餐廳裡的蛋散

兩家快餐努力釋出善意，雖然此等優惠無我份…同埋如果係現兜兜減幾蚊會令人更開心﹗

只是店家在釋出善意，(不知是不是因為本人地獄黑仔王因子發作)，一連三天到不同的食店都「巧」遇正在釋出惡意的女人(也是巧合，咁啱都係女人…)，風平浪靜的店子突然爆出一把狂鬧人的聲，很難不吸引本人去八吧…

當該等惡女子發功時本人同時都在享用食物，一家茶餐廳兩家快餐，說實在在此等店子用餐價錢不高，咁要求也不能太高啦，只要食物水準可以店員不是傲慢無禮十問 九唔應就行(很多唔理你店小二都係出名的茶餐廳的名物呢…)；咁這三家店的店員表現都合格呀(得到半cs人的本人既approval﹗)，佢地犯既係漏了加客人的改動(漏走蔥之類、俾錯中西餐餐具之類，有一家就係女人行去借洗手間鎖匙，因為上一位客人未還番所以未有得借，就捱鬧了…)，說實在店員知道自己未能fulfill客人要求時也沒駁咀駁舌，都是double confirm客人要求再出過食物，咁需時又唔係耐，都未到要發皮四鬧的程度丫(以本人的史單特而言)，起碼從店員的面口度看出佢地無「miu」咀先，所 以看到幾位惡女子以極高的聲浪鬧鬧鬧時本人是頗為驚訝的…使唔使呀…

(其中一家快餐店的阿姐碗麵轉錯麵，惡女喺水吧見到唔妥時係大叫「你想餓死我呀…快啲換過佢叫你啲同事拎俾我…」…嘩…你又唔係七老八十的婆婆…咁易餓得死咩。…咁樣很難不令本人注目囉…直頭為之側目…) 套謝太之前訪問的名句：「你有阿媽生，我地都有」，人家既然收得你錢，理應提供優質服務和商品既，但收人二分四唔代表就要低低在下，做完份內事仲要做埋份外的…出氣袋呀…，怎麼要釋出咁多惡意落盡人面呢…

實在近年多了很多動不動就大聲鬧，以為聲大夾惡就是王道的人，如果店家講佢又唔聽，聽佢又唔明，明佢又唔做，做佢又唔服…做客人的就要發吓皮4捍圍自己權利，但店員又唔係唔好服務，而且人總有錯，佢地知錯肯改就好啦，做客人的就總係唔肯體諒對方，以為俾錢就大晒…整個不就是惡性循環嘛，返工時遇上釋出惡意的惡人，下班後心情不好很容易也對周遭的人散發負能量…不好不好呀﹗

試吓將心比己嘛。除非那家寶號一早就是死證，講乜都係對牛彈琴，那就只得動氣一點次次都要大發皮4(如某惡名昭彰的唉x寶)。不過都明既，人家cs大大都係跟稿讀，你估吓吓俾人鬧又好過癮咩…呢個時勢人人都有本難唸的經呀。

如果幾個潑婦令以上幾家店的店員提供好服務的一團火熄了真是太可惜了…加油呀﹗香港人…唔好俾負能量打倒啊﹗

蛋散系列1：銀行裡的蛋散