[港劇]《壹號皇庭》I-V

經典台攪緊《我們的陳秀雯》，於是因緣際會又睇番《壹號皇庭》…一發不可收拾即刻去搵碟睇，而家我睇到第三輯了﹗

關於呢套劇恕恕唸要分兩PART，分番以前和今次翻看的呢…

以前…

第一和第二輯係深夜播，首播時沒有看。只有後來重播時斷斷續續的看，記憶中之前好似沒有以律師為主線的戲吧？有一水很喜歡扮佢地係又OBJECTION唔係又OBJECTION，好有型的說~

同埋呢，細個時睇完有一刻真係好恨做律師(如果呢個"恨"得認真啲就好啦…umum)，即係呢…典解劇中人好似唔多使做野…上庭講幾句野問幾句問題就收工，收工唔係去酒吧吹水就係揸住架靚車周街行，跟住屋企又鬼咁大喎…

而家…

今次係一集連住一集一輯連住一輯咁睇，於是感覺和以前就大為不同了…

• 見律師"objection, 法官大人objection"我邊睇邊估法官大人會話反對有效定無效，估得幾中架﹗同埋會估陪審團判被告罪名成唔名立，幾好玩的~(law好貴呢…不過我對這方面可真是有興趣的…哈)
• 我想問呢，律師結案陳詞時係咪真係要「本案係一宗_____ (例：兇殘、令人髮指、痛心疾首…)既_____案(例：兇殺、強姦)」…定係檢察官結案陳詞一定係咁講既呢…
• 同埋我又想問，回歸前雖然話慢慢中文化，但唔係話都係要講英文既嘛？(電視劇總不成套英文吧？﹗)
• 咁多位女角，陳秀雯係最有型(細個時我以為檢察官真係一個官…)，講野抑揚頓挫高低有致，如果被個咁既律師問我問題怕且想唔怯都唔得。能同佢一較高下既就係劉美娟啦，另外阿江李頌雲女士(蘇杏璇)都好有台型吓。鄭天后就多懶音咗少少…王天后把聲好柔弱，不過個cool樣夠殺嘛，最唔夠強硬係陳梅馨囉…(後期陳芷菁和陳慧珊都好有型的…不過我未睇到嘛…)
• 睇番啲男角就…哈哈哈﹗歐陽波比哥哥由第一輯好多頭髮變咗第三輯…已經…oh。陶大宇做師爺仔真係好型吓…又一度令我覺得做律師樓好他條的…蘇永康好似無乜存在感…不過佢啲女友次次都係天后級，跟住下一輯時都因不同理由跟佬走而飛佢…好慘…。
• 又因為我係連住睇，於是見啲案件好duplicate。輯輯例有殺人(﹗)、強姦(個男同個女係識既…於是就有爭議位啦…)、神神化化野(次次都係咁啱殺咗人…)。而最攪笑既係，幾位主角有親啲姨媽姑姐粉墨粒場，佢地一定同件案有關…
• 啲人腳都好duplicate，黎視帝就做咗兩輯犯，跟住有人上輯做精神病人下輯做醫生，又黎宣姨做咗兩輯犯喎都﹗跟住有人上輯做犯下輯做法庭秘書。我最接受唔到…係吳國敬喺頭一輯做犯，第三輯做律師喎﹗
• 阿江李頌雲女士好似次次都係同熟人打官司…仲有兩次係同佢個仔打添﹗實在我覺得佢對仔女一個叫江承宇一個叫江承宙好有型。
• 其實當年我覺得阿宇好有型架…哈哈。
• 也許係深夜播關係…好多粗口…又仆_、又hum_ _咁…跟住幾個主角你串我我串你時又煙又酒，啲內容都幾衰格…啊…但睇落又唔覺奇怪架喎…而家啲劇講多句粗啲既對白都被人投訴爆啦﹗
• 又因為第一、二輯係單元劇，所以只有少少感情線，法庭戲佔6成以上時間，比起而家得頭幾集關個職業事，跟住就要三角戀既專業/紀律部隊劇…真係舒服好多囉…
• 睇番頭一兩輯好好笑，阿丁柔(陳秀雯)啲suit唔係大紅就大紫，乜當年啲律師著到咁sharp既咩？個頭又成日唔連戲喎﹗啲裙又短到爆，真係驚佢走光呀﹗第二輯轉番黑白灰suit就順眼晒啦﹗

• 我記得9字中期好流行宣萱身上既有belt suit(小的仲整咗套俾barbie的說…XDDDDD)…小的當年成日幻想大個返工著住呢啲衫喺中環度遊走(仲要喺老蘭下面間馬莎個十字街口倚欄杆仰望長空…)…卒之…係返過要著suit既工既…不過一陣咁大把…同埋我係未試過喺中環返工囉﹗
• 睇番啲主角由第一輯用大哥大，到第三輯用摺龜…嘩﹗好似睇番手電發展史咁…(2000、2係用nokia 8250咁既)…真係唔睇都差啲唔記得曾經有個年代係用call機，而且無message顯示，要打上台仲要對pw先知乜水乜事call你既﹗
• 見到皇冠…啊…those old good days...

好了…仲有兩輯半…我要繼續努力了。~

壹號皇庭@維基