大學生何價？

而家呢個時勢令我諗起讀history時見過的呢幅相…時為上世紀20年代經濟大衰退，人浮於事係無年代之分的說…

最近看報見有大學生為政府的實習計劃令佢地被標籤為「最低工資」4000蚊…看畢是十分感概的說…。人浮於事…人浮於事呀﹗

我不會(也不懂)說那班小朋友應唔應該去抗議，老實說畢業多年我到而家都想唔通究竟一個大學生值幾多錢…即是說呢，書係讀咗好多，但又代唔代表知識好豐富呢？就當你gpa勁到有4…咁又代唔代表閣下識做人處世呢？呢啲唔會喺gpa度reflect度架喎…(說到去尊嚴又好似有少少嚴重喎…)

小的一直覺得我等後殖民地長大的一群灰到爆，港英尾班車搭不上，諗住回歸祖國大把世界，偏生經濟低谷一個又一個，仲要一山還有一山高喎。同時我們又從小聽就長輩說讀好書將來就有好出路，可以靠知識改變命云云，但這是他們年代的成功formula囉唔該。畢業後份工得4000蚊…的確係灰到爆…。不過個大環境係咁，fresh grad搵工難，在職的亦不見得飯碗長保，大家都有本難唸的經…

回想當年雙失年代4000蚊做唔做呢？ 以我自己當年雙失為例，頭幾個月手頭還有點儲起的關窿屋企又唔等開飯，仲有點本錢去挑條件不太好的offer；之但係頹了幾個月就要馬死落地行，一來太頹自信心都拖垮了，二來長貧難顧。雙失得太耐都顧不得甚麼天子門生的面子，最後小的係in成咗份宣傳大使的partime，人工都係得幾千蚊，算係幫補吓咁…小的可是在諗使唔使應徵吓*$呀咁的了…

話說回頭，若然個offer係一份性質和自己興趣能力相近，亦即係有野學的話(而家唔會有人開個post請人返嚟hea吧？)((又若然間公司係規模相當的公司既話就更好…))，馬死落地行一吓亦無妨，短期來說賺到的錢可能係少得可憐，夠搭車唔夠食，又唔夠去we wet(關窿一定申請到extension吧？﹗)，但學到的經驗可能受益無窮。家陣間間公司都話縮減人手，話唔定可以接觸到個post以前唔會做到的範疇。常言道機會係俾準備好的人，把握時間裝備自己比自怨自艾更緊要的說。

又咁講，後生細仔無負擔時捱得起低人工，第時有仔有樓有老婆，幾千蚊夠邊個食先？而家唯有俾啲耐性，等個市好番啲望可以跳出去，爭取番個好offer囉。(而家個個打工仔都係咁諗吧？)除非繼續學業，要不resume畢業後空出大段時間無做野的…都唔好意思同hr姐姐講自己長期量地吧…

不是說為咗份工就要任人魚肉，既然叫得做offer，閣下係絕對有權衡量接唔接受，而家唔係有支槍指住自己太陽穴嘛。只是如果客觀條件許可，份工本身又有發揮的話，就將之視為個鍛鍊的機會吧，忍得苦中苦方為人上人啊。新鮮人除了學識，社會經驗和態度都好重要的說(其實好多agency請account executive都係少得可憐的…好景時的offer都唔高得去邊…)。

(有時我覺得上天安排係好巧妙，在職時覺得份工好刻薄，但往往柳暗花明…就是說，從第一份工轉去第二份時，人工可是減了兩成半﹗還完關窿僅僅夠衣食住行，當年可以覺得自己點解咁命苦…但誰知那時的經驗到現司時會大派用場…真係好奇妙…)

香港人共勉之呢…

舊文： 《一個人漂泊的日子》+我的雙失歲月 (我係絕對明白雙失之苦的說…)
為甚麼讀大學？