[韓劇]《貝多芬病毒》〜愛と情熱のシンフォニー〜

 

我諗貝多芬的病毒減輕了小的花癡病毒，本來是出於一條龍唔爭在睇埋佢而看這部，但竟然出奇的對味，滿足度仲高於之前極速鯨吞的這套和這套耶…

(我想問日本播出時電視台網頁的一句「愛と情熱のシンフォニー」係套劇本身有的日本自己加？但又好襯套劇…竟然好有日劇啲熱血、追夢、奔向理想feel喎﹗)

((於是…我決定貼日文相…嘩哈哈哈﹗我唔識韓文呀﹗))

暫時睇到第7集。


睇之初有人說這套是韓版《交響情人夢》(嘩﹗唔覺唔覺5年前的了)，開首都係開九唔搭八的人聚在一起組成一個交響樂團(室樂團？)，從被睇死到成功演出，爆笑又好熱血的。《貝多芬》仲誇張，因為個project交託的人夾帶私逃，為了成功演出到於是四出招兵買馬，招回來的不是三四五流樂手就係幾廿年無掂過樂器的人拉雜成軍，再對住個交響樂團殺手指揮姜mea，過程就梗係正路地頂唔順個惡魔，或者唔想俾表演影響自己生活而遊走於放棄同繼續之間，但大家慢慢建立互信，卒之成功上台演出(第5集)時，小的在車上睇睇到想拍手呢…

um，係啦，最吸引小的就係呢個現實與夢想之間的追逐(唔係張某君了，哈哈)，第5集的公演就好似《天與地》最後一集那個rock fest，事前點樣對音樂放棄又繼續繼續又放棄，盡管不顧一切在台上好好演出，演出後又要面對番現實。

劇中個個都有自己面對的問題：女主角面對耳疾、老伯伯面對老人痴呆症(而家改咗個名？)、少女面對學業上金錢壓力、上班族要養家、中年太太照顧家庭卻不被重視、為了養患病的家人而到夜店工作等，這班人又老到少又有錢到無錢，總有一個喺左近咁。其中最深刻(或者最多戲俾佢表演)係拉大提琴的鄭熙妍，音大畢業但結婚生兒育女後就全心照顧家庭，再無掂過個琴，趁這次公演想重拾舊日所好卻被老公大罵，最慘係佢以為自己都於心有愧，覺得晚晚閃咗去練琴對唔住屋企的時候，原來仔女完全唔aware自己，本以為可以賺回一點點存在感的地方都無埋，慘爆。又估唔到佢走去喪鬧 姜mae時，重覆了幾十萬次自己係邊個時竟然打動到姜mae，因健宇遲來join唔到solo就讓她頂上，話實佢拉solo的一段真係好有型(不過事前有練習過的嗎？咁急就章叫佢上台佢準備得夠嗎？oh，睇戲都係唔好駁戲了…)

um，見住呢班往時因為各式原因而不能繼續夢想的人，小的就不住很有同感，追一個夢究竟是好是壞呢？而追，又應該耗費幾多去追？對生活有幾多影響先唔叫有影響呢？(唉…)

最愛是佢夠快，道理不長篇大論，說服的說話也沒冗長到我想ff。 最喜歡姜mae在公演前跟在十字路口指揮緊交通的健宇講的一段(估唔到老姜也真欣賞小姜的才華，會去勸佢的說)，那個十字路口滿有意思(不過好危險喎…車死都唔知咩事啦…)…好鐘意 姜mae說「試過伸手去觸碰過的才叫夢想」，究竟應該繼續做警察定向音樂發展呢呢呢呢呢呢？(btw，乜韓國警察可以自己帶套制服返屋企？)

老姜和小姜二人都叫姜健宇是有意思的吧？(如果純為攪個性完全不同男角兩件出嚟玩三角總我真是反眼了…)睇阿 姜mae鬧人唔使本其實幾過癮(XD)，最個癮係佢連權貴官員都唔俾面…哈…而阿女主角李智雅望落有啲似鍾嘉欣…

哈哈哈，忍到而家先來花癡一吓，沒古靈精怪的造型…睇唔慣(XD)。(佢可唔可以教吓我aural呀？可以聽完一次就背番出嚟咁勁﹗)

據說之後小姜在姜魔指導之下走向音樂之路，而又據說因為收視好好所以硬加了兩集，而又據說因為硬加了兩集而硬加了三角戀的篇幅…唉呀…點解呢？

OH，anyway，繼續熱血地煲，然後返屋企快快樂樂地練琴，yeah﹗~

關於此劇：
維基/貝多芬病毒感染/(又將劇集用嚟推廣旅遊了﹗)
(22/2/12後按：我竟然留意咗呢條頸巾？)