今年的我執舊年我的舊衫…

古有細佬執家姐的舊衫(係…我細個時阿娘為慳錢除了幾條裙仔外多數著男仔衫的…哈)，現有今年我的執舊年的我舊衫，秋去冬來，要執一執夏天衫準備番幾件可以擋得吓風的衣物時，就發現好多舊年(或之前)買落但從無著過的衫(有啲離譜到牌都未剪)，而家拎番出嚟著，又OK喎(好在我永遠買啲萬年唔勾的普通款衫)，感覺良好番啲…

即係呢，成日都會有啲衝動消費係買一刻覺得很不錯，返到屋企後又唔想著住，諗住放在衣櫃等遲吓先著啦，有機會既成季流流長喎﹗跟住擺吓擺吓就轉季…呃，咁PACK埋佢一邊啦，到出年轉季要執櫃時就發現好多無離LA肺的衫…點解當時會買架？﹗真係唔知喎﹗掉又唔係著又唔係，揼心囉覺得…

又說小的鐘意買埋啲差唔多款的衫(安全嘛﹗)，間條TEE買極都仲買不在話下，外套覺得OK會同款買兩隻色，返工衫都講得過，易襯質地OK(最緊要係使成日熨﹗哈哈﹗)長度合適(點解而家啲西褲咁低腰WHEREAS件裇衫又咁鬼短？一坐低就露底囉…)既可遇不可求，雖然返工唔係FASHION SHOW，不過總不能5日著嚟著去都係那一兩件，好寒酸架嘛…但便服…我真係唔知點解我明明唔多SPORTY但會有三件風縷，兩件灰色綿外套，當中仲要唔係關刀牌就係愛搭的士一係飄拿…嘩，呢度大大話話成千…但無乜幾可著囉…

為了讓自己感覺良好一番，就拎出嚟著吓，而家只得星期六日可以著便服了…嗚。當成身都係買了一年以上的舊衣物時，感覺真係幾良好…哈哈哈哈。

最匪夷所思，是一對差唔多3吋的高跟BOOT，其實我唔會著太高跟的鞋；然後有一件勁LADY成身蝴蝶結的乾濕縷，如果我無記錯應該係喺c+cd度買，真係鬼um眼之霸，真係一次都無著過，每次清衣櫃時都好想掉咗佢但大啦啦成千(好似差唔多…但我咁孤寒應該係特價時買的吧？)無乜著過之下掉咗佢又好浪費…擺吓擺吓擺了幾年…囧﹗

好在呢，呢幾年u記h記呀咁開了入手的多數都有好高使用率，反而係著到殘晒都唔捨得掉(笑)…呀，又說因為轉了工新司無便服日(所以只能於周末穿便服)，又無得著converse返工，卒之捨得掉走兩對著到個底穿晒鞋邊又爛晒睇到著腳的鞋了，阿娘應該好高興…佢成日話我啲鞋霸住個櫃喎…呀，我就係咁鐘意同款的喪買囉…安全嘛。

佢事後先發現，掉了兩對的當天我買了一對新的，而返工鞋我放了在公司枱底替換，造成鞋櫃少了鞋的假像…哈。

呀，又說因為轉了工，而家要formal look，於是之前買落的斯文鞋終於有機會大派用場，由著到痛行到可以見步如飛，但壞處是日日著於是好快殘，鞋頭俾我著到花晒了…嗚。搵晒收收埋的鞋出嚟著勻晒佢，感覺又良好啲，好似無咁浪費。真係唔知點解以前可以買落咁多衫褲鞋襪…重點係唔著囉﹗囧﹗