讀書報告＃25～《駐日記－日韓藝能新明解》

先謝謝友人告知話呢本書會借俾我…因為…我啱我睇﹗哈哈哈﹗話說此書的作者是駐日多年的娛記，見證日韓藝能興衰云云嘛，貢又真係幾啱我呢個自命死忠壽司粉但又日日掛住刷泡星微博的人去驗證吓…

小的迷日星究竟迷了幾耐呢？(好似呢本書個作者咁先來自白一吓)um…唔記細個時阿姨們(逼)的選擇，正確來說應該係90年代初吧？喺無記睇的日劇如《金田一》、《同一屋簷下》，同埋唔知點解朝早播我都會神心地起身睇的《the chef》、《將太的壽司》，加埋由細睇到大的卡通，我諗真係有潛移默化，但那時都無話特別迷邊個偶像的(那時我的神級偶像是郭城城嘛﹗)，um，到真係勁中毒係《悠長假期》(萬惡的根源呀﹗)，這套劇是第一次跟播追(勁呢﹗)，而且會癲到好想勁買劇集相關商品(其實都係講緊信和老翻相和OST…而我懷疑是台灣的老翻…XD)，套劇個氣氛係令小的當年好響往，覺得真係勁潮勁有型(之前能給我這種感覺的…是…《壹號皇庭》﹗哈哈哈)，令小的覺得如果第時能夠成為這樣的大人就好了…um…後話是…而家小的…係一點都不chic不trendy不型不潮…um

呀，讓我重複一次竹野內豐的野獸真二真係好型嗎？(sorry，直到而家，我還是無視了木村大神的…哈哈哈)

雖則就迷得很瘋，但我又無話視劇中邊個做偶像喎，直到唔覺意聽到安室奈美惠的《Can you celebrate》時就有驚為天人(我無誇張架﹗)的感覺…有無攪錯…咁好聽既﹗但那時安室剛宣佈結婚生子暫休了…就說小的迷偶像的時間總是一係太早一係太遲…any肥，總之那年小的就是喪入番佢既舊碟怒煲又怒煲，當年未識日文的我竟然可以逐粒逐粒音抄下來練到可以跟住唱《Don't wanna cry》，勁呢﹗情意結呀，所以上年睇真尊演唱會時跟住唱這首歌感動得差點要哭呀﹗

至於小的另一本命KK，是2001年的事了…雖然就那時佢地已經出道好幾年，好在都未算太遲…近呢幾年就…um…

相比落泡星的坑，小的可是很忠實的壽司粉，曾經滴水不漏的防線也以為不會變的了…哈哈哈，所以說，當防線被某眼線人打破了的時候…內心是掀起多少的悸動啊﹗(<--很難受的用語)…呃，any肥，就說小的也可說是見證壽司和泡菜國藝能界的起起跌跌，讓我這個「叛變」和「半投降」的人現身說法最好不過吧﹗

首先呢…前幾年我睇有記娛樂台都好兇架喎，點解我唔發現這個姐姐？

any肥，呢個姐姐講既野我都好同意吓，壽司國的偶像既然一如以往的只為內銷，就算國內經濟唔好都無話特別要打海外市場，咁佢地興不完美的少男少女，迎合到國內需要就得啦。跟住泡菜國因為自己market細，打開海外市場無可厚非，加之於軟文化帶動其他product sales，佢地aggressive又精準的流行文化計算打開一個又一個市場，比起壽司國要你迎合我，泡菜國的我迎合你梗係易入口得多，以歌論歌雙方的旋律大部份都可以係大路易入口的，但歌詞方面泡菜國的多啲英文配合標誌性造型和舞蹈就比和風英語配大量壽司文歌詞易記易入口啦…

同sharp一樣，有時啲野唔係你有錯，係世界特別變了啫…回頭已是百年身…囧

書入面說壽司國的唱片公司見唱片界銷量大跌，一改以往大灑金錢的捧新人做法，反而係急就章的推一堆人出嚟搏有一個半個紅得出就極速回本，這個我就不得而知…因為除了追開的以外，新人都很少引起我注意(更沒有令我將佢推向本命的境界…囧)…而泡菜團，書說泡菜國奉行「完全製成品」，練習生時期歌要精舞要勁樣要令濕柴要勁就固之然，而且仲要分工合作大家專攻一個語言，總之去到邊都有一個可以對答如流，仲有啲group索性招海外團員，咪話唔勁，身邊有啲朋友說不喜歡佢地個個執到個樣勁一勁…um…這個我又無乜所謂…(我只看令唔令仔既啫…哈哈哈哈)…反正歌精舞勁無得執出嚟架嘛﹗

邊讀邊回想，以前追壽司明星係型架嘛，而家係oudated了。跟年青人傾談，佢地對壽司星係零認知…大家都去追泡星了。(哭﹗)

雖然小的很多飛佛都來自j家，但看佢而家捧來捧去的都係排骨仔…人家對岸的要高矮(好似無矮的吧？)肥瘦乜都有…真係要心痛地說一句…我都受唔住啦…(而KK 14、5歲時其實都係排骨仔來的…但好似都比而家班小朋友令仔得多喎﹗)

至於劇…其實我好受唔住那些常見劇情和極煩的植入式行銷，但壽司劇又硬係佩服唔合心水(我上一套睇的已經係《Summer Nude》仲要爛尾添﹗XD)…跳番出嚟講，又真係不得不配服泡劇喺劇情上的計算精準度…壽司劇嘛…um…實在太悶了，悶久了轉去看泡劇反而有新鮮感，其實兩地劇集風格各異，各有各好，只能說係我睇悶了一種就枇轉一轉咁囉…

怎麼我好似在告解﹗哈哈哈﹗我還是很忠於我追了多年的飛佛架﹗係唔覺意多了一兩個泡菜人之嘛﹗哈哈哈﹗any肥，這本書幾多內行資料…像…點解富士電視台會成日播泡星related的東東﹗長知識了﹗其實我唔知關唔關事，追星的過程呢，特別係海外追星，j家成日唔見咗個人(都係近幾年先喺官網度見到j家人既樣咋﹗)係令人好唔開心架﹗

無論如何，從去旅行點講都係去壽司國就知我的愛係無變架啦﹗哈哈哈﹗