關於看書

縱觀一吓自己的看書習慣…可以歸納成以下幾點。

買完不代表睇完。

行入書局在諗好唔好買呢本書時，腦中的魔鬼就會話：得既﹗你有時間慢慢睇既…但最後呢？﹗可能買咗拎番屋企擺上書櫃後…就一直無再拎番出嚟。尤記得當年科技 股炙手可熱時小的貪得意買了本講online marketing的書，真係sorry，到而家…科技股爆破了X咁多年，我連目錄都沒有看過…噢﹗無計啦，有啲書係有時間性，過咗氣就提不起興趣睇的 了。

出嚟做野後曾經很熱誠地掃和工作有關既書…咁轉了工後就變一堆廢紙…囧﹗

題材不停重覆。

小的就是愛一條龍+一窩蜂咁睇某一個topic，睇完係咪有深入認識就…天曉得了…但類近題目有十幾廿本書堆埋一齊就肯定的了，在書局睇的時候不停提自己： 嗱，見唔到和屋企買咗那本有乜分別，又無乜獨特見解既就咪鬼買啦﹗但就係有啲topic我會無抵抗力神堆鬼撞地走去俾錢。於是我是有成大堆國史、 branding、人物傳記呀咁既書，慈禧傳我諗我座底有六、七本…囧。睇得多就開始有抵抗力…人物傳記既野不是人人都有獨特見解，不停回帶就成日有囉… (講開又講，喺書局揭過本啲相起格的…嘩﹗你可以再hea啲嗎？)。我最新的嚐好是日能書…幾年來考三二一級儲落的練習和雞精書又是一條和我們友誼一樣長 的長城…怎辦？﹗轉制了…還有人有興趣接收嗎？

只要是喜歡的作者會見新書就買。

曾幾何時我好proud of一字排開尤如一條長龍的畢華流(博益)全集(看倌們就知我從小都沒怎樣儲到錢吧？)、吳昊(佢講香港故事的小書真係好好睇﹗)、蔡志忠(沒有全集，不過都有十幾廿本…但我覺得睇佢啲漫畫去學番中國古典係生動有趣好多﹗)、蔡子強(《新君王論》有一點回帶了…)、湯禎兆(日本系列還是讓人看得津津有味 既…)、高木直子(開始試著直接買日文版…同時練日文嘛…)、彎彎…，仲有曾幾何時的《XX101》和《逛書架》(好在佢地都無再出啫﹗)。大愛係包容的，感情分到達某個程度時，都唔理內容係咪回帶，總之儲齊個collection先係最緊要(其實我買cd都係同一個態度…先會變成一個儲物狂…)

被封面和背面設計吸引，看過頭幾版覺得有趣就買，但買回家後沒興趣看了。

大學時買得最瘋，天地堂時一個人行MK總可以係咪都掃幾本返嚟。當年覺得要睇多啲書對本科有利嘛，於是揭兩揭覺得OK就買，特別係英文既媽劇亭書…書局的格 局總係令我覺得本本拎上手都好好睇，但屋企又令我覺得本本拎上手都令人昏昏欲睡。望住本雞肋書，睇又唔係唔睇又唔係…都係擺番上個架，繼續做令我好像很有 文化修養的道具。

一百蚊以下的書會買得比較爽手。

小的怪習慣係鐘意好事成雙，買得一本唔過癮，但本本拎起手過百既話又有啲肉痛，跟住就諗不如行開啲樓上書店先買啦？﹗都好喎﹗就放低唔買(放低唔買先係目的…)，一百蚊樓下既，買兩本買幾蚊，好似無咁肉痛…啊…這是我自欺欺人既啫…當我無講過啦…

還是不太喜歡買簡體書。

雖然寫我係會寫簡體字(不過更多時係寫日文漢字…)，讀的話我就係死忠繁體字粉絲。同埋繁體書啲用紙厚啲，封面用硬皮既話擺放上嚟都方便啲，簡體書多軟皮薄紙，有時斜放一排後書就彎了，點夾點谷都直不了，嗚…

還是很喜歡劃書和摺角。

所以我不賣二手書，鐘意寫買既日子和不用書簽係怪習慣，哈。

藏了很久的舊書給發掘出來，一心諗住快點睇埋佢，但”諗住”往往諗幾年都未做的。

心血來潮很想看的時候翻箱倒櫃的搵番出嚟，好好的放喺床邊諗住擇個黃道吉日日去睇…但放咗喺度唔覺唔覺…日子一天一天的過去，都係未睇…。新屎坑三日香係真的，買咗新書番屋企不把握頭三日快快開始揭，等心血都乾了的時候就不知那天才再會有熱情去看了。

還是不喜歡電子書。

下了唉扑既ibook後其實係無乜開過嚟睇，一來係覺得揭那個靈便度不太滿意(等車時都係打機好…哈哈)，二來係試過部機跌兩次落地就死咗…好兒戲啊﹗(不過我還是很迷蛇果既產品…囧)硬覺得有本實物書喺手會好啲，總覺得電子書不太真實…

望住書櫃滿滿的書心裡還是很滿足，腹有詩書氣自華嘛，有些書還未看進腦腹，擺喺度讓房間變得有文藝氣息也不錯啊﹗

係呀…望住滿滿既櫃係會好滿足既﹗哈。

************************************************************************

趁呢水書展講一兩句關於書的。其實呢兩年買書係小心咗，自從可以自資出書或blogger/普通人因為某些hot topic會被邀出書，本來都好開心可以多些平台讓大家一嘗作家癮，但看下去中過好多次招…即係呢…書名係有趣但內容卻空泛(咁似呢幾年日劇既問題既？﹗)，所以係買得少咗，也沒有心情去書展，還是喜歡在書店可以有空間睇多陣，諗清楚係咪真係想睇先去俾錢。即係呢，幾十蚊都係錢，買完先覺無鬼聊把鬼 再拎去攝櫃底…好浪費囉…