事種種事故，古怪男睇唔順眼勁厭惡之餘又總係慢慢產生愛意而表面上毫不退讓但暗地處處幫忙…而溫柔男就守護天使咁好好喺女角身邊幫佢見招拆招喎﹗(咦，我覺得我好似在照dup前一篇文的內容囉﹗哈哈…)

睇之前諗住都係偶像劇一套啫，花癡一吓呀眼線黃泰京，點知一睇就停唔到，傻的，啲笑點好爆笑…。因為阿女主角高美女本來係修女嘛，突然要女扮男裝走去做明星，比平時的窮家女鬥闊少個gap再拉開多一點，咁佢唔慣同無知又突然好合理，再加上黃泰京係個超高傲又挑剔和古怪的怪人，高美男次次見到佢都做正佢最唔鐘意做既野…於是我不停在車上睇到陰陰咀笑…真係好危險…

A.N.JELL成鬼日喺排舞室練舞，但次次見佢地上台都係咁玩樂器地唱…咁佢地練舞來幹嗎？而且從來無見過dancer在台上伴舞喎﹗(同埋點解個宿舍會大得咁交關？間房隨時大過我間屋﹗)

哈哈，好鐘意阿泰京啲啤眼加嘟咀，一開始佢pat了pat留海遮咁一邊眼，成日得一隻眼啤來啤去，眼神很堅定耶﹗(笑)…那pat黑色留海讓我想起《欺詐獵人》的山p…成日咁樣遮住隻眼又要畫眼線(sorry，那條上下完美地包住隻眼的眼線讓我很在意(爬網上的文有大大說是要遮一遮根碩哥的稚氣喎((個天使笑容好可愛呀﹗))…泰京哥是leader吧…)…之後改成gel(束？)起的造型就順眼多了~

我想問呀泰京哥蝦唔食得麥唔食得芝麻唔食得，又有壓力性胃病又有夜盲症，佢平時食乜？跟住出show時在台底上台無燈點算呢？(太認真了？)…又話說lap到過右邊的劇照…讓我一度以為這套的主角是高中生…囧(一諗起佢兜錯喎同美男經過同一間雪糕店4次我就笑了…)

哈哈哈…呢條片好好笑…仲要加埋啲無名火起effect…好正…

阿新禹哥就是花澤類吧，總係守在高美男身邊，想行近啲時又硬係被泰京搶先一步咁…(博友才說韓劇鐘意將景點融入劇中洗人腦，剛剛看到一集泰京被uhey叫走咗無接到著了女裝的高美男…新禹就喺電話度guide住高美男喺明洞度飲飲食食買呢買路，嘩﹗不就是旅遊雜誌？)Jeremy(團中的鼓佬？《天與地》不死呀﹗)既作用就如《花樣少男少女》的中津同學，係負責攪gag…um…呀~~~~我諗起斗真同學有套《源氏物語》唔知幾時上呢…呀~~~~~

講起uhey…嘩﹗佢塊面好包呀﹗國民妖精吧…um…佢好鬼煩，表面和善內裡奄尖聲悶，但我倒期待佢多啲同泰京既同場，睇佢俾泰京激到傻了眼時我就笑到標眼水了…(我鐘意喺studio度泰京串佢寫錯字同指住上面有cctv…哈哈哈…)

um，雖然說高美男有天使般既聲音…但佢高度同其他人爭咁遠…唔覺好突兀架咩？

據說劇情後尾有啲搵戲嚟做，但so far又睇得好開心…哈哈哈…um，努力繼續煲

(14/2/12後按：煲完補番個全劇後感：

啲笑料真係好好笑(特別係泰京被豬追一幕…諗起都偷笑)，又真如各看完的大大所言，明明前後明快攪笑感動兼而有之，後後又無啦啦要攪個親生母親大爆料，夾硬要美男(女)和泰京決裂一吓，之後又要講不出口(愛得不足夠？)…兜了個大圈先肯表白清楚咁…不過都ok既，無《瑪麗外宿中》無缺咁令人把火…

講起《瑪麗》，我想問點解又係買咗條鍊想送俾女主角之後就大決裂？之後和好先拎番出嚟送俾個女仔…點解又係咁架？囧﹗

last but not least，日版啲人腳真巧京京…第一次…以我咁崇日死都要支持日版既人嚟講都支持唔住…呢吓真係能人所不能，其實翻拍都可算一個自殺式行為…)

**********************************************************************
數一數呢兩個月我究竟煲咗啲乜劇：

• 潛行追擊(去到一半…本來想追番中間laughing哥做臥底一段，不過追追吓又無心機睇了…)
• 飛女正傳(埋咗尾了…又係一套笑翻了的…)
• 天與地(有啲集數出咗街未睇…遲吓補番…)
• 家政婦三田(從而發現了惠一爸爸滿不錯…)
• 鈴木先生(驚訝地發現齊藤隆成didi原來仲有拍劇喎﹗)
• second virgin(好難受的一套成人愛情戲…)
• 還有第11人(呢套很ok呀，爆笑度仲高過《花癡刑警》喎﹗)
• 虎與龍(去到第9集…因為睇完宮藤桑新作而挑起條根去睇…呀…好懷念呀﹗小虎真係正呀﹗爭第10集大結局咋…)
• 瑪麗外宿中(中段以後好煩啦…直接跳去代表變身無缺助手嗰度最好笑﹗哈)
• 原來是美男(去到第7集…咦，好唔好睇埋個日本版呢？)
• 太可怕關係日版只煲到第8集某人登場的一節…哈哈哈…

好癲囉﹗好癲囉真係好癲囉﹗