《誰調換了我的父親》(そして父になる)

當我以為香港譯成《誰調換了我的父親》有夠扭捏的時候，台灣是譯成《我的意外爸爸》…囧﹗怎麼攪到好似荷里活啲笑片咁？﹗

ANY肥，初初見到是枝裕和的出品就有興趣啦，尤記得佢造就了14歲康城影帝(那套香港好似係譯《誰明赤子心》了？)，同埋男主角是福山大叔耶﹗我貢敬愛佢…梗係要睇啦﹗

OK，睇完套戲先明，直譯個戲名「之後就變成了爸爸」是十分乎合戲中福山大叔角色的變化的，而英文名「又似爸爸又似阿仔」又啱喎，日文和英文名著重在結局，港台譯名就…UM，是這套戲最大的SHOCK位囉﹗



睇睇埋埋咁多日影，今次呢套好有驚喜…因為佢夠快﹗夠直接﹗竟然(是竟然﹗)沒有悶場﹗推銀指數是零﹗

(大雷﹗劇透﹗注意﹗)

故仔很簡單，就是兩對生活得好地地的夫婦，某日被醫院通知原來養了六年的阿仔係對方的架喎﹗(轟隆﹗)…咁點算呢？眼前的是流著人地血但相處了六年的兒子，要血緣定係要感情呢？兩對夫婦都束手無策，只能就住院方的建議見步行步，先讓兩方的兒子玩多幾次熟落起來，然後周末到對方家留宿，再試行長期住番親生父母的家…

一路睇下去先爆，原來一切不是意外而是護士特登將兩個新生嬰兒掉轉的，話佢睇唔過眼野野宮太太住最好的病房生喎﹗囧﹗ANY肥，這都不是重點，究竟單野點SETTLE呢？野野宮良多(福山大叔)是大公司高層，精英中的精英，對個仔嚴厲又要求高，慶太性格溫馴唔似佢咁鐘意追求成就令佢有啲不滿，於是當佢見到對方齊木一家騎騎呢呢鄉下人是不禁O了咀，仲同律師傾不如兩個都要添…

但TURN OUT原來騎騎呢呢的齊木一家反而HANDLE到啲小朋友，當齊木太太(真木陽子)掉轉同良多話其實兩個小朋友我地都攪得掂時，良多那個一臉死灰的樣子是…UM，這是轉捩點啦，就係佢慢慢變成真正父親，不一味掛住做野將育兒活動拋晒俾老婆的開始吧﹗

一路睇一路諗點樣先係最好的方式，見到兩家人試著長期交換兒子時就心裡一沉(我睇得好認真呢﹗)，齊木一家走自由奔放路線，佢地一定HANDLE到乖巧的慶多，但良多一心望兒成龍，對住FREE慣的琉晴當然無計，仲逼到佢離家出走，接返屋之後良多同太太綠(尾野真千子)講原來佢細個都試過離家出走同被阿爸捉番屋企…囧﹗果真是親子啊﹗

睇睇吓，良多開始放開懷抱跟琉晴玩，但見到流星許願時小朋友童言無忌講出心底願望：想番番齊木一家時…心裡又一沉了，到底是出生後一直住的一家人，好難話有血緣就強逼住埋一齊架，我在諗，不如打回原形，但兩家人KEEP住定時定候見面不好嗎？咁養娘和親娘都不時可以見住，又唔使令小朋友無所適從啦…(我又認真了﹗)

一路啲劇情走向都好自然的，我係覺得演良多後母的風吹純和那位掉包人家BB的護士姐姐，各自的後母身份令良多明白感情可以勝過血緣有啲OVER咗…雖然佢拍護士個仔阿輝膞頭時是有啲感動的…

最勁都係室內露營後良多睇番相機入面啲相，從琉晴的新相慢慢番返去之前慶多的生活照和慶多影爸爸的相，原來佢為自己影過咁多相，但自己從來無乜留意過佢…我在諗，慶多喺爸爸同佢講送個相機俾佢時一口拒絕，是想爸爸睇到啲相…定係我諗多咗…ANY肥，呢一段福山大叔哭在場好多人都忍不住眼濕濕了…

好在劇情走向最後是良多去番搵慶多，終於成功成為父親了﹗那刻我差啲就要喊了…小朋友真的好可愛啊…呀…但點解佢好似畫咗眼線咁既？最後良多跟兒子說mission complete了的時候我差點要哭了﹗

雖然最後結局無MENTION之後點樣，但我希望是如我所想咁啦…(我太認真了？)…ANY肥，買了小說，再睇吓有無更多劇情﹗哈哈哈﹗

另，點解又係尾野真千子和真木陽子？而家係《最高之離婚》的延續嗎？而尾野個樣真係好鄉下人咩？做乜佢老家又喺鄉下既？但佢媽媽好可愛，會同慶多玩WII的…哈哈哈哈﹗

呢套戲上畫時我剛好出門，好在回來仲未落，而且仲夾好時間睇完就動身去搵DIDI了，一天見到兩個令仔，實在太幸福了﹗(呵~呵~呵~~~~~~~~~)要不就走寶了﹗雖然說我的看點是福山大叔，但在演譯上又是高高在上的專業人士…又係對住個細路…一度我以為我在睇《真夏方程式》…而…其實好像沒有太大分別…哈哈哈哈﹗也許是我兜亂了﹗哈哈哈哈﹗(NO OFFENSE﹗)

官網

雖然說是無挑剔的，但有兩樣野…umum

• 翻譯有啲翻漏了啊﹗特別係中後段野野宮兩公婆鬧交的一段…
• 點解6月都仲著緊冬天校服？明明好熱架啦喎﹗仲著校縷？良多啲salaryman就話一年四季都要四裝一度啫…