[韓劇]《回答吧1994》~耐力大挑戰

一直放著未開，但見《星星》追完，《學校》和《聽見》翻看得太多(但還是可以繼續翻煲的﹗)，想清《漂亮男人》但實在看不下去，但見微博有人讚《回答吧1994》，本著之前對《回答吧1997》的喜愛，雖然人腳是(一如以往的)一個也不認識，但照開一吓吧…反正懷舊風是本人的茶吧…

看了兩集，真係需要好大勇氣…

其實呢…我想問雖然說時間比上一輯《1997》早了三年，但地點是首爾喎﹗點解比之前的斧山更鄉土既？新村是走呢個風格既咩？

好啦，話說今次繼續係一班主角喺同一間學校的，不過再close啲說女主父母攪合宿，於是大班人住埋一齊(文字描述來自維基)：

成娜靜(高雅拉)

延世大學計算機工程系大一新生，延世大籃球隊球員李相旼之熱血球迷

其實呢，好難唔想起《1997》的詩源，一樣的迷妹…但娜靜好嘈…喺屋企跟垃圾哥打打鬧鬧好嘈，見到偶像好嘈，追車好嘈，食飯瞓覺連整親條腰都好嘈…好可怕…。佢同垃圾的相處幾似詩源和雲宰打打鬧鬧咁，但娜靜係兇狠多十萬倍…。um，而，作為一個粉絲，佢去到絲生的境界吧？對住偶像的車開晒閃燈咁影影影…好可怕呀﹗

金在俊/垃圾(鄭宇)

延世大學醫學院「Medicine」三年級學生，學業運動俱優的天才醫科生

勁有上輯雲宰阿哥太勇哥哥feel，比一眾主角年長一點，(疑似)成熟一點，頭兩集見佢都係喺合宿度行行企企食飯兩味的時候…原來是醫生﹗跟娜靜打打鬧鬧以為係兄妹的時候，原來佢係娜靜親阿哥的好朋友，而真的阿哥細個時死了…佢就成了娜靜哥哥…我仲以為佢係親阿哥可以喺誰是娜靜阿哥list度delete佢添﹗

金善俊/七峰(劉延錫)

延世大學社會體育系大一新生，延世大棒球隊員。1993年鳳凰旗高中棒球大會MVP，大學時代為大學棒球最佳右投手

咦…第二集佢係咪未出場？我唔覺有個咁既人既？

金成均/三千浦(金成均)

延世大學計算機工程系大一新生，外號「三千浦張國榮」

除了大家是男人…有邊忽似張國榮呢？(是梗吧？)…呃，佢似廿歲…我似十歲啦…呃…(我不能控制自己了…)…um…佢傻吓傻吓有啲上一輯的道燦feel…不過道燦令仔好多…佢係負責表達異鄉人在首爾的辛酸吧？﹗um…

孫浩俊/海太(孫浩俊)

延世大學計算機工程系大一新生。順天市最大公車公司--順天交通老闆的大兒子

相對比較令仔和醒目…但對佢個角色是甚麼性格沒有印象…呀，我都係最記得佢係交通公司老闆個仔…um…佢會係俊熙的對照了？

金東俊/冰格萊 (Baro (B1A4))

延世大學醫學院「Pre-medicine」一年級新生。父母經營忠清北道最大養雞場

第二集未出場嗎？還是邊睇邊打機所以miss了？(羊咩聲…)

趙潤真 (Do Hee (Tiny-G))

延世大學計算機工程系大一新生，「徐太志和孩子們」的迷妹

鬼一樣呀﹗佢極有友珍的影子…囧﹗

*******************************************************

如果唔係上一輯的良好印象，就以上的人腳(人樣)我估我都不會睇的了。而個故仔一開始又係現在(2013年)老友gathering，只是將餐廳食飯轉成娜靜新居入伙，跟住又係唔講娜靜公是誰，只有佢同潤真有的沒的談天說地，走出一個中學生又讓人估估吓咁…

好啦，我都知咁早判斷係好衰既，就試著忍住看下去…um

籃球，仲要係南泡的籃球界我實在係一點都不知道，當然上一輯的追星我是比較能代入…不過本住當年有同學迷戀東方和南華，加之於看《男兒當入樽》的經驗…um，學界有多熱還是能想像到的…

只是我真的很不喜歡娜靜有的沒的都在大叫…看得我很想關機…

又係呢個爸爸，又又係呢個媽媽…跟住似層層的94年電腦和94年的家用遊戲機…

哥哥在泡菜國真的很紅啊﹗但出來的哥哥仔…跟哥哥…有邊忽似呀﹗

雖然在泡菜國的幾天有去搭過地車，但卻沒有途經過首爾站，想話都滿古色古香的，頗有日本東京車站的味道呀﹗(呀~~~~東京站真是血拚極危險的好地方…)

um，回想上一輯都係唔多識的人腳，但在結構巧妙的劇本下既懷古又溫心的成長故事，好感都係慢慢建立的，但我記得上次我係睇完第一集就好有衝動馬上開第二集，唔係好似今次咁帶著勇氣先去開第二集，還要懷疑好唔好繼續睇落去…呃，太早下判斷好似唔太好既…睇多兩集睇吓點啦…呃

猶疑的以上。