2011/09/08

[港劇]突然懷舊之《刑事偵緝檔案》

本來係追緊《彊屍》的(第一輯個結局令小的回想又回想,點解咁多謎架﹗﹗﹗係咪要睇埋二輯呢?傳說係解謎之一輯喎﹗)無聊之下click吓click吓click到《刑偵》的你管片…被trigger了…無啦啦睇了第一輯頭3集…呀~~~~好懷念呀﹗


(見唔見我無併貼到第四輯的圖落去呀﹗對﹗重點就是小的唔鐘意無咗大勇和義仔的《刑偵》…)

******************這是我不喜歡《刑偵4》的分界線******************

其實無記的紀律部隊查案劇(no matter係ICAC、海關、O記重案飛虎CIB((係喜爺的《CIB情報科》唔係《潛行》喎﹗)鑑證法醫乜都好啦),只要肯將重心放番多一點在查案上(好了,感情線是需要的啦,只要唔係頭尾幾集工作,中間全線談情就得啦,例子:《烈火談心3》)。《刑偵》第一輯只有20集,開始時頗有《皇庭》開初的味道,以案件為主導,人物關係為副線,個比例重要案件為多人物為少添,相當緊湊的說(難怪我會咁鐘意睇《真相》了)…。記得當年一路睇一路估誰 是兇手好緊張的,啲案情唔算扭橋橋過龍硬做出人意表的感覺,合理啦都,20集真係點唔夠喉的說…大勇同高婕又唔知係咪真係一齊喎…(相比之下小的係鐘意睇義仔和GIGI多啲的…哈)((唔睇都唔記得,原來陳百萬演法醫喎…)

都說過小的很愛《皇庭》MICHAEL和阿SAM嘛,MICHAEL變身張大勇神探,跟住有本人勁熱愛的《叻人新世紀》梁榮忠,梗睇﹗哈哈哈,奇妙的是,阿SAM終於在第四輯現身,跟黑面古的徐飛談情說愛,這是後話了…

呀,貼了歌,小的情有獨鐘第一輯,除了是第一輯往往先入為主印象深(而家睇番郭可盈當年塊面真係圓到爆…囧),仲有就係主題曲﹗見到嘛…是本人當年最愛的古眼神﹗主題曲《感情真相》好好聽,插曲《對你始終痴心一往》係好好好好好聽,《笑說想》隻碟有好多歌係電視劇主題/插曲來的(《笑說想》係《笑看風雲》插曲) 。或者製作上第一輯係比較簡單(或原始),不過情意結使然,小的還是喜歡第一輯的原始風味呢…睇第二輯時我仲妄想會唔會用番古眼神首歌做主題曲的…可惜無啦…我失望了…

其實三輯查過啲乜案已經唔太記得,睇番維基都係唔記得(哈﹗),淨係見到好多已經無拍劇的舊名字…OH﹗維基說,呢套劇係死得人最多的,跟住又有統計原來有人真係做足四輯的﹗好強﹗(只是第四輯人面全非很可惜啦,點解仲要用番同一個夠呢,有點呃水囉…)

第二和第三輯加多好多感情線,跟住又玩失憶(二),又玩疑似同一個人(三),集數又多咗,劇情都有點拖拉了…感覺遠不如第一輯爽快,輯輯大勇都無啦啦有啲新女友令佢唔可以同阿JESSIE(車匙﹗)一齊,跟住義仔啲心儀對像又硬係兇手(應該只得鄭天后唔係囉…呀,當年佢無啦啦出現在第二輯,跟住尾那10集喪播《愛的輓歌》,聽到小的都入咗腦…)

諗諗吓,我最記得第三輯(定第二輯?)吳美珩演變性人…除了拖拉的感情線外,第三輯開始喪注入(這是比抄講得好聽的說法)《金田一》的元素,開始硬扮曲折離奇了…OH﹗

******************這是我不喜歡《刑偵4》的分界線******************

除了我唔明點解明明唔同晒人都硬要用番同一個名之外,或者呢部劇都唔係太差既,頭三輯義仔和大勇好明顯係兄弟配,呢套野山哥(陳錦鴻)和徐飛(古黑子…呃…個配搭好《創世紀》喎﹗)就勢均力敵啲,好懶係鬥智鬥力咁。啲案其實我都唔記得,係記得最尾郭晉安演恐怖份子,唔知點解脅持咗阿芊芊(向海嵐),無啦啦走出嚟唔知做乜咁,總之就係令阿飛哥唔可以同MISS MO(宣萱)一齊咁…呃﹗成套劇古黑子都很CHOK的…OH﹗

啲女仔蛇視后當年套套劇都叫人X哥的(佢好似喺《雪山飛狐》定《飛狐外傳》演過苗若蘭…效果是十分驚嚇…),佢一出嚟叫陳錦鴻山哥就…呃…如果我無記錯,佢好似係唔知因為乜野事而入獄,出番嚟就堅強咗好多,唔係一味柔弱啦,是順眼了很多…。而李山山經過《烈火》1給我驚嚇的感覺之後…呢套係OK喎﹗宣萱的MISS MO最記得係一開始佢係短頭髮,拍到結局就變長頭髮了…拍咗好耐嗎?

******************這是講完《刑偵4》的分界線******************

見到有篇文說《潛行狙擊》是向《刑偵》等港產警匪片致敬,咁勁﹗不過減少了無謂的三角戀、爭家產、要生要死呀咁,成套劇緊湊啲確係看得人很爽的。噢耶~

2 則留言:

  1. 我係05年重播時睇《刑偵1》
    初初係為Jessie而睇(當年很鍾意郭可盈的說,但而家對佢完全冇感覺...)點知中左張大勇既招
    個時成時諗,如果弟時有好似張大勇咁既男朋友就好XD

    我最鍾意睇第二輯,人物同案件都分配得幾平均
    而第三輯就好拖拉,搞到我到今時今日都未完整咁睇完成輯!囧

    至於第四輯我都幾鍾意睇,Miss MO同徐飛唔可以係一齊困擾左我好耐(竟然為D咁既野困擾...)
    最重要係有我最鍾意既邵美琪一人分飾兩角做阿子山既孿生姐姐(佢D戲仲搶過唐心同阿Man...)
    不過我初頭都幾抗拒第四輯,我覺得佢唔係"真正"既《刑偵》,睇完之後我覺得如果佢唔係改呢個名套戲會多人鍾意好多...

    P.S.吳美珩演變性人係第四輯

    8th Sep 2011 21:27 PM

    回覆刪除
    回覆
    1. 其實我細個時都ok鐘意郭可盈的…唔知呢,我鐘意佢包包面時個樣,後來越整越瘦個樣兇咗好多…XDDDDDD
      大勇咁既哥哥係幾好架,有事無事都咁TAKE CARE你…不過可以既我都係鐘意《皇庭》MICHAEL多啲…呵呵…
      或者我唔鐘意硬加太多感情線攪到談情戲份多過查案,所以我堅唔鐘意第三輯,第二都OK,始終最鐘意第一輯…雖然啲劇情查過乜案都唔記得晒了…
      第四輯只要改過個名就OK架啦…,第三輯被插太抄金田一,第四輯其實都有日漫偵探劇的影子(山哥拎住個錄音筆呀咁),不過啲案就無咁天馬行空咁…都係那句,改過個名就得架啦﹗佢又唔係好似《烈火雄心》咁擺名每一輯和上一輯人物都無關係,既然同一班人連住做了三輯,第四輯突然轉咗人感覺真係唔太好囉…
      (係喎…原來吳小姐第三和第四輯都有現身…)

      9th Sep 2011 10:05 AM

      刪除

要講幾句嗎?﹗XD